INDONESIA
Ofesi Yamutabi Iili Mumulengalenga
Maofesi aali amudadaada wamujulu wanamba 31
Mu 2008, cisi ca Indonesia cakaba amweelwe waatala mupya wabasikumwaya ibasika ku 21,699. Kwakacinyina busena aaofesi yamutabi. Alimwi akaambo kakuti yakayakidwe ciindi mulimo wesu nowakalesyedwe, yakali mubusena ibwakali kulamfwu. Cakalisalede kuti kwakali kuyandika ofesi yamutabi mpati munsi-munsi adolopo lya Jakarta.
Nokwakainda myaka yobilo, bakwesu bakaula busena bwakaindene kapati aofesi yakali kubelesyegwa musyule; bakaula mudadaada woonse wanamba 31 wamayake aamaofesi aayakidwe kubelesya nzila zyamazuba aano, aajisi midadaada iili 42 kuya mujulu aali munsi-munsi abusena butegwa central Jakarta. Mpoonya bakwesu bakaula midadaada iili 12 mumayake aali munsi-munsi aajisi maanda aakukkala kutegwa kamukkala bakwesu abacizyi ibabelekela ku Bbeteli ibali 80 naa kwiinda waawo. Alimwi bakaula mayake aajisi midadaada yosanwe kuya mujulu imwakabikkwa madipatimenti aalanganya ziyandika bamukwasyi wa Bbeteli aategwa Bethel Home departments.
Maanda mobakkala bamukwasyi wa Bbeteli ali mumidadaada yamujulu iili 12
Kabunga kababelesi basikuyaka ibazwa muzisi ziindene-indene bakaboola kuzyikubelekela antoomwe abayaki bamucisi ibakalembedwe mulimo kuti babambulule maofesi alimwi amaanda aakukkala. Mulangizi wamayake, mukwesu Darren Berg waamba kuti: “Jehova wakatugwasya cakwiinduluka-induluka mumapenzi aakali kulibonya mbuli kuti taakonzyeki pe. Mucikozyanyo, twakali kuyanda kuyaka busena bwamazuba aano bwakusalazyila meenda aabelesyedwe kale, pele balupati-pati bamucilawo bakaukaka muzeezo ooyu akaambo kakuti tiibakaningacibwene cili boobu. Mpoonya mukwesu umwi munyenzi syaazibwene mukubamba zintu wakatola makani aaya kumupati wabalupati-pati aaba. Mwaalumi ooyo cakutasowa ciindi wakatuzumizya kuti tuzumanane amayake eesu, kaamba kuti ulamusyoma kapati mukwesu ooyu.”
“Tatuciyubi pe. Lino bantu balibazyi Bakamboni ba Jehova. Tatucili beenzu kulimbabo pe”
Ofesi yamutabi mpya yakaabwa mu February 14, 2015. Mukwesu Anthony Morris III wamu Kabunga Keendelezya nguwakapa makani aakwaaba. Mukwesu Vincent Witanto Ipikkusuma, wamu Kkomiti Yamutabi waamba kuti: “Lino tuli mubusena bubotu kapati alimwi tuli akati kamakkampani aalemekwa kapati mu Indonesia. Tatuciyubi pe. Lino bantu balibazyi Bakamboni ba Jehova. Tatucili beenzu kulimbabo pe.”
Kkomiti Yamutabi, kuzwa kulumwensyi kuya kululyo: Ba Budi Sentosa Lim, Ba Vincent Witanto Ipikkusuma, Ba Lothar Mihank, Ba Hideyuki Motoi
“Ncinono Kaka Kukambauka Okuno!”
Mumyaka yalino-lino, mweelwe wa Bakamboni bazwa munyika yoonse mboizulwa ibalongela ku Indonesia wakomena. Ba Lothar Mihank bapandulula kuti: “Bakwesu abacizyi ibabelekela kumasena kubulide bacita mulimo mupati muzisi zili mbuli cisi cesu. Baletelezya luzyibo, citondezyo cibotu cakusima kumuuya acabusungu mumbungano mobabede, alimwi bagwasya bakwesu kubuzyiba kabotu akubukkomanina bunyina bwesu bwanyika yoonse.” Ino ncinzi cakabakulwaizya kulonga? Alimwi ino zintu zyabeendela buti? Amulange-lange nzyobaamba.
Ibabelekela Kubusena Kubulide
1. Ba Janine aba Dan Moore
2. Ba Mandy aba Stuart Williams
3. Ba Casey aba Jason Gibbs
4. Ba Mari (kumbele kululyo) aba Takahiro Akiyama (kusyule kululyo)
Ba Jason aba Casey Gibbs ibazwa ku United States baamba kuti: “Muzisi zinji izilembedwe mu Bbuku Lyaamwaka, twakalanga-langa mweelwe wabantu sikumwaya omwe mbayelede kukambaukila, mpoonya twakajana kuti cisi ca Indonesia cili akati kamasi munyika oomo sikumwaya omwe mwayelede kukambaukila bantu banji kapati. Mpoonya beenzuma bamwi ibakabelekela kubusena kubulide bakatwaambila kuti bantu banji mucisi ca Indonesia balayanda kapati kwiiya kasimpe. Aboobo twakatuma fooni kuofesi yamutabi yaku Indonesia, eelyo bakatwaambila kuti tuunke ku Bali. Mbungano izibelesya Chingisi zyakazwide aakutalisyigwa mucisi ca Indonesia, aboobo twakali kukonzya kutalika kugwasyilizya ndeenya-ndeenya. Twakakanzide kuyookkala buyo mwaka omwe, pele lino twakkwanya myaka yotatwe. Bunji bwabantu mbotukambaukila tababazyi Bakamboni ba Jehova. Eelo kaka cilakkomanisya kukambaukila kuno!”
Ba Stuart aba Mandy Williams, banabukwetene bazwa ku Australia ibajisi myaka iili akati ka 40 a 60 baamba kuti: “Twakali kuyanda kukambaukila bantu bajisi nyota yakasimpe, aboobo twakasala kulongela ku Indonesia. Mu Malang, ku East Java, twajana myaanda-myaanda yabasicikolo baayunivesiti ibaambaula Chingisi alimwi ibayandisisya kumvwa makani mabotu. Alimwi baliiyandide kapati webbusaiti yesu ya jw.org! Eelo tuuliboteli kaka mulimo wakukambauka kubusena oobu!”
Ba Takahiro aba Mari Akiyama, ibapainiya ku Yogyakarta, munsumbu ya Java baluula kuti: “Okuno tuliliibide kwiinda notwakali kwesu ku Japan. Bantu balilomene alimwi balaabulemu. Bantu banji, kwaambisya bakubusi balayanda kuzyiba zinji kujatikizya zikombelo zimbi. Buzuba bumwi notwakali kubelekela aatebulu lyabukambausi bwakubuleya, twakaabila mamagazini aabalilwa ku 2,600 mumawoola osanwe buyo.”
Ba Dan aba Janine Moore, banabukwetene ibajisi myaka iitandila kuma 60 bapandulula kuti: “Ciindi notukambauka, bantu banji balatubunganina. Tulabamwetela, eelyo abalo balatumwetela. Balaamibuzyo minji, balayandisisya kuzyiba, alimwi balakkomana kumvwa bwiinguzi. Ciindi notubatondezya bwiinguzi bwamu Bbaibbele, bamwi baamba kuti, ‘Kamulindila ndilembe kaambo aako!’ Balagambwa kubona busongo bujanika mu Bbaibbele. Mwaka wakkwana lino katuli kokuno, pele cabija buyo kuti twakamuka kuboola. Twakali kuyanda cilawo bantu banji nkobatanamvwide makani mabotu, alimwi buya twakacijana!”
Ba Misja aba Kristina Beerens bakaboola kabali bamisyinali mu 2009, alimwi lino bali mumulimo wamubbazu. Baamba kuti: “Nomuba munsumbu iitegwa Madura Island mu East Java, busena ibuli akati kamasena ibunji bwabantu mobali ba Mozilemu mucisi ca Indonesia, bantu banji balaukkomanina kapati mulimo wesu wakukambauka. Bantu balaima amyoota kuti balombe mamagazini. Baamba kuti: ‘Ndili mu Mozilemu, pele ndilanonezyegwa kubala mamagazini aaya. Sena inga mwandipa aambi kuti ndikape beenzuma?’ Ncinono kaka kukambauka okuno!”
Myuunda Yatuba Kale Kuti Itebulwe
Mu 1931, ciindi mukwesu Frank Rice naakasika ku Jakarta, mucisi ca Indonesia mwakali bantu babalilwa ku 60,000,000. Mweelwe wabantu ibali mucisi sunu utandila ku 260,000,000, aboobo cisi ca Indonesia ncisi cane mumulongo wazisi zijisi bantu banji kapati munyika.
Awalo mweelwe wa Bakamboni ba Jehova mucisi ca Indonesia wakomena kapati. Mu 1946, kwakajanika basikumwaya basyomeka ibali kkumi aabo ibakaliyumya mumapenzi aamu Nkondo Yanyika Yabili. Sunu, mucisi ca Indonesia muli basikumwaya ibainda ku 26,000—icipa bumboni bwakuti Jehova wauleleka mulimo! Alimwi mbwaanga bantu ibakajanika ku Ciibalusyo mu 2015 bakali 55,864 eeci citondezya kuti mweelwe wabasikumwaya ulalangilwa kukomena kwiinda mpoubede lino.
Jesu wakaamba kuti: “Masimpe, mulimo wakutebula mupati, pele babelesi mbasyoonto. Aboobo, amulombe Simalelo wabutebuzi kuti atume babelesi mumulimo wakwe wakutebula.” (Mt. 9:37, 38) Babelesi ba Jehova mucisi ca Indonesia abalo balaazuminizya majwi aaya. Balikanzide kuzumanana kubeleka canguzu kutegwa mucisi eeci cansumbu bagwasyilizye kusalazya zina lya Jehova lilemekwa.—Is. 24:15.