Bakamboni ba Jehova Mbobalanga Lwiiyo
Bakamboni ba Jehova, abalo balayeeya zyabuumi bwakumbele bwabana babo mbweena mbuli bazyali boonse. Aboobo lwiiyo ncintu ncobalemeka kapati. “Lwiiyo lweelede kugwasya bantu kuti kabayandika mumunzi. Alimwi lweelede kubagwasya kuteelela bukkale bwamumunzi wabo kutegwa kabapona buumi bukkomanisya.”
KWEELANA amakani aaya aakazubululwa mu The World Book Encyclopedia, mulimo mupati wacikolo nkuyiisya bana mbokukkalwa buzuba abuzuba, eeci cilabikkilizya akubatondezya mbobanga balanga mukwasyi kumbele aamazuba. Bakamboni ba Jehova basyoma kuti mulimo oyu wakapegwaa Leza. Ibbaibbele lyaamba kuti: “Na muntu tabambi basazinyina, kwaambisya bamuŋanda yakwe, wati oyo ulisowede lusyomo lwakwe, ulaindilila akuliyooyo uutazumina.” (1 Timoteo 5:8) Imyaka njobakkala mucikolo igwasya bana kuti balibambile milimo iiboola kumbele. Aboobo Bakamboni bayeeya kuti lwiiyo lweelede kubikkila maanu kapati.
“Lwiiyo lweelede kugwasya bantu kuti kabayandika mumunzi. Alimwi lweelede kubagwasya kuteelela bukkale bwamumunzi wabo kutegwa kabapona buumi bukkomanisya.”—The World Book Encyclopedia
Bakamboni balasoleka kutobela lulayo lwa Bbaibbele lwaamba kuti: “Kufumbwa cintu ncimucita, milimo yanu ibe yamoyo woonse, ibe mbuli milimo iicitilwa Mwami, itabi yakubelekela bantu buyo pe.” (Ba-Kolose 3:23) Eeci ciisyo cilabeleka mubukkale boonse bwabuzuba abuzuba kubikkilizya akucikolo. Aboobo Bakamboni balakulwaizya bana babo kubeleka canguzu akubikkila maanu kapati kumilimo njobapegwa kucikolo.
“Kufumbwa cintu ncimucita, milimo yanu ibe yamoyo woonse, ibe mbuli milimo iicitilwa Mwami.”—Ba-Kolose 3:23
Alimwi Bbaibbele liyiisya kuti muntu weelede kutobela milawo ya cisi mwakkala. Elyo mulawo nouyanda kuti boonse bana kabaya kucikolo kusikila baba amyaka imwi yakuzyalwa, Bakamboni ba Jehova balautobela mulawo oyo.—Ba-Roma 13:1-7.
Kulyookezya kubotu, kwiimba, kusobana, aimwi micito iigwasya mubili, kuswaya malaibbulali amamiziamu zyoonse zilagwasya mulwiiyo luzwide
Nokuba kuti Bbaibbele likulwaizya lwiiyo luyandika kuti muntu kapona buzuba-abuzuba, litondezya kuti oyu tauli ngomuzeezo ulikke wa lwiiyo pe. Lwiiyo luzwidilide lweelede alimwi kugwasya bana kubona bubotu bwabuumi akuba bantu balaa ciimo cisitikide mumunzi. Aboobo Bakamboni ba Jehova bayeeya kuti zintu zicitwa aanze aacikolo zilayandika kapati. Basyoma kuti kulyookezya kubotu, kwiimba, kusobana, aimwi micito iigwasya mubili, kuswaya malaibbulali amamiziamu amilimo imbi buyo zilagwasya kapati mulwiiyo luzwide. Kunze lyazeezi bayiisya bana babo kulemeka bapati akuyandaula nzila yakubagwasya.
Ino Mbuti Lwiiyo Lwaambele?
Milimo iyandika iyabucinca akaambo kazintu zipya ziletwa asayansi. Eci caamba kuti bana banji balanjila milimo njobatakaiya. Nkakaambo kaako lwiiyo lwabo lwamulimo akulilemeka kwabo aamulimo zilabagwasya kwiinda, ikapati kuti kabakonzya kwiiya milimo mipya. Aboobo mulembi wa Zyakaindi Montaigne wakaamba kuti cilagwasya kuti basicikolo kabajisi ‘mutwe uubambidwe kabotu kwiinda mutwe uuzwide kabotu.’
Ipenzi lyakubula milimo, ilijanika mumasi aavwubide aaceteede kanji-kanji lijatikizya bana batayiide kabotu. Elyo kuti milimo kiiyanda lwiiyo lwaambele kwiinda loluya luyandika amulawo wacisi, cili kubazyali kugwasya bana babo kusala na kabaciya ambele mulwiiyo, kumwi kabayeeya mpindu zinga zyajanika amapenzi aalangilwa kuletwaa lwiiyo lwaambele olo.
Nokuba boobo tusyoma kuti andinywe mulazumina kuti kuzwidilila mubuumi takuletwi aakuvwuba muzintu zyakumubili kwalo pe. Mazuba aya aainda balombwana abanakazi ibakabikkide myoyo yabo yoonse mumilimo yabo bakagolelwa mizeezo milimo yabo noyakamana. Ibambi bazyali akaambo kamilimo baleka kubikkila maanu kumikwasyi yabo, tabacijisi aciindi cakukkala abana babo, kubagwasya kukomena kabotu.
Elyo calibonya kuti muntu uujisi lwiiyo luzwide ulabona kuti buvwubi bwakunyika bulikke tabukonzyi kutuletela kukkomana kwini pe. Jesu Kristu wakati: “Kulilembedwe kuti, Teensi insima ilike njaaponena muntu, ulaponena amajwi oonse aazwa kumulomo wa-Leza.” (Matayo 4:4) Mbobali Banakristo, Bakamboni ba Jehova balibwene mbocili cipati kuba bantu balilemeka, bazuzikizya zintu ziyandika zyakumuuya alimwi balibambila kuti bakakonzye kulilanga kuzintu zyakumubili.