Baapostolo Bakazyanya Kujatikizya Mupati Kwiinda Boonse

Mangolezya aamamanino kuba abaapostolo bakwe, Jesu wabayiisya ciiyo cibotu mumakani aakubelekela bamwi cakulicesya kwiinda mukubasanzya kumaulu. Ino nkaambo nzi ncocali kuyandika ciiyo eeci? Nkaambo kapenzi limwi ndyobajisi. Nokuba kuti balilyaabide kuli Leza, bacilaapenzi lyakukazyanya kuti nguni mupati kwiinda boonse akati kabo. (Marko 9:33, 34; 10:35-37) Penzi eeli lyalibonya alimwi mangolezya aaya.

Baapostolo batalika ‘kuzwangana kapati akati kabo kujatikizya uubonwa kuti ngomupati kwiinda boonse.’ (Luka 22:24) Ncobeni, kweelede kuti Jesu wausa kapati akaambo kakubabona kabakazyanya alimwi! Aboobo, ino watyani?

Muciindi cakubabwentela baapostolo akaambo kambobalilemeka mumakani aaya alimwi ambobazibona zintu, Jesu cakukkazika moyo wabandika ambabo, ulaamba: “Bami bamasi balabadyaaminina bantu, abalo aabo bajisi nguzu zyabweendelezi kubantu baambwa kuti Mbabasimalelo. Nywebo tamweelede kuba boobo. . . . Ino nguni mupati, ooyo uulya kutebulu naa ooyo uubeleka?” Mpoonya ikubayeekezya cikozyanyo ncaali kubatondezya lyoonse, Jesu waamba kuti: “Pele mebo ndime ndibeleka akati kanu.”—Luka 22:25-27.

Nokuba kuti tabalondokede, baapostolo bakakatila kuli Jesu nomuba mubukkale bukatazya bwiindene-indene. Aboobo waamba kuti: “Ndibamba cizuminano cabwami andinywe mbubonya Taata mbwaabamba cizuminano andime.” (Luka 22:29) Baalumi aaba mbaasikutobela Jesu ibasyomeka. Wabasyomezya kuti kwiinda mucizuminano cili akati kanguwe ambabo, bayakuba mu Bwami alimwi akulela anguwe kabali bami.

Nokuba kuti baapostolo bajisi bulangizi oobu bubotu, bacili bantu banyama alimwi ibatalondokede. Jesu wabaambila kuti: “Saatani uyanda kuti amupupulule nywebo nyoonse mbuli wiiti” ooyo uumwaika noupupululwa. (Luka 22:31) Alimwi wabacenjezya kuti: “Nywebo nyoonse mulalebwa masiku aano akaambo kandime, nkaambo kulilembedwe kuti: ‘Ndiyoomuuma mweembezi, eelyo mbelele mutanga ziyoomwaika.’”—Matayo 26:31; Zekariya 13:7.

Cakulisyoma Petro wakazya ulaamba: “Nokuba kuti boonse aaba balebwa akaambo kanduwe, mebo tandikoolebwa pe!” (Matayo 26:33) Jesu waambila Petro kuti mukombwe katanalila ziindi zyobilo masiku aayo, Petro ulamukaka Jesu. Nokuba boobo, Jesu wayungizya kwaamba kuti: “Ndakukombelezyela mumupailo kuti lusyomo lwako lutamani; eelyo wapiluka ayebo ubayumye ibanyoko.” (Luka 22:32) Pele Petro waamba cakusinizya kuti: “Nokuba kuti caamba kufwida antoomwe anduwe, kunyina nenditiikukake pe.” (Matayo 26:35) Abalo baapostolo bambi baamba mbubonya oobu.

Jesu waambila basikwiiya bakwe kuti: “Ndinooli andinywe kwaciindi cisyoonto. Muyoondiyandaula; alimwi mbubonya mbondakaambila ba Juda kuti, ‘Nkondiya tamukonzyi kusika,’ anywebo lino mbondimwaambila mbubonya oobo.” Mpoonya wayungizya kuti: “Ndimupa mulawo mupya, wakuti muyandane; mbubonya mbondali kumuyanda, amuyandane mbubonya anywebo. Eeci nceciyoozyibya bantu boonse kuti muli basikwiiya bangu, ikuti kamujisi luyando akati kanu.”—Johane 13:33-35.

Naamvwa Jesu kaamba kuti unooli aambabo kwaciindi cisyoonto buyo, Petro wabuzya kuti: “O Mwami, ino uunka kuli?” Jesu waingula kuti: “Nkonduunka tokonzyi kunditobela lino, pele uyoonditobela aakale.” Kakopene, Petro waamba kuti: “O Mwami, ino nkaambo nzi nconditakonzyi kukutobela lino? Ndilatuula buumi bwangu akaambo kanduwe.”—Johane 13:36, 37.

Lino Jesu waamba ciindi baapostolo naakabatuma kukambauka mu Galilaya kabatajisi zikwama zyamali naa nkomo zyazyakulya. (Matayo 10:5, 9, 10) Wababuzya kuti: “Sena kuli cintu cili coonse ncomwakabula?” Bamuvwiila kuti: “Peepe!” Pele ino beelede kutyani mumazuba aakumbele? Jesu wabalailila kuti: “Ooyo uujisi cikwama camali acibweze, ncimwi buyo ankomo yacakulya, alimwi ooyo uutajisi panga asambale cisani cakwe caatala akuula panga. Nkaambo ndimwaambila kuti cileelede kuzuzikizyigwa mulindime eeci cilembedwe kuti, ‘Wakabalilwa antoomwe abasikusotoka mulawo.’ Nkaambo eeci cazuzikizyigwa mulindime.”—Luka 22:35-37.

Jesu waamba ciindi nayakugagailwa aacisamu kumbali aabasizibi, naa basikusotoka mulawo. Kuzwa waawo basikumutobela bayakutalika kupenzyegwa citaambiki. Balimvwide kuti balilibambilide, aboobo baamba kuti: “Mwami, bona! Ngaaya mapanga obilo.” Waamba kuti: “Mbubo, manji ngoona aayo.” (Luka 22:38) Lino mbwaanga bajisi mapanga obilo akati kabo, eeci cilamupa coolwe Jesu lino-lino aawa cakuti abayiisye ciiyo acimbi ciyandika.