Kwaambilizya Zina lya Jehova Katukkomene

Mumyaka minji ciindi mulimo wesu nowakalesyedwe, cabusongo bakwesu mu Indonesia bakatobela lulayo lwa Jesu lwakuti “amube bantu bacenjede mbuli nzoka, pele ibatajisi lweeno mbubonya mbuli nziba.” (Mt. 10:16) Nokuba boobo, mulimo wesu nowakazumizyigwa, banji bakali kuyandika kwiiya mbobakonzya kukambauka “cabusicamba.”—Mil. 4:31.

Mucikozyanyo, bakwesu bamwi bakali kuyoowa kukambauka kuŋanda aŋanda, bakali kubikkila buyo maano kukucita nyendo zyakupilukila alimwi akusololela ziiyo zya Bbaibbele. Bamwi bakali kuyoowa kukambaukila ba Mozilemu. Muciindi cakwaamba kuti Mbaakamboni ba Jehova, ibanji bakali kulizyibya kuti Mbanakristo, alimwi bakali kubelesya ma Bbaibbele aa Bunakristo Bwanyika muciindi cakubelesya Bbaibbele lya Busanduluzi Bwanyika Mpyaa lyaci Indonesian. Bambi tiibakali kulikwaya kwaabila mabbuku eesu aapandulula zyamu Bbaibbele.

Bantu bamwi bakazumanana kucita zintu zimwi akati kazyeezyi noliba leelyo mulimo wesu nowakazumizyigwa. Cimwi icakali kubapa kucita boobo nzilengwa zyacisi mbuli kufwida mumoyo muciindi cakwaamba bwini muntu mbwalimvwide, ibayanda kuzuminizya buyo muciindi cakukazyanya. Ino mbuti bakwesu mbobakali kunga balulamikwa?

Jehova wakapa bwiinguzi kwiinda mululayo ilwakapegwa mubuteteete abakwesu basimide kumuuya. (Ef. 4:11, 12) Mucikozyanyo, mu 2010, mukwesu Stephen Lett wamu Kabunga Keendelezya iwakali kuswaya wakakulwaizya bakwesu kusumpula zina lya Leza kwiinda mukulibelesya cakwaanguluka Bbaibbele lya Busanduluzi Bwanyika Mpya mumulimo wakukambauka. Bamisyinali ba Misja Beerens baamba kuti: “Makani aakapegwa a Mukwesu Lett akabanjila mumoyo basikumwaya banji. Bakalimvwida mbocakali kuyandika kulizyibya kuti Mbaakamboni ba Jehova alimwi akwiiminina Jwi lya Leza kabakkomene.”

Akaambo kakuti bunji bwaziindi ba Mozilemu baku Indonesia babona Bakamboni ba Jehova kuti bazulilwa mu Bunakristo Bwanyika, Mulimo Wesu wa Bwami wamuci Indonesian wakapa malailile aagwasya aakuti: “Kulizyibya cakutainda mumbali kuti muli umwi wa Bakamboni ba Jehova kumatalikilo aamubandi wanu kanji-kanji ninzila iigwasya. . . . Tulikkomene kuba bantu baiminina Jehova, alimwi tuyanda kuzyibya bantu ibali mucilawo cesu izina lyakwe amakanze ngajisi!” Mukwesu Shinsuke Kawamoto, uubelekela kuofesi yamutabi mu Indonesia, waamba kuti: “Kubelesya nzila eeyi iigaminide pele yabupampu kulagwasya kapati. Ba Mozilemu banji balayanda kuzyiba zinji kujatikizya Bakamboni ba Jehova. Bayanda kuzyiba icitupa kwiindana abamwi. Luyandisisyo lwabo lutupa coolwe cakupa bumboni.”

Basikumwaya alimwi bakakulwaizyigwa kuyungizya mweelwe ngobamwaya wamamagazini aa Ngazi Yamulindizi alimwi a Sinsimuka! Sicuuno wa Kkomiti Yamutabi, Mukwesu Lothar Mihank upandulula kuti: “Kutegwa bantu batuzyibe, bayandika kwaabala mamagazini eesu. Mamagazini abombya myoyo yabantu akubakulwaizya kuba aluyandisisyo lwakutambula kasimpe. Notwaamwaya koonse-koonse, tupa bantu banji coolwe cakwiiya kujatikizya Jehova.”

Bukambausi Bwakubuleya Bwagwasya Bantu Banji

Mu 2013, ofesi yamutabi ya Indonesia yakatalisya nzila zyabukambausi zipya zyobilo izyakazumizyigwa aba Kabunga Keendelezya: bukambausi bwaalubazu bwakukambauka kubuleya mumadolopo mapati alimwi abukambausi bwakukambauka kubuleya bwakumbungano. Nzila eezyi izikkomanisya zipa kuti bantu banji mu Indonesia babe acoolwe cakumvwa makani mabotu.

Tebulu lyakusaanguna akati kamatebulu aabelesyegwa mubukambausi bwakukambauka kubuleya mumadolopo mapati lyakabikkwa kubusena bupati bwazintoolo imusambalwa zintu zyamalaiti mbuli makkompyuta, mawailesi azimwi zili boobu ku West Jakarta. Mpoonya mbungano azyalo zyakatalika kubikka twakubikkila mabbuku twakukuba alimwi amatebulu aamubukambausi bwakubuleya muzilawo zyanzizyo. Mumwaka buyo omwe, matebulu alimwi atwakubikkila mabbuku twakukuba twiinda ku 400 twakali kubelesyegwa mubukambausi bwakubuleya mumadolopo manji aamu Indonesia. Ino mbubotu nzi ibwazwa mukucita mulimo ooyu?

Mukwesu Yusak Unipaita, imwaalu mu Jakarta waamba kuti: “Katutanatalika bukambausi bwakubuleya, mbungano yesu yakali kooda mamagazini aali 1,200 amwezi. Nokwakainda myezi iili cisambomwe, twakatalika kooda mamagazini aali 6,000 amwezi. Lino tooda mamagazini aali 8,000 amwezi. Alimwi twaabila mabbuku amabroshuwa manji.” Mu Medan, ku North Sumatra, kabunga kasyoonto kabapainiya kakabikka twakubikkila mabbuku twakukuba mumasena otatwe. Mumwezi wakusaanguna, bakaabila mabbuku aali 115 alimwi amamagazini aatandila ku 1,800. Mumyezi yobilo yakatobela, bapainiya batandila ku 60 mumasena aali ciloba bakaabila mabbuku aainda ku 1,200 amamagazini aainda ku 12,400. Bamisyinali ba Jesse Clark baamba kuti: “Eezyi nzila zipya zyakukambauka zilabakkomanisya bakwesu alimwi zitondezya mbobalangilwa kuvwula bantu ibakatambula kasimpe mu Indonesia. Lino bukambausi bwakubuleya tabucili cintu ceenzu pe!”

Kubelesya Musyobo Uubasika Amoyo Bantu

Cisi ca Indonesia cili akati kazisi zyamunyika izibelesya misyobo minji kapati.b Nokuba kuti banji babelesya mwaambo waci Indonesian, uuli ngomwaambo uubelesyegwa mucisi coonse, kuli bantu banji alimwi ibaambaula cisyobo cabo—nkokuti, musyobo uubasika amoyo.

Mu 2012, ofesi yamutabi yakabweza ntaamu yakusola kubona ziyandika mucilawo eeci icijisi misyobo minji kapati. Ba Tom Van Leemputten baamba kuti: “Aboobo, twakasaanguna kusandulula mabbuku mumisyobo yamucisi iili 12 iyaambaulwa abantu batandila ku 120 miliyoni. Ciindi basanduluzi besu baci Javanese nobakabona katulakiti ikakasaanguna kusandululwa muci Javanese, bakalila akaambo buyo kakukkomana. Inzya lino bakaba acakulya cakumuuya mucisyobo cabo!”

Nokuba boobo, mbungano zinji zyakazumanana kubelesya mwaambo waci Indonesian lyamiswaangano, nomuba mumasena oomo bunji bwabantu mobabelesya cisyobo cabo. Ba Lothar Mihank balayeeya ategwa: “Mu 2013, mebo abakaintu bangu ba Carmen twakajanika kumuswaangano wamazuba obilo kunsumbu iitegwa Nias Island ku North Sumatra. Bunji bwabantu ibakajanika ibali 400 bakali kwaambaula ci Nias, pele makani oonse akapegwa muci Indonesian. Nindakamana kubuzya-buzya baambi bamwi twakaambila bantu boonse ibakaliko kuti buzuba butobela imakani oonse akali kuyakwaambwa muci Nias. Buzuba bwakatobela, ibantu bainda ku 600 bakazula mubusena bwakukkalila.” Ba Carmen bayungizya kuti: “Cakalibonya antangalala kuti lino bakali kubikkila maano kapati kupulogilamu yamuci Nias kwiinda mubuzuba bwakusaanguna eelyo makani naakali kwaambwa muci Indonesian. Bakakkomana kapati kuumvwa alimwi akuumvwisya cakumaninina mulumbe wamu Bbaibbele mucisyobo cabo.”

Nobaba bantu basinkematwi bamu Indonesia lino balakonzya “kukamvwa” kasimpe mumwaambo wabo. Kuzwa mu  2010, kabunga kabasanduluzi bamwaambo wakutambaika uutegwa Indonesian Sign Language, kakasandulula mabroshuwa aali ciloba alimwi amatulakiti aali lusele mumwaambo wakutambaika waku Indonesia. Kuyungizya waawo, ofesi yamutabi yakabikka bubambe bwakuba amakkilasi aakwiiya mwaambo wakutambaika aali 24 aayo aayiisya basikutambaika ibainda ku  750. Sunu, mbungano izibelesya mwaambo wakutambaika izili 23 alimwi atubunga zilabaumbulizya alimwi akubapa lugwasyo lwakumuuya basinkematwi ibabalilwa kumamiliyoni otatwe ibakkala mucisi ca Indonesia.

Cino ciindi, Dipatimenti ya Basanduluzi ijisi tubunga twabasanduluzi mumyaambo iili 37. Kuli basanduluzi ibali 117 alimwi abasikugwasyilizya ibali 50 ibabelekela mumasena aali 19 mucisi coonse ca Indonesia.