Ibubambe Bugwasya Ikuba a Luzibo Mbomuli Baambi Abaiyi

KUNYINA makani naa mucili bana antela muli bapati, mwaalumi antela mwanakazi, lwiiyo oolu lulakonzya kumugwasya kunookanana munzila iikulwaizya alimwi akuba baiyi ba Jwi lya Leza ibacizyi kuyiisya.

Mulangizi wacikolo unoobapa makani aakukanana aabo ibakalilembya mu Cikolo Camulimo Weendelezyegwa a Leza. Mulajana foomu yanu yalulayo amapeeji otatwe aatungene. Manamba alembedwe munsi atwaambo tusiyene-siyene aleendelana azibalo zili amapeeji aatobela. Muzibalo eezyo muyoojana bupanduluzi bwazintu ziyandika kutegwa mube aluzibo lwakukanana akuyiisya munzila zisiyene-siyene kubikkilizya ambociyandika cibeela acimwi. Alimwi muyoojana malailile aagwasya kapati ajatikizya mbomunga mwazicita eezyo zyaambwa.

Imisyobo-misyobo iili afoomu yalulayo itondezya twaambo tweelede kubelesyegwa kumakani aajatikizya (1) kubalila baswiilizi, (2) citondezyo cabantu bobilo naa kwiinda waawo, naa (3) makani aakananwa kumbungano. Mulangizi wacikolo uyoomuzyibya aawo mpomweelede kuyoobelekela. Cilainda kubota ikubelekela akaambo nsini aciindi comwe. Ciyoomugwasya kapati ikuti kamwiinduluka muzyakucita kumamanino aacibeela ncomwapegwa. Ikuti mwalubelesya kabotu lulayo luli mucibeela ncomwapegwa, sikulaya uyoomupa kaambo kambi mpomuyoobelekela.

Ikuti makani aanu ayookananwa kaali citondezyo, mweelede kulibambila mbomweelede kwaabandika. Apeeji 82 kuli mulongo wanzila zipedwe zyakukanana makani, pele mulaangulukide ikubelesya azimbi eezyo zitako amulongo ooyu. Sikulaya ulakonzya kumwaambila kuti musoleke nzila imbi ikutegwa mwiizyibile, ambweni ulakonzya kumulekela kuti mulisalile.

Ikubala bbuku eeli akwiinduluka muzyakucita nokuba kuti inga kamutalibambili makani aamucikolo kuyoomugwasya kapati kuyaambele. Ambweni inga kamubala cibeela cipya amvwiki.

Kunyina makani naa mwali kutola lubazu kwaciindi cilamfwu buti mucikolo naa mumulimo wamumuunda, muciyandika kuzumanana kuyaambele. Amugwasyigwe kapati alwiiyo lujanwa mu Cikolo Camulimo Weendelezyegwa a Leza.