Cibalo 61
Mulombe Uunjidwe Waponesyegwa
JESU, Petro, Jakobo alimwi a Johane kabatanajoka, ambweni kabacili ku Cilundu ca Herimoni, basikwiiya bamwi banjila mumapenzi. Ucijoka buyo, Jesu ndilyonya waziba kuti kuli calubila. Kuli nkamu iibungilide basikwiiya bakwe alimwi balembi balakazyanya ambabo. Nobamubona Jesu bantu, bagambwa kapati elyo bazuza kuyoomwaanzya. Wabuzya ategwa, “Ino ncinzi ncimuombolozyanya ambabo?”
Umwi mwaalumi kuzwa munkamu waboola kuli Jesu akupandulula kuti: “Mufundisi, ndakaliletede kulinduwe mwanaangu uunjidwe daimona uutaambi. Koonse nkwaamujana ulamuwaala ansi, elyo ulayovula igovu, akuluma ntwino, alimwi wakotela. Ndakalibaambilide basikwiiya bako kuti bamutande, pele bakazundwa.”
Ibalembi balibonya kuti bacikkomamina kapati nkobaalilwa kuponya mulombe oyu basikwiiya, ambweni kabafwubaazya kusoleka kwabo. Aciindi nciconya eci cikatazya, Jesu wasika. Ulaamba: “Akaka, nywebo nobasyaasunu batasyomi! Ino nciindi congae ncenti kale kulindinywe? nciindi congae ncenti kamukazikile moyo?”
Jesu uboneka kuti majwi aakwe aya waambila bantu boonse baliko, pele kakunyina kudooneka waagamikide kapati kubalembi ibali kupenzya basikwiiya bakwe. Mpoonya Jesu ulaamba kujatikizya mulombe oyo ategwa: “Amumulete kulindime.” Pele mulombe nacizaabuza kuli Jesu, daimona uumunjide wamuwisya ansi akumusuntula. Imulombe oyu watalika kwaalabana ansi akuzwa kkovwu kumulomo.
Jesu wabuzya ategwa: “Ino cakamutalika lili eci?”
Bausyi baingula ategwa: “Kubwanike. Kanjikanji cilamuwisizya mumulimo amumaanzi kuti cimunyonyoone.” Mpoonya bausyi bakombelezya ategwa: “Kuti kokonzya, tufwide luzyalo, utugwasye.”
Ambweni kumana kwamyaka bausyi balikuyandaula lugwasyo. Lino mbubaalilwa basikwiiya ba Jesu, batyompwa kapati. Ikaambo nkaamba mwaalumi cakukombelezya, Jesu kamunjila, aboobo waamba cakukulwaizya ategwa: “Wanookonzya buti? Zintu zyoonse zilakonzeka kuliyooyo uusyoma.”
“Ndasyoma!” mbwaamba usyi mwana mpoonya-mpoonya pele walomba kuti: “Gwasya kutasyoma kwangu.”
Naabona kuti bantu bazabuzuzaana kuli mbabo, Jesu wakalalila daimona kuti: “Yebo odaimona uutaambi uutamvwi, ndakulailila kuti, Zwa mulinguwe, utacimunjili limbi.” Daimona naazwa wapa kuti mulombe akwiile akumuzengemya kapati. Mpoonya mulombe walangika mbuli kuti ulifwide mane bantu banji batalika kwaamba kuti: “Wafwa.” Pele Jesu wajata mulombe kukwaanza elyo wabuka.
Musyule, basikwiiya nobakatumidwe kuyookambauka bakali kutanda badaimona. Aboobo lino nobanjila muŋanda babuzya Jesu kumbali ategwa: “Ino swebo twakacilwa buti kugwisya muuya mubi kuzwa mumulombe?” (BT)
Katondezya kuti nkaambo kakubula lusyomo, Jesu waingula ategwa: “Oyu musyobo taakwe bumbi mbuutandwa pele kukukomba luzutu.” Kulibonya kuti kulibambila kwakali kuyandika kutegwa batande daimona oyu mubyaabi. Lusyomo lwini-lwini antoomwe amupailo wakulomba kugwasya kwa Leza kwakali kuyandika.
Mpoonya Jesu wayungizya ategwa: “Ncobeni ndamwaambila kuti, kuti kamujisi lusyomo luli mbuli nseke yamasitadi, mulakonzya kwaambila cilundu eeci kuti, ‘Zyuka aawa uyookuya’ nkabela cilainka ncobeni. Taakwe cikonzya kumwaalila pe.” (BT) Lusyomo lulaanguzu kaka!
Izisinkilizyo abuyumuyumu ibusinkilila kuyaambele mumulimo wa Jehova zilakonzya kuboneka kuti nziyumu alimwi tazikonzyi kunyanyaasigwa mbubwena mbuli mulundu wini. Pele Jesu utondezya kuti ikuti twabaa lusyomo mumyoyo yesu, ikulwiida akulukulwaizya kuti lukomene, luyoosima alimwi luyootugwasya kukonzya zisinkilizyo amapenzi aali mbuli milundu. Marko 9:14-29; Matayo 17:19, 20; Luka 9:37-43.
▪ Ino Jesu wazijana buti zintu naajoka kuzwa ku Mulundu wa Herimoni?
▪ Nkukulwaizya nzi Jesu nkwaapa bausyi bamulombe uunjidwe daimona?
▪ Nkaambo nzi basikwiiya ncobakakilwa kutanda daimona?
▪ Ino Jesu wazitondezya buti nguzu nzyolunga lwabaanzizyo lusyomo?