Cibalo 33
Ikuzuzikizya Businsimi bwa Isaya
AZIKUZIBE Jesu kuti ba Farisi abasinkamu ya Heroda bakanza kumujaya, walo abasikwiiya bakwe bazwa akuunka ku Lwizi lwa Galilaya. Oku makamu-makamu aabantu banji kuzwa mucisi ca Palestine coonse alimwi akuzwa kunze aminyinza bayoboloka kuza kulinguwe. Waponya bantu banji elyo capa kuti boonse balaa malwazi mapati batonkane kuti bamugume.
Akaambo kakukomena kwankamu, Jesu waambila basikwiiya bakwe kuti bajane bwato bwakuti abelesye. Kwiinda mukusosoloka kuzwa kunkomwe inga walesya makamu kutonkana kuti basike nkwabede. Ulakonzya kubaiyiisya kali mubwato naa kuunka kubusena bumbi kuccilizya nkomwe kuyakuyiisya bambi bantu oko.
Sikwiiya Matayo wabona kuti mulimo wa Jesu wazuzikizya “aakaambwa kumusinsimi Isaya.” Mpoonya Matayo wazubulula businsimi mbwazuzikizya Jesu ategwa:
“Ngooyu Mwanaangu ngundasala, muyandwi wangu, ngunkondelwa moyo wangu. Nzoobika Muuya wangu mulinguwe, akaambile masi lubeta. Takakazyanyi, takoongololi, taakwe muntu uuzoomvwa ijwi lyakwe mumigwagwa. Itete lifuyukide takalityoli, kamuni kasuka takakazimyi, mane akazundye lubeta. Nkabela bamasi bazoosyoma muzina lyakwe.”
Aino Jesu mmubelesi wa Leza uuyandwa walo ngwakondelwa. Alimwi Jesu wabusalazya bululami bwini-bwini bwalo businkililwa azilengwa zyabukombi bwakubeja. Akaambo kakutobela mulawo wa Leza munzila iitaluleme, iba Farisi tabakonzya akugwasya muntu uuciswa pe mubuzuba bwa Sabata! Kwiinda mukusalazya bululami bwa Leza, Jesu waubulula bantu kuzwa kumikuli yazilengwa zitaluleme elyo akaambo kaboobo, basololi bacikombelo bayanda kumujaya.
Ino caamba nzi kuti ‘takakazyanyi naa koongolola kutegwa jwi lyakwe limvwigwe mumigwagwa’? Jesu nasilika bantu, ‘ulabaambila kuti bataambili bantu makani ayo.’ Tayandi kwiile kwaambilizigwa cakusabila mumigwagwa naa bantu kabayaabulwiidana kujatikizya nguwe cakubikkilizya atwakulipungila.
Alimwi Jesu ujisi mulumbe wakwe uumbulizya kubantu bali mbuli matete aafuyukide, aawide akulyataulwa. Bali mbuli kamuni kalo kalaa mumuni wamamanino uuyanda kumanina limwi buya. Jesu tatyoli tete lifuyukide naa kuzima kamuni kasuka. Pele caluzyalo aluyando ulabanyamuna balulami cabusongo. Masimpe, Jesu ngonguwe masi oonse ngwaanga asyoma! Matayo 12:15-21; Marko 3:7-12; Isaya 42:1-4.
▪ Jesu wabusalazya buti bululami kakutakwe kukazyanya akoongolola jwi lyakwe mumugwagwa?
▪ Mbaani bali mbuli tete lifuyukide a kamuni alimwi Jesu ubalanganya buti?