INDONESIA
Jehova Wakatulongezya Munzila Njotwatakali Kuyeeyela!
Ba Angeragō Hia
NOBAKAZYALWA 1957
NOBAKABBAPATIZYIGWA 1997
BUUMI BWABO MUBUFWAAFWI Bakajokela kumunzi okwabo uuli kulamfwu adolopo kunsumbu iitegwa Nias Island akutalisya mbungano.
MU 2013, mbungano yesu nsyoonto mu Tugala Oyo yakamvwa makani aakkomanisya kapati aakuti twakali kuyooyakilwa Ŋanda ya Bwami! Balupati-pati bamumfwulumende kubusena oobu bakaakkomanina makani aamayake, alimwi basimukoboma ibali 60 bakasaina pepa lyakuzuminizya kuti inga kwayakwa Ŋanda ya Bwami. Simukoboma umwi wakatwaambila kuti, “Ikuti naa muyanda bantu bakusaina ibali 200, nkobali mulabajana.”
Basikulisungula bobilo bacibwene mukuyaka Maanda aa Bwami bakaboola kuzyikweendelezya mulimo wakuyaka Ŋanda ya Bwami, eeyo yakamana kuyakwa mu November 2014. Kunyina notwakali kuyeeyela kuti mbungano yesu inga yaba abusena bubotu boobu bwakukombela. Masimpe, Jehova wakatulongezya munzila njotwatakali kuyeeyela!