CIIYO 23

Ino Mabbuku Eesu Alembwa Buti Alimwi Asandululwa Buti?

Muntu uubelekela mu Dipatimenti Yabasikulemba, U.S.A. — Dipatimenti Yabasikulemba, ku U.S.A.

Kakamu kabasanduluzi ku South Korea — South Korea

Mwaalumi ku Armenia ujisi bbuku ilyakasandululwa a Bakamboni ba Jehova — Armenia

Musimbi ku Burundi ujisi bbuku ilyakasandululwa a Bakamboni ba Jehova — Burundi

Mukaintu ku Sri Lanka ujisi magazini iyakasandululwa a Bakamboni ba Jehova — Sri Lanka

Kutegwa katuubeleka kabotu mumulimo wakukambauka “makani mabotu . . . kumasi oonse, kumisyobo yoonse, kumilaka yoonse alimwi akubantu bamisyobo yoonse,” tulasimba mabbuku mumyaambo iinda ku 750. (Ciyubunuzyo 14:6) Ino tucikonzya buti kucita mulimo ooyu uukatazya? Tulacikonzya akaambo kakugwasyilizyigwa abasanduluzi ibalyaabide muzisi zisiyene-siyene alimwi boonse Mbaakamboni ba Jehova.

Zibalo zisaanguna kulembwa mu Chingisi. Kabunga Keendelezya kalalanganya mulimo uucitwa a Dipatimenti Yabasikulemba kumaofesi eesu mapati. Dipatimenti eeyi ileendelezya milimo yabasikulemba babelekela kumaofesi mapati alimwi akumaofesi aamitabi imwi. Kuba abalembi bazwa mumasena asiyene-siyene citupa kulemba makani aagwasya bantu bajisi zilengwa zisiyene-siyene, alimwi mabbuku eesu alabakkomanisya bantu bamuzisi zinji.

Zibalo zyalembwa zilatumwa kubasanduluzi. Zyamana kulangwa-langwa zibalo zilembedwe alimwi akuzumizyigwa, zilatumwa kubasanduluzi nyika yoonse mboizulwa kwiinda mukubelesya nzila yakutambikizyanya makani akkompyuta. Basanduluzi aaba ibabelekela mutubunga tusandulula, balasandulula, balalanga-langa, alimwi akubala makani aasandululwa. Balasoleka kusala akubelesya “majwi aaluzi aakasimpe” aakonzya kwaamba kaambo keni kalembedwe mumwaambo wa Chingisi.—Mukambausi 12:10.

Makkompyuta apa kuti mulimo kaucitwa cakufwambaana. Kkompyuta taikonzyi kubeleka mbuli mbobabeleka bantu balemba alimwi ambobabeleka basanduluzi. Nokuba boobo, mulimo ngobacita balembi alimwi abasanduluzi ulakonzya kucitwa cakufwambaana kwiinda mukubelesya mabbuku aapandulula mabala aakkompyuta, makkompyuta alimwi azibelesyo zimwi zyakuvwuntauzizya zyaakkompyuta. Bakamboni ba Jehova bakapanga pulogilamu yaakkompyuta iitegwa Multilanguage Electronic Publishing System (MEPS) yalo iigwasya kuti cikonzyeke kulemba zibalo mumyaambo minji, kubikka mabala azifwanikiso antoomwe kweelana amboziyooboneka mubbuku, mpoonya akusimba.

Nkaambo nzi ncotusolekesya kucita boobu, nokuba kuti myaambo imwi ibelesyegwa buyo abantu basyoonto? Akaambo kakuti Jehova uyanda kuti “bantu boonse bafwutulwe akuba aluzyibo lwini-lwini lwakasimpe.”—1 Timoteyo 2:3, 4.

Ino mabbuku eesu alembwa buti?
Nkaambo nzi ncotusandulwida mabbuku eesu mumyaambo minji?