MUNYIKA IIZWIDE MAPENZI

4 | Amubukwabilile Bulangizi Bwanu

IKAAMBO NCOCIYANDIKA

Kulibilika akaambo kamapenzi aali munyika kulakonzya kubajatikizya kapati bantu kumubili alimwi amumizeezo. Banji ibakacitikilwa kale mapenzi aaya balimvwa kuti zintu kunyina nozikonzya kuba kabotu. Ino bacita buti?

Ibamwi tabayandi nokuba kuyeeya zyakumbele.
Ibamwi batalika kubelesya misamu iikola naa kuciindizya kunywa bukoko kutegwa baleke kuyeeya mapenzi ngobajisi.
Ibamwi basyoonto balimvwa kuti inga cainda kubota kulijaya buyo. Balalibuzya kuti “Nkaambo nzi ncotweelede kuzumanana kupona?”

Ncomweelede Kuzyiba

Mapenzi aamwi ngomukonzya kujana inga ngakaindi kasyoonto buyo alimwi alakonzya kumana cakutayeeyela.
Nokuba kuti mapenzi aanu taamana, kuli zintu zimwi nzyomukonzya kucita izikonzya kumugwasya kuliyumya.
Bbaibbele lisyomezya kuti mapenzi oonse ngobajisi bantu ayoomana.

Ncomukonzya Kucita Lino

Bbaibbele lyaamba kuti: “Mutanoolibiliki zyabuzuba butobela, nkaambo buzuba butobela bunoojisi zyakulibilika zyambubo. Buzuba bumwi abumwi bulijisi mapenzi aambubo aakkwene.”—Matayo 6:34.

Amubikkile buyo maano kuzintu zyabuzuba bumwi abumwi. Mutanoolibiliki kapati kujatikizya zintu zyakumbele cakuti mwaalilwa kucita zintu nzyomweelede kucita buzuba oobo.

Kulibilika kapati kujatikizya zintu zitali kabotu izikonzya kumucitikila inga kwapa buyo kuti mwiindile kutyompwa alimwi akumupa kubula bulangizi.

MBOMUKONZYA KULIYUMYA—Nzila Zigwasya

AMUBIKKILE MAANO KUZINTU ZIGWASYA

Bbaibbele lyaamba kuti: “Mazuba oonse aamuntu uupengede mabyaabi, pele ooyo uulaamoyo uukkomene ulaapobwe ciindi coonse.” (Tusimpi 15:15) Ikuti mwabikkila maano kapati kupenzi ndyomujisi, mulakonzya kwaalilwa kubona kuti kuli nzila njomukonzya kubelesya kulimana. Mukwiimpana, kuzilanga kabotu zintu kulakonzya kumugwasya kuyeeya nzila nzyomunga mwabelesya mubukkale bwanu.

Mutanoobikkili maano kapati kunyuuzi.
Kumamanino aabuzuba bumwi abumwi, amuyeeye zintu zyobilo naa zyotatwe nzyomulumba kapati.
Amulembe zintu nzyomweelede kucita mubuzuba oobo. Amuyaapaule milimo mipati-pati kutegwa mucikonzye kubona mbomwabeleka canguzu kumamanino aabuzuba.

AMULOMBE LUGWASYO

Bbaibbele lyaamba kuti: “Kufwumbwa muntu uulizandula . . . ulabukaka busongo boonse bugwasya.” (Tusimpi 18:1) Basikale bakati, simweendaalikke kakamutola kalonga. Aboobo kuti mwalomba lugwasyo kuli bamwi, mulakonzya kuzwidilila.

Amulombe lugwasyo kubalongwe naa banamukwasyi.
Mpoonya andinywe amuyandaule nzila yakubagwasya. Kujana ciindi cakucitila bamwi zintu zibotu kuyoomugwasya kwaalanga munzila yeelede mapenzi ngomujisi.
Ikuti naa tamucijisi bulangizi bwakuti zintu ziyooba kabotu kumbele alimwi mulimvwa kuti tacigwasyi kuzumanana kupona, amulombe lugwasyo kucibbadela. Zimwi ziindi kulimvwa kutyompwa kapati, ncitondezyo cakuciswa bulwazi bumwi. Bantu banji bagwasyigwa kwiinda mukusilikwa kucibbadela.a

a Sinsimuka! taitubikkili mulawo kujatikizya nzila zyabusilisi.

Bbaibbele Lilapa Bulangizi Bwini-bwini

Sintembauzyo umwi wakaamba boobu naakali kupaila kuli Leza: “Ijwi lyako ndilambe kumaulu aangu, alimwi mumuni uumunikila nzila yangu.” (Intembauzyo 119:105) Amubone Jwi lya Leza Bbaibbele mbolili boobo:

Masiku, lambe lilatugwasya kubona mpotweelede kulyata. Mbubwenya buyo, Bbaibbele lilijisi busongo bukonzya kutugwasya ciindi notuyanda kupanga cakusala cikatazya kapati.

Mumuni ulakonzya kutugwasya kubona zintu zili kumbele. Mbubwenya buyo, Bbaibbele lilakonzya kutugwasya kubona kuti kumbele kuli bulangizi bwakuti zintu ziyooba kabotu.