Zintu Ziindilide Zyazulizya Kubulizya Kwabamwi

Bakamboni ba Jehova babeleka mulimo uuyandika kapati kugwasya bantu muzisi ziinda ku 200. Pele zisi zibalilwa ku 35 buyo akati kazisi eezyo nzyezikonzya kulibbadelela ziyandika. Ino aabo bali muzisi zitavwubide baajana buti mali ngobabelesya?

Bamu Kabunga Keendezya balalanga-langa nzyobayandika Bakamboni ba Jehova nyika yoonse, kutegwa bakombe Jehova alimwi akukambauka makani mabotu. Mali alabelesyegwa munzila iiluzi. Aboobo, ikuti mutabi watambula mali manji kwiinda ali yaayo aayandika mumilimo yamucisi eeco, ulapa aayiindilila kuzisi zijisi mali masyoonto. Bubambe oobu bulacitwa kutobela cikozyanyo ca Banakristo bakusaanguna, ibakali kugwasyanya “kutegwa kube kweelana.” (2 Bakorinto 8:14) Bakabelesya ziindilide kutegwa bazulizye kubulizya kwa Banakristo bambi bakajisi zisyoonto.

Ino bakwesu ibakatambula mali aayindilide kuzwa kumitabi iimbi balimvwa buti? Mucikozyanyo, ku Tanzania, kwalo cisela camweelwe wabantu nkobaponena amali aatasiki ku K40 abuzuba, mali ngobakatambula akabelesyegwa kubambulula Ŋanda ya Bwami iibelesyegwa ambungano ya Mafinga. Aboobo basimbungano bakalemba kuti: “Kuzwa noyakabambululwa Ŋanda ya Bwami, mweelwe wakayungizyika cakufwaambana! Tulamulumba kapati Jehova akaambo kambunga yakwe alimwi abunyina bwanyika yoonse kubwaabi bwabo, bwalo bwapa kuti katukkomana abusena oobu bubotu bwakukombela.”

Bakwesu bamwi ku Sri Lanka bamaninwa zyakulya akaambo kabulwazi bwa COVID-19. Ba Imara Fernando amwanaabo musankwa Enosh, bali akati kabaabo bakamaninwa zyakulya. Pele bakatambula lugwasyo luyandika kuzwa kuzisi zimbi. Mukakkaadi ngobakalipangila, bakalemba kuti: “Tulabalumba bakwesu ibakatondezya luyando muciindi eeci cikatazya. Tulikkomene ncobeni kuba cibeela camukwasyi ooyu, alimwi tulazumanana kupaila kuti Jehova abagwasye bakwesu boonse mumazuba aaya aamamanino.”

Kufwumbwa nkobakkala bakwesu abacizyi, balakulwaizyigwa kupa bamwi nzyobajisi. Mucikozyanyo, Enosh wakapanga kabbokesi kasyoonto kakuyobweda mali, kutegwa awalo kakonzya kusanga kugwasyilizya mikwasyi iibulide. Ba Guadalupe Álvarez abalo balatondezya muuya nguwenya ooyu. Bakkala kubusena bumwi ku Mexico kwalo kuli bantu basyoonto babeleka. Nokuba boobo balasanga kweelana ambobakonzya. Bakalemba kuti: “Ndilamulumba kapati Jehova akaambo kabubotu bwakwe alimwi aluyando lwakwe lutamani. Ndilizyi kuti zyakusanga zyangu ziyoosanganizigwa azyabamwi alimwi ziyoobagwasya bakwesu babulide.”

Maofesi aamitabi aatuma mali kumasena kuyandika lugwasyo, alakkomana kucita oobo. Ba Anthony Carvalho, ibabelekela mu Kkomiti Yamutabi waku Brazil bakaamba kuti: “Kwamyaka minji, mulimo mucisi cesu walikugwasyilizyigwa azyakusanga zizwa kuzisi zimbi. Akaambo kalugwasyo oolu, mulimo wesu wayaambele kapati. Lino zintu zyacinca, aboobo tujisi coolwe cakugwasya bamwi. Bakwesu baku Brazil babona mulimo wakukambauka nyika yoonse akubona ncobakonzya kucita kutegwa bagwasye.”

Ino mbuti Bakamboni ba Jehova mbobakonzya kugwasya ibanyina babulide munzila iinda kubota? Nkwiinda mukusanga kugwasyilizya mulimo wanyika yoonse, kutali kutuma mali kumutabi uugaminide wakucisi cimbi. Eeci cilakonzya kucitika kwiinda mukubelesya kabbokesi kakusangila kumbungano kalembedwe kuti “Mulimo Wanyika Yoonse” naa kubelesya donate.jw.org. Zyakusanga zyoonse eezyi zilalumbwa kapati.