Amutobele Cikozyanyo Ncaakatondezya Jesu
1. Ino ncikozyanyo nzi Jesu ncaakatondezya?
1 Notutola lubazu mumulimo wakugwasya bantu kuba basikwiiya, tweelede kwiibaluka kuti cikozyanyo cesu cilakonzya kubajatikizya kapati aabo batulangilila. Jesu wakayiisya kwiinda mumajwi azintu nzyaakali kucita. Aabo bakali kumulangilila bakali kukonzya kubona busungu bwakwe, luyando ndwaakajisi kubantu, kuyandisya kusalazya zina lya Bausyi amakanze ngaakajisi aakuzuzikizya luyando lwa Bausyi.—1 Pet. 2:21.
2. Muunzila nzi cikozyanyo cesu mocikonzya kubajatikizya aabo mbotubeleka limwi mumulimo?
2 Notuli Mumulimo Wakuŋanda Aŋanda: Kweelana ambocakabede kuli Jesu, cikozyanyo cesu cilabajatikizya aabo mbotubeleka limwi. Basikumwaya bapya alimwi abaabo batajisi luzibo lunji nobatubona notutola lubazu mumulimo cabusungu, bayooyeeya nzila nzyobabelesya mukutola lubazu mumulimo wakukambauka. Nobabona lukkomano ndotujisi alimwi akubikkila maanu kwini-kwini nkotucita kubantu bamwi, bayoobona mbociyandika kutondezya bube oobu mumulimo wabo wakukambauka. Nobabona bupampu mbotujisi notubelesya Magwalo, notupilukila anotweendelezya ziiyo zya Bbaibbele, abalo bayookulwaizigwa kucita mbubwenya oobo.
3. Ino mbuti cikozyanyo cesu mbocikonzya kubagwasya basikwiiya Bbaibbele, alimwi ino ncinzi ncobakonzya kwiiya?
3 Notweendelezya Ziiyo zya Bbaibbele: Aabo mbotwiiya limwi Bbaibbele bayoobona bukkale bwesu. Mucikozyanyo, nokuba kuti tulakonzya kubapandulwida mbociyandika kulibambila ciiyo, kulanga-langa magwalo alimwi akweengela twaambo tupati-pati, bayoobona naa tulilibambilide naa pe. (Rom. 2:21) Ikuti katusika aciindi cakwiiya ncotwakamvwana ambabo, kunyina milimo iimbi iiyoobanyonganya kuti batabi aciiyo cabo ca Bbaibbele. Alimwi bayoobona mbotulisungwide mukuba bantu balyaabide kumulimo alimwi amboluli luyumu lusyomo lwesu. Tacigambyi kuti basikwiiya Bbaibbele babaabo batobela cikozyanyo ca Jesu kanji-kanji baba bakambausi basungu alimwi bacibwene.
4. Notujanika kumiswaangano yambungano, ino ncinzi bantu bamwi ncobaiya kwiinda mucikozyanyo cesu?
4 Notujanika Kumiswaangano Yambungano: Boonse aabo bali mumbungano ya Bunakristo bajisi mulimo wakuyiisya kwiinda mukuba acikozyanyo cibotu kumiswaangano yambungano. Bantu bajisi luyandisisyo batalika kujanika kumiswaangano balagwasyigwa acikozyanyo cibotu ncobabona mumbungano. Bayoobona bulongwe bwabunyina, lukamantano lwa Bunakristo alimwi akusama cabulemu akulibamba. (Int. 133:1) Cikozyanyo cesu cakujanika lyoonse kumiswaangano yambungano alimwi akwaamba zijatikizya lusyomo lwesu notuli kumiswaangano akwalo kuyoobonwa. Umwi mweenzu naakajanika amuswaangano wesu umwi wakabona kamwi kana kasimbi mbokakacikonzya kujana lugwalo cakufwambaana mu Bbaibbele lyankako ambokakali kutobelezya nolwakali kubalwa. Cikozyanyo cakasimbi aaka cakapa kuti mweenzu ooyu alombe kuba aciiyo ca Bbaibbele.
5. Ino nkaambo nzi ncotweelede kubikkila maanu kucikozyanyo cesu?
5 Magwalo atukulwaizya kwiiya cikozyano cibotu caumwi aumwi. (Flp. 3:17; Heb. 13:7) Aboobo, tweelede kuyeeya kuti ikuti naa twacitobela kabotu-kabotu cikozyanyo ncaakatondezya Jesu, ciyoobonwa abantu bamwi alimwi cilakonzya kubakulwaizya munzila iigwasya. Akaambo kamakani aaya, atwaabikkile maanu majwi aajanika kulugwalo lwa 1 Timoteo 4:16 aakuti: “Alimwi kolibonena omwini akufundisya kwako.”