Kukanana Cakulikwaya

BANTU kanji-kanji balalikwaya nobakanana abeenzyinyina. Itwaambo inga twiile kuboola. Bantu bamwi balasangalizya; ibamwi mbaumuzi. Nokuba boobo, ikukanana kuli boobo kulakondelezya.

Nokuba boobo, nomwaambaula amuntu ngomutazyi, tacili kabotu kwiindilizya kwaambaula mbuli kuti mulizyibenyi. Inzya, muzisi zinji kakutanatalikwa mubandi abantu batazyibidwe, nkutaanguna kwaanzyanya. Kwamana kwaanzyanya, kweelana abukkale aabona inga mwalikwaya kukanana.

Nomukanana acibumbili mweelede kucenjela kapati. Ikubelesya mabala aatapi bulemu kulakonzya kuubya-ubya muswaangano wa Bunakristo amboziyandika eezyo zyaambwa. Mumyaambo imwi kuyandika kubelesya mabala amwi nokubandikwa abapati, abaiyi, nkumekume antela abazyali. (Amubone mabala aakabelesyegwa ku Incito 7:2 a 13:16.) Mabala aindene-indene alabelesyegwa nokubandikwa angomukwetene limwi naa mweenzyinyoko. Nokuba boobo, notukanana acibumbili tatweelede kukanana mbuli kuti kuli wafwa.

Pele kuli zintu zimwi zikonzya kupa muntu kutaanguluka nakanana. Cimwi cazyeezyo mbulembe bwatwaambo naa mabala aabelesyegwa. Ipenzi lilaboola mwaambi nayanda kwaamba twaambo mbubwenya mbotulembedwe apepa. Mabala aalembedwe aliindene kanji-kanji amajwi aambwa kumulomo. Inzya, kuvwuntauzya mukulibambila makani kulacitwa kanji-kanji kwiinda mukubelesya twaambo tusimbidwe. Zimwi ziindi twaambo tusimbidwe mpaayeeme makani oonse. Pele ikuti kamwaamba twaambo mbubwenya mbotulembedwe naa kutubala buya apepa lijisi twaambo tupati-pati nomukanana makani, cakutadooneka makani aanu taakamvwugwi kuti mulilikwaide. Ikutegwa mulikwaye kukanana, amwaambe twaambo mumajwi aanu alimwi mutabelesyi mabala aakatazya kumvwa.

Acimwi cikonzya kuleta penzi nkucinca-cinca jwi. Ikukanana cakutaanguluka kanji-kanji kulabikkilizya akuleemuka. Mumibandi yalyoonse, kuli kucinca-cinca kwajwi akwiima-ima munzila ziindene-indene.

Nomukanana kunkamu, masimpe mweelede kukanana cakulikwaya ajwi lyanguzu alimwi kamusangalizya kutegwa nkamu izumanane kumuswiilila.

Ikutegwa mucikonzye kukanana cakulikwaya nomuli mumulimo, mweelede kulizyibizya kukanana kabotu lyoonse. Eeci tacaambi kuti muyandika kuba bantu bayiide kapati. Pele ncibotu ikuba acilengwa cakukanana munzila iyoopa kuti bantu babikkile maano nzyomwaamba. Kamujisi makanze aaya, amubone naa muyandika kubelekela atwaambo ootu mumibandi yanu yalyoonse.

1. Kweelana alulayo luli ku Ba-Kolose 3:8, mutabelesyi mabala aatondezya kubula bulemu. Pele kulubazu lumwi, mabala aabelesyegwa lyoonse taali mabi. Imabala aabelesyegwa lyoonse, manji alabeleka nokubandikwa abamisela pesi inga kaali aabulemu.

2. Kamubelesya mabala aapa kumvwisya ncomupandulula.

4. Amube acilengwa cakubelesya mabala mauba-uba nomwaamba kaambo kayandika kwiibalukwa.