Amube Aciyanza Cakufwambaana Kusika
1. Ino ncikonzyanyo nzi Jehova ncapa kujatikizya kubamba ciindi?
1 Lyoonse Jehova ulacita zintu aciindi ceelede. Mucikozyanyo, ‘ulabagwasya aciindi ceelede’ babelesi bakwe. (Heb. 4:16) Alimwi ulapa cakulya cakumuuya “aciindi ceelede.” (Mt. 24:45) Aboobo tulakonzya kuba masimpe kuti buzuba bwabukali bwakwe buboola ‘tabukooyoocedelelwa pe.’ (Hab. 2:3) Eelo kaka tulagwasyigwa akaambo kakuti Jehova ulabamba ciindi! (Int. 70:5) Mbwaanga tuli bantu batalondokede alimwi bajisi zinji zyakucita, kubamba ciindi cilakonzya kutukatazya. Nkaambo nzi ncotweelede kuba aciyanza cakufwambaana kusika?
2. Nkaambo nzi kufwambaana kusika ncokupa kuti Jehova alemekwe?
2 Kubamba ciindi ncintu ncobatabikkili maano bantu banji mazuba aano aamamanino ciindi bantu nobali basikuliyanda alimwi ibatalilesyi. (2 Ti. 3:1-3) Aboobo ciindi Banakristo nobafwambaana kusika kumilimo yabo, kuzipangano, alimwi akumiswaangano, bamwi balabona, eeci cipa kuti Jehova alemekwe. (2 Pe. 2:12) Sena mulimo wesu wakumubili tulautalika aciindi ceelede, pele tujana kuti kanji-kanji tulamuka kusika kumiswaangano ya Bunakristo? Kufwambaana kusika kumiswaangano ya Bunakristo, alimwi akujanika nolwiimbwa lwiimbo lwakujalula alimwi amupailo wakujalula noupegwa, citondezya kuti tulayandisisya kwiiya Taatesu wakujulu uucita zintu kweelana abubambe.—1 Ko. 14:33, 40.
3. Nkaambo nzi kufwambaana kusika ncocitondezya kuti tulababikkila maano bamwi?
3 Kufwambaana kusika citondezya kuti tulababikkila maanu bamwi. (Flp. 2:3, 4) Mucikozyanyo, ciindi notufwambaana kusika kumiswaangano ya Bunakristo, kubikkilizya amuswaangano wakulibambila kuya mumulimo wamumuunda, cipa kuti tutanyonganyi bakombima. Kulubazu lumwi, ikuti katuli aacilengwa cakumuka, cipa bamwi kubona kuti tubikkila kapati maano kuzintu nzyotucita kwiinda zyabo. Kufwambaana kusika citondezya kuti tulasyomeka alimwi akuti tuli basungu—Bantu balabotelwa abube buli boobu.
4. Ikuti naa kanji-kanji tulamuka, ino mbuti mbotukonzya kucinca?
4 Ikuti naa kanji-kanji mulamuka, amuzinzibale kuyeeya icimupa kumuka. Amulibambile kabotu kwiinda mukupanga mulongo uukonzya kumupa kumanizya kucita zintu aciindi ceelede. (Muk. 3:1; Flp. 1:10) Amumulombe Jehova kutegwa amugwasye. (1 Jo. 5:14) Kufwambaana kusika ninzila yomwe yakutondezya kuti tulalumba kujatikizya milawo mipati yobilo, nkokuti kuyanda Leza alimwi asimukoboma.—Mt. 22:37-39.