KUPONA BUUMI BWA BUNAKRISTO
Kubelekela Antoomwe Ciindi Nomukambaukila Muzilawo Zibelesya Myaambo Iindene-indene
Kanji-kanji bantu balautambula mulumbe wa Bwami ikuti baumvwa mumwaambo wabo. Ambweni eeci ncecakapa kuti lya Pentekoste 33 C.E., Jehova abikke bubambe bwakuti “ba Juda ibankutwe kukomba Leza ibazwa muzisi zyoonse” bazooswiilile makani mabotu ‘mumwaambo ngobakazyalwa anguwo,’ nokuba kuti ambweni bakali kwaambaula mwaambo iwakadumide kapati mbuli Chihebrayo a Chigiriki. (Mil. 2:5, 8) Mazuba aano, mumasena imuli myaambo iindene-indene, mbungano izibelesya myaambo iindene-indene zilakonzya kuba acilawo mubusena mumonya. Mbuti basikumwaya ibali mumbungano zili boobo mbobakonzya kubelekela antoomwe kukambaukila bantu boonse ibali mucilawo cili boobo kakunyina kubanyemya akaambo kakubaswaya cakwiinduluka-induluka?
Amubandike (Tus. 15:22): Balangizi bamulimo beelede kubandika antoomwe akujana nzila yakukambauka makani mabotu iili kabotu iikonzya kubeleka kumbungano zyoonse zijatikizyidwe. Ikuti cilawo cabo kacili cisyoonto, mbungano izibelesya myaambo imbi ambweni inga zyayanda kuti kamwaasotoka maanda aajisi bantu baambaula mwaambo wambungano zyabo. Nokuba boobo, ikuti kabatakonzyi kucibelekela cilawo cabo coonse akaambo kakuti ncipati, ambweni inga bayanda kuti kamutasotoki ŋanda iili yoonse pele kamubazyibya buyo kufwumbwa muntu iwatondezya luyandisisyo uuli mucilawo cabo. (od 100 ¶37) Naa balakonzya kulomba mbungano yanu kuti ibagwasye kujana bantu baambaula mwaambo ngoibelesya mbungano yabo alimwi ma adilesi aabo alakonzya kulonzyelwa mucilawo cabo. (km 7/12 5, kabbokesi) Pele kamuyeeyede kuti zimwi ziindi, aŋanda yomwe balakonzya kuti kababelesya myaambo iindene-indene. Bubambe bwakubelekela mucilawo coonse bweelede kuti kabweendelana amilawo iiliko yalo iikwabilila makani aajatikizya basicisi.
Amubelekele Antoomwe (Ef. 4:16): Amwaatobele malailile aali woonse ngaamupa mulangizi wanu wamulimo. Sena kuli muntu ngomuyiisya Bbaibbele uubelesya mwaambo uutali mwaambo ngoibelesya mbungano yanu? Sikwiiya ooyo ulakonzya kuyaambele cakufwambaana kuti watalika kwiiya amuntu uuli mumbungano iili afwaafwi naa kabunga kabelesya mwaambo wakwe.
Amulibambile Kabotu (Tus. 15:28; 16:1): Ikuti muntu ngomwajana aŋanda iili mucilawo canu waambaula mwaambo umbi, amusolekesye kumukambaukila makani mabotu. Mulakonzya kulibambila kwiinda mukuyeeyela limwi myaambo njomukonzya kujana mpoonya akudaunilodela limwi mufooni naa mutabbuleti yanu ma Bbaibbele aamumyaambo eeyo alimwi amavidiyo. Alimwi mulakonzya kubelesya JW Language app kutegwa mwiiye mbobaanzya mumyaambo iimwi.