Cibalo 115

Kwabuka Mazwanga

IMANGOLEZYA ngeenaaya Jesu wayiisya ciiyo cibotu kujatikizya mulimo wakulicesya kwiinda mukusanzya zituta zyabaapostolo bakwe. Kumane waawo watalisya Ciibalusyo calufwu lwakwe lulaafwaafwi. Ikapati akaambo kazintu zyazwaa kucitika, cilagambya icatola busena lino. Ibaapostolo bakwe batalika kukazyanya kuti naa nguni akati kabo uyeeyegwa kuti ngomupati! Aya mazwanga tanaa talikila waawa pe.

Amuyeeye kuti ciindi Jesu naakamana kusanduka amulundu, baapostolo bakakazyanya kuti naa nguni wakali mupati akati kabo. Kunze lyaboobo, Jakobo a Johane bakali kulomba zyuuno zyabulemu mu Bwami calo cakapa kuti kube kuzwangana akati kabaapostolo. Lino mubusiku obu bwamamanino ambabo, Jesu weelede kuti watyompwa kubabona kabazwangana alimwi! Ino ncinzi ncaacita?

Muciindi cakukalalila baapostolo akaambo kakulilemeka kwabo, icakukkalika moyo, Jesu wakkala ansi ambabo alimwi ulaamba: “Bami babamasi balabalela, abo abali abwami kulimbabo baambwa kuti mbasimalelaabo. Pele nywebo mutabi obo, . . . Ino nguuli mupati, oyo uukede akulya na uubelekela? Sena tali nguwe uukede akulya?” Mpoonya kabayeezya citondezyo cakwe, ulaamba: “Kwalo mebo ndili akati kanu mbuli oyo uubelekela.”

Nobatalondokede, ibaapostolo bamwiiminina Jesu mumapenzi aakwe. Aboobo ulaamba: “Mbuli Taata mbwaakandipa nguzu zyabwami, mbubonya oobo ambebo mbwendiyoobamba cizuminano cangu andinywe.” (BT) Eci cizuminano akati ka Jesu abasikumutobela basyomeka cibaswaanganya kulinguwe kuti bakatole lubazu mukulela mubwami bwakwe. Mweelwe musyoonto buyo uuli 144,000 nguubwezegwa mucizuminano ca Bwami.

Nokuba kuti baapostolo bapegwa bulangizi obu bubotu bwakulela aa Kristo mu Bwami, aciindi awa balileengeeni munzila yakumuuya. Jesu ulaamba: “Inywe nyoonse mulalebwa alindime masiku ano.” Pele, kaambila Petro kuti Wamukombela, Jesu wamukulwaizya ategwa: “Eelyo waakupilukila kulindime, ukayumye beenzinyoko.” (BT)

Jesu wapandulula ategwa: “Nobana baniini, kuli ciindi ciniini ncendi anywebo. Muyoondiyandaula, mbuli mbwendakaamba kuba-Juda, oko nkwenja, tamukonzya kuya nkuko, eno ndaamba kulindinywe mbubonya. Ndamupa mulao mupya wakuti, amuyandane umwi amweenzinyina, mbuli mbwendali kumuyanda, anywebo muyandane mbubonya. Kuliceeci bantu boonse bayoomuziba, kuti muli basikwiiya bangu, mwanooyandana umwi amweenzinyina.”

Petro wabuzya ategwa: “Omwami uyai?”

Jesu waingula ategwa: “Oko nkwenja tokonzya kundicilila eno, pele uyoondicilila caba ciindi.”

“Omwami, nkaambonzi ncentakonzya kukucilila neliba eno?” Petro uyanda kuziba. “Ndatuula buumi bwangu nkaambo kako.”

“Sena ulatuula buumi bwako nkaambo kangu?” Jesu wabuzya. “Ncobeni ndakulwiinda kuti, obuno buzuba, ngoonya masiku ano, mukombwe katana kulila kobile, ulanditama kotatwe.”

Petro ulaamba: “Nikuba kuti nkafwe ayebo, nsikooyookutama pe.” Alimwi nokuba kuti baapostolo bamwi bavwiilila kwaamba kaambo nkakonya, Petro walidunda ategwa: “Nikuba kuti bakalebwe boonse kulinduwe, mebo nsikooyoolebwa pe.”

Kaamba ciindi naakatumide baapostolo kuyakukambauka mu Galilaya kabatakwe zikwama ankomo, Jesu wabuzya ategwa: “Sena mwakabula cintu?”

Baingula ategwa: “Pee pe.”

Ulaamba: “Kwalo eno uujisi cikwama acibweze, enkomo mbubonya. Uutajisi iceba, auzye ngubo yakwe, aule iceba. Nkaambo ndamwaambila kuti, Oku ukwakalembwa kuleelede kuzyulila mulindime kwakuti, Wakabalilwa kulibacitazibi. Nkaambo makani aandyaamba azyulila.”

Jesu waamba ciindi nayookankaminwaa bamucitazibi naa basimilandu. Alimwi utondezya kuti kuzwa waawo basikumutobela bayooba amapenzi aakupenzyegwa. Balaamba: “Omwami, langa, ngaaya maceba obile.”

Waingula ategwa: “Mbubo.” Mbuli mbotutibone, ikubaa maceba kulapa kuti Jesu ayiisye cimbi ciiyo ciyandika kapati lino-lino. Matayo 26:31-35; Marko 14:27-31; Luka 22:24-38; Johane 13:31-38; Ciyubunuzyo 14:1-3.

▪ Nkaambo nzi kukazyanya kwabaapostolo ncokugambya?

▪ Ino Jesu wakweendelezya buti kukazyanya oku?

▪ Ncinzi ciyoocitika kwiinda mucizuminano Jesu ncaabamba abasikwiiya bakwe?

▪ Mulawo nzi mupya Jesu ngwaapa, alimwi uyandika buti?

▪ Nkulidunda kuli buti Petro nkwaatondezya, alimwi Jesu waamba buti?

▪ Nkaambo nzi malailile aajatikizya kubweza zikwama alimwi ankomo ncaaindene ayaalya ngaakapede kukusaanguna?