Ikuti Mukamwini Ŋanda Kakanana Mwaambo Uumbi
1. Ino nkaambo nzi ncokuyandika kapati kukamantana akati kambungano ciindi nozibelekela mucilawo?
1 Kwaziindi zinji kapati, basikumwaya ba Bwami munyika yoonse balajana bantu babikkila maanu aabo bakanana mwaambo uumbi kuleka yooyo uubelesyegwa mumbungano. Kutegwa bantu aaba bagwasyigwe kumuuya, mitabi minji yacibona kuti cilagwasya kubamba tukamu naa mbungano zikanana myaambo iimbi. Mbokunga kulakonzya kuti kakukananwa myaambo iili mbwiibede mubusena bomwe, mbungano zinji zibelesya myaambo yiindene-indene zilakonzya kukambaukila mucilawo comwe. Ino mbuti mbungano mbozikonzya kukamantana kutegwa zibone masimpe kuti mulimo wakukambauka ubelekwa munzila iili kabotu?—1 Kor. 14:33.
2. Notukambauka kuŋanda aŋanda, ino mbuti mbotukonzya kukamantana akakamu naa mbungano iibelesya mwaambo uumbi iili mucilawo cesu?
2 Kubelekela Antoomwe: Nobacita bukambausi bwamumugwagwa naa bwamukwiizya, basikumwaya beelede kulimvwa kwaanguluka kubandika amuntu uuli woonse ngobayaanya, kubikkilizya abaabo bakanana mwaambo uumbi alimwi akwaabila bbuku lyamumwaambo ngwakonzya kubala muntu ooyo. Nokuba boobo, ciindi nobainka kuŋanda aŋanda muzilawo eezyo zibelekwa akakamu naa mbungano iibelesya mwaambo uumbi, sikumwaya kanji-kanji weelede kubikkila maanu kapati kumaanda aabaabo bakanana mwaambo uubelesyegwa mumbungano njaswaangana. Ciindi mbungano ziindene-indene nozikambaukila mucilawo comwe, kulemba makani aajatikizya bantu mbotuswaanganya mucilawo kulayandika kapati. Balangizi bamulimo beelede kubandika alimwi akubamba twaambo munzila iikonzya kubagwasya. (Tus. 11:14) Nokuba boobo, ikuti sikumwaya uuli mubukambausi bwakuŋanda aŋanda waswaanganya muntu uukanana mwaambo uumbi pele kakunyina mbungano iibelesya mwaambo ooyo iili afwaafwi, sikumwaya weelede kusolekesya kupa bumboni alimwi akuzumanana kumugwasya muntu ooyo uujisi luyandisisyo.
3. Ino ncinzi ncotweelede kucita ikuti twajana kuti basikumwaya bamukakamu naa mbungano iibelesya mwaambo uumbi babelekela mucilawo nciconya ncotubelekela?
3 Tubeleka Mulimo Uukozyenye: Ino mbuti twaambo mbotweelede kubambwa ikuti kw acitika kuti basikumwaya bamumbungano ziindene bakambaukila mucilawo comwe mubuzuba bomwe? Luyando lwa Bunakristo luyooba cintu ciyandika kapati kwiinda ikwiindana kwamyaambo alimwi boonse bayoobikkila maanu kapati kubantu bali mucilawo. (Joh. 13:34, 35) Aboobo, aabo basololela bayootondezya butontozi alimwi aluyando kwiinda mukusala kuti kakamu kamwi kakakambaukile kucilawo cimbi kwaciindi cisyoonto.—Jak. 3:17, 18.
4. Ino mbusinsimi nzi ibuli mukuzuzikizyigwa mazuba aano?
4 Bbaibbele lyakasinsima kuti bantu bamyaambo yiindene-indene bayoomvwa makani mabotu. (Ciy. 14:6, 7) Kwiinda mukukamantana akati kabaabo bajatikizyidwe, basikumwaya bamutukamu naa mbungano zibelesya myaambo yiindene tabakakambaukili mumaanda ngobakambaukila kale bamwi alimwi bantu banji bapya bayookambaukilwa makani mabotu, kubikkilizya abaabo bakanana mwaambo uumbi.—Ef. 4:16.