Cibalo 68
Ikuyiisya Akumbi Mubuzuba bwa Ciloba
IBUZUBA bwamamanino bwa Pobwe lya Zilawo ibwaciloba buciyaambele. Jesu ulayiisya mucibeela catempele caambwa kuti “ciyobwedo calubono.” Kulibonya kuti muubusena bwiitwa kuti Ŋanda ya Banakazi kwalo kuli ziyobwedo bantu mobabikka kusanga kwabo.
Lyoonse masiku nokuli pobwe, kuli mumuni waalubazu mubusena obu bwatempele. Iziimikilo zyamalampi zipati zyone zilabikkwa omu, acimwi kacijisi mitiba mipati yone iizwide mafwuta. Oyu mumuni kuzwa kumalampi aya, mafwuta aayaka kuzwa kumitiba iili 16, munji kapati cakuti ulamunikila masena aali mumabali-bali amasena aalikulaale masiku. Ncaamba lino Jesu cikonzya kuyeezya baswiilizi bakwe kujatikizya ceeci. Jesu ulaamba: “Ndime mumuni wenyika, uundicilila takooyooenda mumudima, pele uyooba amumuni wabuumi.”
Iba Farisi bakazya ategwa: “Ulalilungulula omwini, bukamboni bwako tabusinizizye.”
Mukwiingula Jesu ulaamba: “Nendililungulula ndemwini, kulungulula kwangu kulisinizizye, nkaambo ndilizi nkwenzwa ankwenja, pele nywebo tamukuzi nkwendakazwa akwenja.” Wayungizya ategwa: “Ndime endililungulula ndemwini, awalo Taata uwakandituma ulandilungulula.”
Iba Farisi bayanda kuziba ategwa: “Ino Uso nguli?”
Jesu waingula ategwa: “Tamundizi mebo naba Taata, kuti nomwali kundizi, nomumuzi Taata awalo.” Nokuba kuti ba Farisi baciyanda kuti Jesu ajatwe, kunyina naba omwe uusola.
Jesu waamba alimwi ategwa: “Ndainka, eno, . . . Oko nkwenja tamukonzya kuza nkuko.”
Bamvwe boobu ba Juda bakankamana ategwa: “Sena alijaye mwini, mbwaamba kuti, Nkwenja tamukonzya kuza nkuko?”
Jesu wapandulula ategwa: “Nywebo muli baansi, mebo ndili wakujulu, nywebo muli benyika ino, mebo nsili wenyika ino pe.” Mpoonya wayungizya ategwa: “Mwatazumina kuti ndime yooyo, muyoofwa muzibi zyanu.”
Aino Jesu waamba kubako kwakwe katanaba muntunsi alimwi akuti ngu Mesiya uusyomezyedwe naa Kristo. Nokuba boobo babuzya, cakutadooneka munzila yalunyansyo ategwa: “Nduweni yebo?”
Mbubamukaka boobo, Jesu waingula ategwa: “Nguwenya oyo ngwendakamwaambila kuzwa kumatalikilo.” Pele wazumanana kwaamba kuti: “Oyo uwakandituma ulisinizizye, ayo ngendakamvwa kulinguwe ngangao ngeŋamba munyika.” Jesu wazumanana ategwa: “Mwaakwaanzika Mwana a-Muntu, nomuti kazibe kuti ndime yooyo, akwalo kuti nsilicitili cintu ndemwini, pele ndaamba aya mbuli mbwandiisya Taata. Eno oyo uwakandituma uli mulindime, tandisiide endike pe, nkaambo ndacita lyoonse zintu izimubotela.”
Jesu naamba zintu ezi, banji bamusyoma. Kuli baaba ulaamba: “Mwajatisya majwi aangu, ncobeni mwaba basikwiiya bangu, alimwi muyooziba bwini, abwalo bwini buyoomunununa.”
Basikumukazya banjilizya kwiingula ategwa: “Swebo tuli bana ba-Abrahamu, tatunavubidwe buzike kumuntu, uamba buti kuti muyoonununwa?”
Nokuba kuti kanjikanji ba Juda balikulelwaa bamuzwakule, tabazumini kuti uubadyaaminina mmwami. Balakaka kubaita kuti mbazike. Pele Jesu waamba kuti mbazike ncobeni. Munzila nzi? Jesu ulaamba ategwa: “Ncobeni ndamwaambila kasimpe, Muntu woonse uucita cibi ngomuzike wacibi.”
Ikukaka kuzumina kuti mbazike kucibi kubikka ba Juda aba muntenda. Jesu wapandulula ategwa: “Muzike takali muŋanda lyoonse, pele mwana nguukala lyoonse.” Mbwaanga muzike tazumizidwe kukona ulakonzya kutandwa kufwumbwa ciindi. Alikke mwana uuzyalwa buya naa uulelwa muŋanda “nguukala lyoonse” nkokwaamba kuti kufwumba kuti kali muumi.
Jesu wazumanana ategwa: “Nkaambo kaako kuti Mwana wamunununa, ncobeni mulaba banunukide.” Aboobo kasimpe kanununa bantu, nkasimpe kajatikizya Mwana, Jesu Kristo. Nkwiinda mukwaabwa kwamubili wakwe wabuntunsi uulondokede ilyalo muntu uuli woonse nanga wanununwa kuzwa kucibi icijaya. Johane 8:12-36.
▪ Nkuli Jesu nkwayiisizya mubuzuba bwaciloba? Ncinzi cicitika masiku nkukona oko, alimwi Jesu wacikozyanisya buti akuyiisya kwakwe?
▪ Ino Jesu waamba buti makani aankwazwa, alimwi eci cikonzya kuyubulula nzi kujatikizya nguwe?
▪ Muunzila nzi ba Juda mobali bazike, pele nkasimpe nzi kayoobanununa?