Miswaangano Yambungano Iicitwa Kwiinda Mukukwabana Avidiyo

Mfwulumende zinji nyika yoonse zyakabikka mulawo wakutantamuka alimwi akwiimika miswaangano yoonse yakubuleya. Bakamboni ba Jehova balikanzide kwiitobela milawo eeyi alimwi akuzumanana kukomba munzila iili kabotu. Kutegwa bacite oobo, mbungano zilacita miswaangano kwiinda mukukwabana avidiyo kubelesya ma aapu mbuli Zoom.

Kutegwa miswaangano yesu kaicitwa munzila iili kabotu, bamu Kabunga Keendelezya bakazumizya kuti kubelesyegwe mali aakasangwa kubbadelela maakkaunti aa Zoom kutegwa mbungano kazibelesya. Eeci cagwasya kapati kwaambisya kumbungano izitakonzyi kubbadelela akkaunti yalo iili kuma $15-$20, nkokuti kuma K270-K360 naa kwiinda aawo. Mbungano eezyi zyali kubelesya ma aapu aatabbadelelwi alo aazumizya buyo bantu bali mbobabede alimwi aatakwabilidwe. Zyoonse mbungano zibelesya maakkaunti aa Zoom aambunga yesu zilagwasyigwa akaambo kakuti maakkaunti aaya alikwabilidwe alimwi bantu banji balakonzya kunjila amuswaangano umwi aumwi. Kusikila sunu, mbungano ziinda ku 65,000 muzisi ziinda ku 170 zibelesya maakkaunti aaya.

Mbungano ya Kairagi, ku Manado, North Sulawesi, Indonesia, yakacileka kubelesya app iitabbadelelwi akutalika kubelesya akkaunti ya Zoom yambunga. Mukwesu Hadi Santoso wakaamba kuti: “Nobaba bakwesu abacizyi batacizyi kubelesya tuncini lino balikkomene kuswaangana, akaambo kakuti tabeelede kunjila ziindi zinji amuswaangano omwe.”

Ba Lester Jijón, Jr., mwaalu mumbungano ya Guayacanes Oeste ku Guayaquil, Ecuador, wakaamba boobu: “Akaambo kakuti bakwesu abacizyi banji tabajisi mali, imbungano zimwi nozyatakacikonzya kubbadelela akkaunti ya Zoom, yalo iipa kuti bantu boonse mumbungano kabajanika kumiswaangano. Lino, akaambo kaakkaunti ya Zoom njotupedwe, tulakonzya kutamba abamwi kumiswaangano kakunyina kulibilika kuti bantu balavwulisya.”

Ba Johnson Mwanza, mwaalu mumbungano ya Ngwerere North ku Lusaka, Zambia, wakalemba boobu: “Bakwesu abacizyi banji baamba boobu cakwiinduluka-induluka, ‘bubambe bwambunga bwa Zoom butupa kulimvwa kuba munsi-munsi abakwesu alimwi akulimvwa kuti Jehova ulatuyanda akutubikkila maano.’”

Maakkaunti aaya aambunga akaulwa kwiinda mukubelesya mali aakambilwa kugwasyilizya ciindi nokwacitika ntenda. Mali aaya azwa kuzyakusanga zyakuliyandila kugwasyilizya mulimo wanyika yoonse. Ibunji bwazyakusanga eezyi zilasangwa kwiinda mukubelesya donate.jw.org. Tulamulumba kapati akaambo kazyakusanga zyanu zizwa ansi aamoyo, alimwi izigwasyilizya nokwacitika ntenda munyika yoonse.—2 Bakorinto 8:14.