Kusalazya Mbwaagwasya Makani

KUNYINA makani naa mwaambila muntu omwe naa nkamu, tacili kabotu kuyeeya kuti bamuswiilila ayoobakonda makani akaambo kakuti nywebo alamukonda. Mulumbe ngomujisi ulayandika kapati, pele ikuti tamusalazyi mbuukonzya kubelesyegwa, cakutadooneka baswiilizi tabakamuswiilili kwaciindi cilamfwu.

Ncimwi buyo abaswiilizi mu Ŋanda ya Bwami. Balakonzya kuswiilila nomubelesya cikozyanyo naa nomupandulula cimwi cintu cakacitika eeco ncobatanamvwide. Pele tabakamuswiilili nomwaamba makani ngobazyi kabotu, ikapati kuti kunyina ncomwayungizya ali yaayo ngobazyi. Mweelede kubagwasya kubona ncocigwasya ncomwaamba ambocibagwasya.

Ibbaibbele litukulwaizya kuba abusongo bugwasya. (Tus. 3:21) Jehova wakabelesya Johane Mubbapatizi ikusololela bantu “kuluzibo lwabaluleme lugwasya.” (Lk. 1:17) Oobu mbusongo buboola kwiinda mukulemeka Jehova. (Int. 111:10) Aabo ibabubikkila maano busongo oobu bulabagwasya kuzwidilila mubuumi bwabo lino akujatisya buumi bwini-bwini, ibuumi butamani buboola.—1 Tim. 4:8; 6:19.

Ikulibambila Makani Aagwasya. Ikutegwa makani ngomujisi abe makani aagwasya, mweelede kubikkila maano kutwaambo ntomubandika kubikkilizya abaswiilizi. Mutababoni buyo kuba nkamu. Munkamu eeyo muli bantu basiyene-siyene amikwasyi. Mulakonzya kamuli bana baniini, bakubusi, bapati abacembeede. Mulakonzya kamuli bapya abakatalika kaindi kubelekela Jehova kamutanazyalwa. Ibamwi inga kabasimide kumuuya; bamwi balakonzya kabacitobela zyanyika. Amulibuzye kuti: ‘Ino makani ngondiyoobandika ayoobagwasya buti bandiswiilila? Mbuti mbondikonzya kubagwasya kubona kaambo?’ Mulakonzya kubikkila maano kapati kunkamu yomwe naa zyobilo zyabantu baambwa. Pele amubone kuti aaba bamwi tiimwabalubila limwi.

Ino mbuti ikuti mwapegwa kukanana njiisyo imwi ya Bbaibbele yantalisyo? Mbuti mbomukonzya kucita kuti makani aali boobu abagwasye baswiilizi bali alusyomo kale munjiisyo eeyo? Amubagwasye kuyumya lusyomo lwabo munjiisyo eeyo. Munzila nzi? Kwiinda mukwaamba twaambo twamu Magwalo itupa bumboni kunjiisyo eeyo. Alimwi mulakonzya kubagwasya kwiimvwisya njiisyo eeyo yamu Bbaibbele. Eeci cilakonzya kucitwa kwiinda mukutondezya njiisyo eeyo mboyeendelana amakani amwi aakasimpe kamu Bbaibbele abube bwa Jehova. Amubelesye zikozyanyo—izintu zyakacitika ncobeni mubuumi ikuti kacikonzyeka—eezyo zitondezya mbuli kumvwisya njiisyo eeyi mbokwakabagwasya bantu ambokwakabapa kucinca bulangizi bwabo bwabuumi bwakumbele.

Mutalindili kuti musike kumamanino nomuya mwaambe mbwaagwasya makani. Mbomwatalikila buyo, aumwi muntu akati kabaswiilizi weelede kulimvwa kuti “eeci cilandijatikizya.” Mbwaanga mwabanjizya kale mumubandi bamuswiilila, amuzumanane ikutondezya mbwaabagwasya makani aayo mbomuya bukanana kaambo akamwi kuzwa kumatalikilo mane do kumamanino.

Nomwaamba mbwaakonzya kubelesyegwa, amubone kuti mwacita oobo munzila yeendelana anjiisyo zyamu Bbaibbele. Ino eeci caamba nzi? Caamba ikukanana munzila yaluyando akweetezyegwa. (1 Pet. 3:8; 1 Joh. 4:8) Nokuba naakali kulanganya twaambo twakakatazyide mu Tesalonika, imwaapostolo Paulo wakabikkila maano kukankaizya mbazu zyakumuuya mobakali kucita kabotu ibanyina abacizyi Banakristo. Alimwi wakali alusyomo lwakuti kumakani aayo aakali kubandikwa bakali kulombozya kucita cibotu. (1 Tes. 4:1-12) Elo ncikozyanyo cibotu eeco ikwiiya!

Sena makani aanu ngakukulwaizya kutola lubazu mumulimo wakukambauka akuyiisya makani mabotu kubantu? Amubagwasye ikuba abusungu akubikkila maano coolwe ncobajisi. Pele nomucita boobo, amuzyibe kuti muntu amuntu kuli mpagolela mukubeleka mulimo ooyu, alyalo Bbaibbele lilaamba oobo. (Mt. 13:23) Mutapi kuti ibanyoko batalike kulimvwa kuti bali amulandu. Ba-Hebrayo 10:24 likulwaizya kuti “[ka]tubusyanya-busyanya mukuyandana akucita milimo mibotu.” Ikuti twabusyanya-busyanya mukuyandana, imilimo iicitwa akaambo kamakanze mabotu iiyoolibonya. Muciindi cakusinikizyigwa kutobela milawo, amubone kuti Jehova uyanda kuti tube bantu “baswiilila kwiinda mulusyomo.” (Rom. 16:26) Katujisi muzeezo ooyu, tuyanda kuyumya lusyomo—ilwesu tobeni alwabakwesu.

Ikugwasya Bamwi Kubona Kaambo. Nomukambaukila bantu, mutani kulubi kukankaizya mbwaagwasya mubuumi makani mabotu. Ikucita boobo, kuyanda kuzyiba zintu zyibakopanya kapati bantu bakkala mucilawo momubelekela. Mbuti mbomunga mwazyizyiba? Amuswiilile makani aakananwa muli sikapepele amucipekupeku. Amulange apeeji lyakusaanguna lyamuteende. Alimwi amubaambauzye bantu akuswiilila nobakanana. Mulakonzya kujana kuti balijisi penzi liyandika kulanganya cakufwambaana—kubula mulimo, kutelela ŋanda, malwazi, ikufwidwa muyandwa, manyongwe, kupenzyegwa amuntu uuli acuuno cabweendelezi, kumana kwacikwati, kukomezya bana azimwi buyo. Sena Bbaibbele lilakonzya kubagwasya? Inzya buya.

Nomutalika mubandi, inga kakuli kaambo nkomwalibambila. Nokuba boobo, ikuti muntu kaboneka kuti ulijisi makani aalubinda ngayanda kuti mubandike, ikuti kamukonzya amwaabandike mpoonya aawo naa ikulomba kuti mukalibambile kusaanguna. Masimpe, ‘tatunjilili twaambo tutatujatikizyi,’ pele tulalisungula ikwaambila bantu lulayo lugwasya lujanika mu Bbaibbele. (2 Tes. 3:11) Cakutadooneka, iciyoobakonda kapati bantu, ndulayo lwamu Bbaibbele oolo lujatikizya buumi bwabo.

Ikuti bantu kabataboni mulumbe ngotujisi mboubagwasya, balakonzya kuutyokezya mubandi. Nokuba kuti batupa ciindi cakukanana, ikuti tiitwaamba mbwaagwasya makani, nkokuti mulumbe wesu tuukabagwasyi mubuumi bwabo. Pele ikuti twatondezya mbwaagwasya makani, imubandi wesu ulakonzya kubagwasya bantu ikucinca bukkale bwabo.

Nomweendelezya ziiyo zya Bbaibbele, amuzumanane kukankaizya mbwaakonzya kubelesyegwa makani. (Tus. 4:7) Amubagwasye basikwiiya ikumvwisya lulayo, njiisyo azikozyanyo zyamu Magwalo izitondezya mbobakonzya kweenda munzila njayanda Jehova. Amukankaizye bubotu bujanika mukucita boobo. (Is. 48:17, 18) Eeci ciyoobakulwaizya basikwiiya ikucinca bukkale bwabo. Amubagwasye ikuba aluyando kuli Jehova akuyandisya kumukkomanisya. Alimwi iluyando lwakuyanda kutobela lulayo lwamu Jwi lya Leza lutabi lwakusinikizyigwa.