Sena Bbala Lyakuti Puligatoliyo Lilajanika mu Bbaibbele?

Bwiinguzi bwamu Bbaibbele

Peepe, talijaniki. Mu Bbaibbele kunyina aambidwe bbala “lyapuligatoliyo” alimwi kunyina mpolyaamba kuti myuuya yabafwide ilasalazyigwa mubusena oobu.a Amulange-lange ncolyaamba Bbaibbele kujatikizya cibi alufwu alimwi amboziteendelani anjiisyo yapuligatoliyo.

Kusyoma mubulowa bwa Jesu nkokukonzya kusalazya muntu kuzibi zyakwe, kutali kuba mubusena bwamyuuya butegwa puligatoliyo. Ibbaibbele lyaamba kuti ‘bulowa bwa Jesu Mwana wa Leza bulatusalazya kuzibi zyoonse’ alimwi akuti ‘Jesu Kristo wakatwaangununa kuzibi zyesu kwiinda mubulowa bwakwe mwini.’ (1 Johane 1:7; Ciyubunuzyo 1:5) Jesu ‘wakapa buumi bwakwe kuti bube cinunuzyo cakununuzya banji’ kubbadela zibi zyabo.—Matayo 20:28.
Bafwide kunyina ncobazyi. “Baumi balizyi kuti bayoofwa, pele bafwide tabazyi cintu nociba comwe.” (Mukambausi 9:5) Muntu uufwide takonzyi kumvwa cintu cili coonse aboobo takonzyi kusalazyigwa amulilo wamu puligatoliyo.
Muntu uufwide tasubulwi akaambo kazibi zyakwe. Ibbaibbele lyaamba kuti “cakuvwola cacibi ndufwu” alimwi akuti “muntu ooyo iwafwa waangununwa kucibi cakwe.” (Baroma 6:7, 23) Lufwu ncecisubulo cikkwene cacibi.

Ino njiisyo yapuligatoliyo yakazwa kuli?

Ba Giriki bakaindi bakali kusyoma munjiisyo ya Limbo naa puligatoliyo. Kwiinda mukukulwaizyigwa anjiisyo yaba Giriki, syaazibwene wazina lya Titus Flavius Clemens wakatalika kusyoma kuti bafwide balakonzya kusalazyigwa zibi zyabo kubelesya mulilo. Aboobo, kweelana ancolyaamba bbuku lyakuti The History of Christian Doctrines, Paapa Mupati wazina lya Gregory wakakankaizya kuti njiisyo yapuligatoliyo tayeelede kuzumbauzyigwa. Eeli bbuku lilayungizya kwaamba kuti ooyu Gregory, iwakali paapa kuzwa mu 590 kusikila mu 604 C.E., “waambwa kuti ngowakatalisya njiisyo yapuligatoliyo.’” Bamu Cikombelo Cakatolika bakaipandulula njiisyo eeyi lyamuswaangano wa Lyons mu 1274 alimwi awa Filorence mu 1439, mpoonya bakaizumina amuswaangano wa Council of Trent mu 1546.

a Kujatikizya bbala lyapuligatoliyo, ibbuku lyakuti Orpheus: A General History of Religions lyaamba kuti “kunyina mpolyaambidwe mu Mabbuku Aamakani Mabotu.” Mbubwenya buyo, alyalo bbuku lyakuti New Catholic Encyclopedia lyaamba kuti: “Kweelana abuvwuntauzi, eeyi njiisyo yaba Katolika yapuligatoliyo iyeeme atunsiya-nsiya buyo, alimwi taili yamu Magwalo Aasalala.”—Kweelana a Second Edition, Volume 11, peeji 825.

b Amubone bbuku lyakuti New Catholic Encyclopedia, Second Edition, Volume 11, peeji 824.