Kuyobolola Bantu Kuzwa Kumisyobo Yoonse
1 Ijwi lya Leza lili mukuzuzikizyigwa! Bantu “bazwa kumisyobo yoonse a[muzisi zyoonse]” bali mukubuzumina bukombi bwakasimpe. (Zek. 8:23) Ino mbuti Bakamboni ba Jehova mbobali mukubagwasya bantu bazwa “kumisyobo yoonse akumikowa yoonse akumyaambo yoonse” kuti babe aabukkale bukonzya kutambulika kuli Jehova kabajisi bulangizi bwakuyoofwutuka “mapenzi ayo mapati”?—Ciy. 7:9, 14.
2 Imbunga ya Leza Ilaingula: Kabunga Keendelezya kacita bubambe kutegwa mabbuku aabandika zyamu Bbaibbele kaajanika mumyaambo iisika ku 380 kutegwa bantu munyika yoonse mbwiizulwa bacikonzye kumvwisya kabotu mbwaayandika makani mabotu. Ikubamba alimwi akumwaya mabbuku mumyaambo minji boobu mulimo mupati kapati. Iciyandika nkujana basikusandulula bacibwene kumutwe alimwi akubagwasya muyandika kutegwa bacikonzye kusandulula mabbuku eesu mumyaambo eeyi yoonse, kubikkilizya akusimba alimwi akwaatumina kumasena nkwaayandika. Nokuba boobo, imulimo mupati uli kuli sikumwaya umwi aumwi wa Bwami uutola mulumbe wa Bbaibbele uufwutula kubantu.
3 Ikuzumina Mukuli: Imyeelwe minji yabantu bakanana myaambo iimbi balajanika lino mumasena manji. Ikutegwa bakambaukile bantu aaba makani mabotu, ibabelesi banji ba Leza bali mukusoleka kwiiya myaambo iimbi iikananwa mumasena mobakkala. Ibamwi bali mukwiiya Mwaambo Wakutambaika Waku Amelika.
4 Ikutegwa bantu boonse basikilwe, ofesi lyamutabi lyamu Zambia lilamwaya mabbuku mu Chichewa, Chitonga, Cibemba, Cingisi, Cifulenci, Cikaonde, Cilunda, Cilubale, Ciputyugiizi, Cilozi alimwi a Ciswahili kumbungano zisika ku 2,100. Ibantu batakaina buzuba bamvwa kujatikizya Jehova naa ibatakalizyi Bbaibbele bali mukuzumina kasimpe kazwa mu Jwi lya Leza.—Rom. 15:21.
5 Sena inga twasolekesya kukambauka makani mabotu kubantu bali mucilawo cesu ibazwa kucisi cimbi? (Kol. 1:25) Imbungano zimwi zili mukucita bubambe bwamulimo wabukambausi kubantu bakanana mwaambo uumbi ibali kubusena nkobabede. Cakusaanguna, basikumwaya balaiya mwambo kutegwa bacikonzye kukanana makani aantalisyo munzila nguba-uba mbuli aakuti: “Mwapona buti? Ndamuletela makani mabotu. [Mpoonya amubape ikatulakiti naa broshuwa iili mumwaambo ooyu.] Mbubo, kamucaala kabotu.” Jehova ncobeni ulakulongezya ikutalika munzila nguba-uba iili boobu!
6 Imulumbe wamakani aa Bwami ulabakkomanisya bantu bali mubukkale busiyene-siyene alimwi abakanana myaambo iindene-indene. Atujane ciindi cakukanana abalo mulumbe ooyu.