Kuyungizya Luzyibo Lwesu Mumulimo Wakukambauka​—Kusikila Bantu Boonse Bamucilawo Cesu

IKAAMBO NCOCIYANDIKA: Zekariya wakasinsima kuti bantu ibazwa mumyaambo yoonse yamasi bayakwaazumina makani mabotu. (Zek. 8:23) Pele ino mbaani ibayoobayiisya? (Rom. 10:13-15) Tujisi coolwe alimwi amukuli wakukambauka makani mabotu kubantu boonse ibali mucilawo cesu.—od 90 munc. 10-11.

MBOTUKONZYA KUCITA OOBO:

• Amulibambile. Sena inga mulabajana bantu baambaula mwaambo uumbi? Mulakonzya kubelesya JW Language app kwiiya nzila nguuba-uba yakutalisya mubandi. Naa kubelesya fooni yanu, mulakonzya kumutondezya muntu mbwakonzya kujana makani manji mumwaambo wakwe a jw.org

• Amubikkile maano kubantu boonse. Ikuti kamuli mumulimo wakuŋanda aŋanda, amubakambaukile bantu boonse mbomuswaanganya, mutabaindilili basimweenda nzila naa aabo ibali mumyootokala iimvwi. Ikuti kamuli mubukambausi bwakubuleya, amubikkile maano kumakanze aanu aakupa bumboni

• Amube basungu. Amuzumanane kusoleka kujokela kuli baabo mbomwatakajana aŋanda lweendo lwakusaanguna. Amusolekesye kubasikila bantu aŋanda imwi aimwi, ambweni aciindi cimbi cabuzuba naa buzuba bumbi mumvwiki. Bantu bamwi inga bayandika kubatumina lugwalo, fooni naa kubakambaukila mubukambausi bwamumugwagwa.

• Amupilukile. Amupilukile cakufwambaana kumuntu wakatondezya luyandisisyo. Ikuti muntu kaambaula mwaambo umbi, amusoleke kujana muntu uukonzya kumugwasya mumwaambo wakwe. Mweelede kuzumanana kumuswaya muntu ooyo mane kusikila basikumwaya ibaambaula mwaambo wakwe bakajanike.—od 100-101 munc. 39-40

AMWEEBELELE KAVIDIYO KAKUTI KUKAMBAUKILA “KUMASENA AAKULAMFWU KAPATI AANYIKA,” MWAMANA MULANGE-LANGE MIBUZYO IITOBELA:

• 

  Ino nkulibambila nzi nkobakacita bakwesu abacizyi kutegwa bakambaukile bantu mucilawo cili kule? (1Kor. 9:22, 23)

• 

  Ino mbuyumuyumu nzi mbobakazunda?

• 

  Ino nzilongezyo nzi nzyobakajana?

• Ino nkusoleka kuli buti nkomukonzya kucita kutegwa musikile bantu banji mucilawo canu?