Amuzyibe Makani Aamasimpe

Bubi bwa Lusalululo

Lusalululo kanji-kanji inga luyeeme amakani aakubeja. Amubone zikozyanyo zitobela:

• Basikunjizya milimo bamwi bayeeya kuti bamakaintu tabakonzyi kubeleka milimo iiyandika luzyibo lunji, nguzu naa busongo.

• Mu Europe yansiku, ba Juda bakatamikizyigwa kuti bakali kubikka musamu uukola mumigoti alimwi akuyambukizya malwazi. Ciindi cabulelo bwaba Nazi, ba Juda alimwi bakabejelezyegwa. Pele aciindi aawa, bakatamikizyigwa kuti mbobakapa kuti bukkale buyume mu Germany. Akaambo katwaambo ootu tobilo, ba Juda bakatalika kusalululwa kapati, calo icicilibonya amazuba aano.

• Bantu banji bayeeya kuti bantu balema boonse tabakkomene naa balicimidwe akaambo kabukkale bwabo.

Bantu ibasyoma makani aakubeja aali boobu balijisi azikozyanyo izibapa kusalulula. Alimwi bayeeya kuti muntu uuli woonse uukazya mbobayeeya ulazilaika.

Njiisyo Yamu Bbaibbele

“Muntu uutajisi luzyibo tali kabotu pe.”​—TUSIMPI 19:2.

Ino eeci caamba nzi? Kuti katutazyi masimpe, tulakonzya kupanga cakusala citali kabotu. Ikuti twasyoma makani aakubeja muciindi cakusyoma makani aamasimpe, tulakonzya kutalika kusalulula bantu.

Mbocigwasya Kuzyiba Masimpe?

Kuti katuzyi masimpe kujatikizya bantu, tatukonzyi kwaasyoma makani aakubeja ngobakonzya kutwaambila bamwi kujatikizya mbabo. Ciindi notwazyiba kuti makani ngotwakaambilwa kujatikizya kabunga kabantu bamwi ngakubeja, ciyootupa kuti katutafwambaani kusyoma nzyotumvwa kujatikizya tubunga tumbi twabantu.

Ncomukonzya Kucita

• Bantu balakonzya kwaamba kabunga kabantu bamwi kuti kalaabube butali kabotu. Pele kamuyeeya kuti bunji bwabantu bakabunga aako inga kabatabujisi bube oobo.

• Mweelede kuyeeya kuti ambweni muzyi buyo makani masyoonto kujatikizya kabunga kabantu aako.

• Amusole kuzyiba makani aamasimpe kuzwa kubantu basyomeka.