4 | Bbaibbele Lilapa Lulayo Lugwasya

Bupanduluzi

Nokuba kuti Bbaibbele talili bbuku lyaamba zyabusilisi, lilapa lulayo lugwasya. Lulayo oolu lulakonzya kumugwasya muntu uujisi bulwazi bwamumizeezo. Amulange-lange zikozyanyo zimwi.

Mbocikonzya Kutugwasya Eeci

“Bantu bataciswi tabayandiki musilisi, pele aabo baciswa mbabayandika musilisi.”​—MATAYO 9:12.

Bbaibbele lilaamba kuti inga twayandika busilisi. Bantu banji ibaciswa bulwazi bwamumizeezo bagwasyigwa kwiinda mukwiiya makani aaluzi aajatikizya penzi lyabo alimwi akwiinda mukuunka kuli badokota.

‘Kunyanyaasya mubili kulagwasya.’​—1 TIMOTEYO 4:8.

Tweelede kucita zintu zikonzya kupa kuti mubili wesu kauli kabotu. Zintu eezyo zibikkilizya kunyanyaasya mubili lyoonse, kulya zyakulya zijisi busani alimwi akuba aciindi cinji cakoona.

“Moyo uukkomene musamu mubotu uuponya, pele kupengana mumizeezo kupa kuti muntu amaninwe nguzu.”​—TUSIMPI 17:22.

Kubala zibalo zikulwaizya zyamu Bbaibbele alimwi akulibikkila mbaakani nzyomukonzya kuzuzikizya kulakonzya kumugwasya kulimvwa kabotu. Ikuti mwabikkila maano kuzintu zibotu mubuumi alimwi akuba alusyomo lwakuti zintu ziyoobota kumbele, eeci ciyoomugwasya kuliyumya kupenzi lyanu.

“Aabo balibombya mbabajisi busongo.”​—TUSIMPI 11:2.

Zimwi ziindi inga tiimwacikonzya kulicitila zintu zyoonse nzyomuyanda, aboobo cakulibombya amulutambule lugwasyo lwabamwi. Banamukwasyi alimwi abalongwe inga kabayanda kumugwasya, pele tabazyi ncobakonzya kucita. Amubazyibye ncomuyanda kuti bamucitile. Pele tamweelede kulangila kuti inga bamucitila zyoonse nzyomuyanda, alimwi amubalumbe kuli zyeezyo nzyobamucitila.

Lulayo Lwamu Bbaibbele Mbolubagwasya Aabo Bajisi Bulwazi Bwamumizeezo

“Kuli mbondatakali kulimvwa kabotu, aboobo ndakaunka kuli badokota. Bakandaambila penzi ndyondakajisi. Eeci cakandigwasya kubumvwisya bulwazi bwangu alimwi akuzyiba misamu yakali kukonzya kundisilika.”—Ba Nicole,a ibaciswa bulwazi bwakutasitikila mumizeezo.

“Ndakabona kuti kubala Bbaibbele lyoonse abakaintu bangu kulandigwasya kuba amizeezo iiyaka nonditalika buzuba. Alimwi kanji-kanji ciindi bulwazi bwangu nobwandijata, kapango kamwi inga kalanduumbulizya.”—Ba Peter, ibaciswa bulwazi bwakutyompwa.

“Cakali kukatazya kwaambila bamwi kujatikizya bulwazi bwangu akaambo kakuti ndakali kumvwa nsoni. Pele mweenzuma wakali kundiswiilila alimwi caluzyalo wakasola kumvwisya mbondakali kulimvwa. Wakandigwasya kulimvwa kabotu alimwi akuzyiba kuti tiindakali ndelikke pe.”—Ba Ji-yoo, ibaciswa bulwazi bujatikizya makani aakulya.

“Bbaibbele lyandigwasya kuzilanga kabotu zintu, kujana ciindi cinji cakulyookezya, alimwi akutaciindizya kubeleka. Busongo bwandilyo bwandigwasya kuliyumya kupenzi ndyondijisi.”—Ba Timothy, ibaliyumya kubulwazi bwakulibilika akuyeeya zintu zitali kabotu.