Kufwambaana Kusika Kutondezya Kuti Tulabikkila Maano
1. Ino ncinzi cikonzya kucitika ikuti muntu waccelwa kumiswaangano yesu?
1 Sena kuli nomwakamvwide muntu waamba kuti: “Cilainda kugwasya kuccelwa kwiinda kutaunkila limwi,” naa kuti, “nokuba kuti ndilaccelwa kumiswaangano, pesi ndilajanika”? Pele ino ncinzi ncaaindwa muntu ooyu akaambo kakuccelwa kumiswaangano? Andiza waindwa cibeela ciyandika kapati mubukombi bwesu—ikwiimba kukkomanisya. Naa waliimya coolwe cakuba antoomwe ambungano mumupailo wakusaanguna. Bantu baccelwa cilabainda coolwe cakuyumizyanya kucitwa kaitanatalika miswaangano. Alimwi ikuti twaccelwa tulakonzya kunyonganya bakombima akupa kuti baindwe twaambo tumwi tugwasya.—Muk. 3:1; Rom. 1:11, 12.
2, 3. (a) Ino ncinzi cikonzya kupa bamwi kuccelwa? (b) Ino kufwambaana kusika kumiswaangano citondezya nzi?
2 Kufwambaana kusika kumiswaangano ncitondezyo cakuti tulabalemeka akubabikkila maano bakombima. Tuyandika kulibambila kabotu kakucili ciindi. Masimpe, kuli zyintu zimwi zikonzya kupa kuti muntu accelwe kumiswaangano. Ikuti zyeendelo zyamuka naa kufwa, zilakonzya kutucelezya. Nokuba boobo, tatweelede kuba acilengwa cakuccelwa akaambo kakutalibambila muciindi ceelede, kutabikkila maano naa kuccelwa kunyamuka kuŋanda. Tweelede kusolekesya kusika miswaangano kiitanatalika.
3 Bantu bamwi balazumanana kuccelwa akaambo kakuti tabana kububona bubotu bwakufwambaana kusika. Bantu balakonzya kuleka kumuleka muntu uujisi cilengwa cakuccelwa. Mubuti? Bantu banji inga kabamuyeeyela kuti tabikkili maano akuti tabakonzyi kumusyoma mumakani aambi. Kulubazu lumwi, kufwambaana kusika kumiswaangano ninzila imwi yakutondezya kuti tujisi micelo yamuuya wa Jehova.—Gal. 5:22, 23.
4. Ino mbuti baalu abakutausi mbobakonzya kupa citondezyo cibotu mumakani aaya?
4 Eelyo kaka cilakulwaizya ikuti twajana kuti baalu abakutausi basika kale kumiswaangano, kabalindila kututambula amaanza obilo! Eeci citupa kukkomana akaambo kakuba akati ka Banakristoma.—Rom. 15:7.
5. (a) Ino kufwambaana kusika kumiswaangano yambungano akuzisyomezyo zimbi kutondezya nzi kujatikizya ndiswe? (b) Ino nzilongezyo nzi nzyotukonzya kujana akaambo kakufwambaana kusika?
5 Ikuti katufwambaana kusika, bantu bayakutulemeka alimwi akulemeka mbunga njotwiiminina. Inzya, kufwambaana kusika ncitondezyo cakuti tulabikkila maano akuti tucita zyintu munzila iili kabotu. (1 Kor. 14:40) Ikuti bazyali kabajisi cilengwa cakufwambaana kusika, balakonzya kupa citondezyo cibotu kubana babo. Toonse, kubikkilizya abana, tweelede kuba acilengwa cakufwambaana kusika. Munzila eeyi tutobela majwi aa Paulo aakuti: “Swebo tatubiki imfumpu niiba yomwe munzila yamuntu, kuti milimo yesu itasampauki, pele muzintu zyoonse tulatondezya kuti tuli basimilimo benibeni ba-Leza.”—2 Kor 6:3, 4.