3 | Amugwasyigwe Azikozyanyo Zyamu Bbaibbele

BBAIBBELE LYAAMBA KUJATIKIZYA . . . Zikozyanyo zyabamaalumi alimwi abamakaintu balo bakali “kulimvwa mbubonya mbotulimvwa aswebo.”—JAKOBO 5:17.

Bupanduluzi

Mu Bbaibbele kuli zyakuluula zyabamaalumi alimwi abamakaintu ibakali kulimvwa mbubonya mbotulimvwa aswebo. Ciindi notulibala, tulakonzya kujana cakuluula caumwi iwakacitikilwa zintu zikozyenye azili mukutucitikila.

Mbocikonzya Kutugwasya Eeci

Toonse tuyanda kuti bantu bamwi kabatumvwisya, kwaambisya ikuti katuciswa bulwazi bwamumizeezo. Ciindi notubala Bbaibbele, tulaiya zyabamwi bakali kuyeeya alimwi akulimvwa mbuli mbotulimvwa aswebo. Akaambo kaceeci, inga twalimvwa kuti tatuli tolikke mukupenga kwesu mbwaanga nkobali abamwi ibakali kupenga mbuli ndiswe.

Bbaibbele lilijisi zibalo zinji zyabaabo bakalimvwa kuti kunyina wakali kukonzya kubagwasya. Sena kuli nomwakalyaambilide kuti, ‘tandikonzyi kuzumanana kupona buumi buli boobu’? Musa, Elija alimwi a Davida bakalimvwa oobo.—Myeelwe 11:14; 1 Bami 19:4; Intembauzyo 55:4.
Bbaibbele lilatwaambila zyamukaintu umwi wazina lya Hana walo “wakauside kapati” akaambo kakuti tanaakali kuzyala alimwi wakali kusampaulwa amukazinyina.—1 Samuele 1:6, 10.
Bbaibbele lilaamba zyamwaalumi umwi wazina lya Jobu wakainda mumapenzi andiza mbuli ngotujisi. Nokuba kuti wakajisi lusyomo luyumu muli Jehova, wakapenga mumizeezo citaambiki cakuti aciindi cimwi wakati: “Buumi bwandicima; tandiyandi kuzumanana kupona.”—Jobu 7:16.

Kuzyiba mbobakailwana mizeezo iitali kabotu bantu aaba baambidwe mu Bbaibbele, kuyootugwasya kujana nguzu nzyotuyandika kutegwa tuliyumye mumapenzi eesu.

Bbaibbele Mbolibagwasya Ba Kevin

Bulwazi Bwakutasitikila Mumizeezo Mbobundijatikizya

“Ndakajanwa abulwazi bwakutasitikila mumizeezo (bipolar disorder) ciindi nondakali afwaafwi kukkwanya myaka iili 50. Zimwi ziindi ndilaakulimvwa kuti inga ndaalwana mapenzi aali oonse aakonzya kundisikila. Pele aziindi zimwi, ndilimvwa kuti kubota ndafwa buyo.”

Bbaibbele Mbolindigwasya

“Muntu umwi wamu Bbaibbele iwakali kulimvwa mbuli ndime mwaapostolo Petro. Wakali kulubizya-lubizya calo cakamupa kulimvwa kubula mpindu. Pele muciindi cakuzumanana kulimvwa boobo, Petro wakatalika kuyanzana abalongwe ibakali kumubikkila maano. Ikuti buzuba oobo zintu tazindeendeli kabotu akaambo kabulwazi bwangu, zyoonse nzyondicita zindipa kulimvwa kutyompwa kapati akubula mpindu. Pele mbuli Petro, ndaiya kusolekesya kuba abalongwe ibakonzya kundigwasya kutatyompwa.

“Muntu umwi wamu Bbaibbele unduumbulizya kapati, Mwami Davida. Bunji bwaziindi wakali kulimvwa kutyompwa akaambo kabukkale bwakwe alimwi akuusa akaambo kazibi nzyaakacita musyule. Ndilakonzya kumumvwisya nkaambo andime ndilaakucita naa kwaamba zintu zindipa kuusa. Majwi aa Davida aali ku Intembauzyo 51 alanduumbulizya. Mukapango 3, Davida wakati: ‘Ndilizizyi kabotu zinyonyoono zyangu, alimwi cibi cangu cili kumbele lyangu lyoonse.’ Andime oobu mbondilimvwa ciindi nondityompedwe, cakuti cilandiyumina kulibona munzila iili kabotu. Pele alimwi ndilaamvwisya majwi aa Davida aali mukapango 10 aakuti: ‘Kondipa kuba amoyo uusalala, O Leza, alimwi kobikka muuya mupya, uukkalikene mulindime.’ Andime nenzila njondibelesya kutegwa Leza andigwasye kulibona munzila iili kabotu. Camamanino, kapango 17 kalanduumbulizya, nokati: ‘Moyo uuside alimwi uutyompedwe, O Leza, tokaukaki pe.’ Kapango aaka kandikulwaizya kubona kuti Leza ulandiyanda.

“Kwiinda mukubikkila maano kuzikozyanyo zyamu Bbaibbele alimwi akuzintu Leza nzyaandicitila lino, cilandigwasya kuyumya bulangizi bwangu bwakumbele. Zisyomezyo zyamu Bbaibbele zilisinizyide kulindime alimwi eeci cindipa kuliyumya.”