Zicitwa Nokupangwa Mavidiyo Aakuti Makani Mabotu Aamba Zyamulimo wa Jesu

Mwaka uuno, cintu cimwi ncobali kulangila kapati Bakamboni ba Jehova nkumwaigwa kwa Vidiyo 1 ya Makani Mabotu Aamba Zyamulimo wa Jesu. Mamiliyoni aabantu bakayeebelela kale. Alimwi njakusaanguna akati kamavidiyo aali 18! Ino mulimo nzi bakwesu alimwi abacizyi ngobacita kutegwa mavidiyo aaya apangwe, alimwi ncinzi ncomwacita kutegwa mubagwasyilizye?

Kulanganya Basikusobana Atiimu Yabasikukkopa

Kumutabi waku Australasia, kwalo bunji bwamavidiyo aa Makani Mabotu nkwaakkopelwa, inga kuli bantu babalilwa ku 50 naa ku 80 ciindi nokukkopwa cibeela cimwi acimwi cavidiyo.a Inga balapegwa cakulya camasyikati, kumazuba, atulyo tumbi buyo. Zyakulya zyabo inga zilabambwa kakucili ciindi. Ba Esther ibabelekela mu Dipatimenti Iilanganya Zyakulya bakaamba kuti: “Tulaula zyakulya kubasambazi baindene-indene kutegwa tujane izili kabotu alimwi aamuulo uuli kabotu. Alimwi ciindi aciindi tulacinca-cinca zyakulya nzyotuula kutegwa zitanoonyonyooki.” Abuzuba, tulabelesya mali aabalilwa ku 4 dola, kuula zyakulya zyamuntu umwi aumwi.

Basikusobana atiimu yabasikukkopa tabayandiki buyo zyakulya pe, pele balayandika alukwabililo. Ino kubakwabilila kuzwa kunzi? Ku Australia kanji-kanji kulapya alimwi zuba lilabala kapati, kunze lyaboobo kulaba amitungazuba mibyaabi. Kutegwa babakwabilile kuzuba alimwi akuti batanookatali akaambo kakupya, bakwesu abacizyi inga babikka matente mumasena akulyookezyela, alimwi baba masimpe kuti kuli mafwuta aakwabilila cikanda kuti citapyi azuba, maambulela alimwi ameenda. Ba Kevin, ibabeleka aba Audio/Video Services, bakaamba kuti: “Bunji bwabakwesu ibali mukugwasyilizya kupanga mavidiyo aaya mbabelesi baa Beteli beenda buya. Balaubeleka mulimo ooyu amilimo iimwi buyo cakulicesya alimwi acalukkomano. Inga tiitwacikonzya kwiicita milimo eeyi kakunyina kugwasyigwa ambabo.”

Kukkopa Mavidiyo Mumasena Aaindene-indene

Zibeela zimwi zyamavidiyo inga tiizyalibonya kabotu ikuti naa zyakkopelwa aofesi yamutabi naa musitudiyo. Ikuti caba boobo, zibeela eezyo inga zikkopelwa mumasena aaindene-indene. Kutegwa kukkopwe zibeela zitondezya masena aakaindi aambidwe mu Bbaibbele kwalo kwakanyina ntambo zyamalaiti, migwagwa iili kabotu alimwi amaanda aamazuba aano, basikusobana alimwi atiimu yabasikukkopa kanji-kanji beelede kuunka mumasena aakulamfwu kapati. Zisani zyabasikusobana alimwi azintu zimbi zyakubelesya zilapakiŋwa, kutolwa, alimwi akuyobolwa abusena aakkopelwa mavidiyo. Kabatanatalika kukkopa, basikugwasyilizya mukulanganya mboweenda mulimo baba masimpe kuti majenaleta, meenda mabotu aakunywa alimwi azimbuzi nkozili abusena aawo. Basikusobana alimwi atiimu iikkopa bakkala mumaanda aabakwesu basamausya, mutwaanda tukonzya kulonzyegwa, alimwi amumahotela.

Masena aakukkopela alakonzya kudula, kumanina ciindi, akubapa kukatala aabo bajatikizyidwe. Aboobo, mu 2023, bamu Kabunga Keendelezya bakazumizya kuti kuulwe masikkilini aakubwaanda aa 2.5-miliyoni dola, alo aapa kuti ciindi muntu nakkopwa alibonye mbuli kuti uli kubusena bumbi buyo. Masikkilini aaya, abelesya musyobo waatala wamavidiyo uulibonya kabotu, alimwi ajisi mumuni uulibonya mbuli kuti vidiyo ikkopelwa anze. Akaambo kaceeci, lino tatucivwuli kubelesya masena aadula kapati aakukkopela mavidiyo. Mukwesu Darren, wamu Kkomiti Yamutabi waku Australasia, wakaamba kuti: “Kukkopa mavidiyo kubelesya masikkilini aakubwaanda kupa kuti basikusobana kabatakatali alimwi akuti basikukkopa kabakkopa zibeela zimwi cakwiinduluka-induluka kweelana ambobayanda. Mucikozyanyo, ikuti katukkopela aanze, twakajisi buyo maminiti masyoonto aakukkopa zuba kalitanamaninina kubbila. Pele kwiinda mukubelesya sikkilini yakubwaanda, tulakonzya kukkopa zuba nolibbila asikkilini kwaziindi zinji kweelana ambotuyanda kusikila mane twakkutila aceeco ncotwakkopa.”

“Mbuli Kuti Tiikwakali Kulyaaba Buya”

Basikusobana banji alimwi abasikupanga mavidiyo balayandika kuvidiyo imwi aimwi ya Makani Mabotu. Ino balimvwa buti kujatikizya mulimo ngobacita bakwesu abacizyi baa Beteli wakubalanganya?

Ba Amber, ibakeenda musinzo uulampa makkilomita aainda ku 700 kuzwa kwabo ku Melbourne kutegwa batole lubazu mupulojekiti eeyi, bakalemba kuti: “Kuzwa nondakaseluka kubbuwa lyandeke, bakwesu baku Beteli bakandilanganya kabotu. Bunji bwabo bakali kunditamba kucakulya naa kunywa tii. Kubusena bwakukkopela mavidiyo, bakwesu bakali kundipa kulimvwa kulikwaya alimwi akuyandwa. Ndakatambula zilongezyo zinji mulweendo oolu. Mbuli kuti tiikwakali kulyaaba buya!”

Ba Derek ibabeleka atiimu iipanga mavidiyo, bakaamba kuti: “Madipatimenti manji alimukutugwasyilizya kuzwa ciindi mulimo ooyu nowakatalika. Ndilabalumba kapati bakwesu abacizyi ibaaba ciindi cabo, mali alimwi anguzu zyabo kugwasyilizya mulimo ooyu. Balilyaabide, balilisungwiide alimwi balaaluzyalo. Cakutadooneka Jehova ulimukubalongezya kubikkilizya andiswe. Ndilisinizyide kuti tabikkili buyo maano kububotu buzwa kumulimo ngotubeleka pele alimwi ulabikkila maano amboubelekwa.”

Tulamulumba kapati akaambo kakuugwasyilizya mulimo wakupanga mavidiyo kwiinda muzyakusanga zyanu, kubikkilizya azyeezyo zicitwa kubelesya donate.jw.org.