Kuyungizya Luzyibo Lwesu Mumulimo Wakukambauka—Kukambaukila Muntu Waambaula Mwaambo Uumbi

Ikaambo Ncociyandika: Jehova ulabikkila kapati maano kugwasya bantu ‘bamuzisi zyoonse’ kumuuya. (Mil. 10:34, 35) Aboobo, Jesu wakatondezya kuti makani mabotu ayookambaukwa “munyika yoonse” alimwi ‘akumasi oonse.’ (Mt. 24:14) Zekariya wakasinsima kuti bantu “bazwa mumyaambo yoonse yamasi” bayooswiilila. (Zek. 8:23) Kweelana acilengaano ncaakabona mwaapostolo Johane, akati kabaabo bayoofwutuka mapenzi mapati kunooli abantu “ibazwa muzisi zyoonse, mumisyobo yoonse, mumikowa yoonse alimwi amumilaka yoonse [amumyaambo, bupanduluzi buyungizyidwe.].” (Ciy. 7:9, 13, 14) Akaambo kaceeci, ciindi notwajana muntu mucilawo cesu waambaula mwaambo uumbi, tweelede kusolekesya kumukambaukila.