Kufwambaana Kusika

Nkaambo nzi ncociyandika kufwambaana kusika?

KAAMBO NCOCIYANDIKA

Ibamwi bajana kuti ikusika kucipangano ciindi kaciciliko kupa kuti batanoolibiliki. Alimwi kufwambaana kusika kulakonzya kubotya mpuwo yamuntu. Munzila nzi?

Kufwambaana kusika citondezya kuti muzicita kabotu zintu. Kusika muciindi ceelede, citondezya kuti mulazyeendelezya zintu mubuumi alimwi tamuzumizyi bukkale kumukasya kucita zintu nzyomuyanda.

Kufwambaana kusika kupa kuti bamwi kabamusyoma. Mumasena bantu mobatabikkili maano kuzuzikizya zipangano, bantu balabakkomanina aabo bazuzikizya nzyobasyomezya. Bantu basyomeka balalemekwa abalongwe alimwi abanamukwasyi. Basikulemba milimo balabayanda aabo bafwambaana kusika kumilimo alimwi akuzuzikizya mbaakani. Babelesi basyomeka balakonzya kulumbulwa kwiinda mukupegwa mali manji alimwi akusyomwa kumilimo.

NCOLYAAMBA BBAIBBELE

Kuli zibalo mu Magwalo izyaamba kujatikizya kufwambaana. Mucikozyanyo, Bbaibbele lyaamba kuti: “Pele zintu zyoonse azicitwe kabotu-kabotu alimwi kweelana abubambe.” (1 Bakorinto 14:40) Ikuti naa bantu bobilo bapangana kuti baswaangane abusena bumwi alimwi aciindi cigaminide, cili kabotu alimwi cilayandika kufwambaana kusika. Alimwi Bbaibbele lyaamba kuti: “Zintu zyoonse zilijisi ciindi canzizyo, ciindi cazintu zyoonse zicitika aano aanyika.” (Mukambausi 3:1) Kapango katobela kaamba kuti kuli “ciindi cakusyanga aciindi cakuzyula.” (Mukambausi 3:2) Balimi balasyanga zisyango muciindi ceelede, kutegwa babe abutebuzi buli kabotu. Mumajwi aamwi inga twaamba kuti akaambo kakuti mulimi ulafwambaana kusyanga, ulaba abutebuzi buli kabotu.

Bbaibbele lilayubununa akambi kaambo ncotweelede kufwambaana kusika: Citondezya kuti tulabalemeka bamwi alimwi aciindi ncobajisi. (Bafilipi 2:3, 4) Mukwiimpana, aabo bayanda kulindilwa coonse ciindi babbida bamwi ciindi.

“Mutabikkili buyo maano kuzintu nzyomuyanda nywebo zilikke, pele akuzintu nzyobayanda bamwi.”—Bafilipi 2:4.

Ncinzi ncomukonzya kucita kutegwa kamufwambaana kusika?

NCOLYAAMBA BBAIBBELE

Bbaibbele litukulwaizya kulibambilila limwi. (Tusimpi 21:5) Ikuti lyoonse mujana kuti mulamuka kuzipangano, nkokuti ambweni zintu nzyomucita zinji kapati. Aboobo, mweelede kuzileka zimwi izitayandiki kapati alimwi izikonzya kumusowela ciindi. Amulibikkile ciindi cinji cakuunka kucipangano alimwi amube amakanze aakusika ciindi kaciciliko. Kucita boobo kulakonzya kumugwasya ikuti naa kwaba zintu zinyonganya, mbuli kuvwula kwamyoota naa tiikwaca kabotu.

Bbaibbele alimwi likulwaizya kulibombya. (Tusimpi 11:2) Eeci caamba kuzyiba mpomugolela. Kamutanazumina, amuzyibile limwi kuti cipangano naa mbaakani eeyo muyookonzya kwiizuzikizya. Kuzumina naa kuyanda kucita zintu zinji kwiinda nzyomukonzya kucita kupa kutyompwa—lwanu kumugama alimwi abamwi!

Bbaibbele alimwi litwaambila kucibelesya kabotu ciindi ncotujisi. (Baefeso 5:15, 16) Amusaangune kucita zintu ziyandika kapati. (Bafilipi 1:10) Mucikozyanyo, ciindi nomuli mulweendo kubelesya mootokala yabuleya naa kulindila bamwi, mulakonzya kubelesya ciindi eeco kubala naa kulibambila nzyomuyanda kucita buzuba oobo.

“Makanze aabankutwe masimpe apa kuzwidilila.”—Tusimpi 21:5.