Kukambaukila Bantu Babelesya Mwaambo Wakucisi Cimbi Ibali Mucilawo
1. Ino ncoolwe nzi ncotukonzya kujana ciindi notukambauka mucilawo cesu?
1 Jesu Kristo wakasinsima kuti makani mabotu ayakukambaukwa munyika yoonse “kuti abe citondezyo kumisyobo yoonse.” Boonse batola lubazu mumulimo wakukambauka akuyiisya balizyi mbwaayandika majwi aaya. (Matayo 24:14; 28:19, 20) Notukambauka alimwi akugwasya bantu kuba basikwiiya, tulakonzya kujana bantu bazwa kuzisi zimbi ibabelesya mwaambo umbi. Abalo aaba beleede kupegwa coolwe cakumvwa mulumbe wa Bwami kutegwa batalike kweenda mukasimpe nobutanasika buzuba bupati bwa Jehova. (Malk. 3:18) Ino mbuti mbotukonzya kukambaukila bantu ibabelesya mwaambo wakucisi cimbi ibali mucilawo ncotukambaukila?
2. Ino mbuti mbotwiiya Jehova notukambaukila bantu baambaula mwaambo umbi?
2 Atutondezye Kuti Ibantu Babelesya Mwaambo Wakucisi Cimbi Tubabona Mbwababona Jehova: Kutegwa tutondezye luyando ndwajisi Leza kakunyina kusalaula bantu ibali mucilawo cesu, tweelede kuba aluyandisisyo lwakubagwasya kuti babe aluzibo lwini-lwini kujatikizya Leza wakasimpe, Jehova, kunyina makani amwaambo ngobabelesya. (Int. 83:18; Inc. 10:34, 35) Nokuba kuti tubikkila kapati maano kubantu ibabelesya mwaambo uubelesyegwa mumbungano yesu, tweelede kubabikkila maano abaabo ibabelesya mwaambo umbi akujana nzila yakubakambaukila mulumbe wa Bwami bwa Leza. Ikutababikkila maano bantu babelesya mwaambo umbi takweendelani amakanze aa Jehova aakuti tukambaukile bantu bamisyobo yoonse. Aboobo, ino mbuti mbotukonzya kugwasya bantu babelesya mwaambo umbi?
3. Ino nkabbuku nzi ikagwasya nkotwakabambilwa, alimwi ino mbuti mbotukonzya kulibambila kukabelesya?
3 Amubelesye Kabbuku Kakuti Good News for People of All Nations: Kabbuku aaka kakabambilwa kuti kakabelesyegwa notujana bantu baambaula mwaambo umbi. Lyoonse mweelede kuba akabbuku aaka, kuzyiba mbokabelesyegwa alimwi mweelede kuti kamulibambilide kukabelesya. Kutegwa mufwambaane kujana mwaambo ngomuyanda, amubikke tupepa mumapeeji muli myaambo iindene-indene iijanika mucilawo canu. Ikuti mabbuku aamumyaambo eeyo kaaliko, inga cagwasya kubweza masyoonto ngomukonzya kwaabila bantu mbomubandika abalo kwiinda mukubelesya mulumbe uuli mukabbuku.
4. Ino mbuti kabbuku ka Nations mbokakonzya kubelesyegwa mumulimo wakukambauka?
4 Ikuti mwajana muntu waambaula mwaambo umbi pele tamuzyi kuti naa mwaambo nzi, amusaangune kumutondezya civwumbyo cakabbuku. Amuvwunune amaapu iili acivwumbyo mocili mukati, amulitondeke mpoonya mutondeke cisi canu, mwamana amutondezye kuti muyanda kuzyiba cisi nkwazwa alimwi amwaambo wakwe. Mwauzyiba mwaambo wakwe, amulange mulongo wamyaambo iili mukati akubona peeji mpoujanika, amumutondezye muzila uulembedwe mumabala aasiisya uuli atala aapeeji, mpoonya amumutondezye mulumbe ngwaelede kubala. Amanizya kubala, amumupe katulakiti kali mumwaambo wakwe naa kumutondezya muzila uupentedwe mubala uusiya-siya, uutondezya kuti mulakonzya kumutolela bbuku lyamumwaambo wakwe. Amumutondezye majwi aali mumabala aasiisya aakuti “izina lyangu ndime,” mpoonya amwaambe zyina lyanu munzila iilimvwisya. Amutondeke majwi aali mumabala aasiisya aakuti “zina lyanu,” akulindila kuti aambe zyina lyakwe. Amupange bubambe bwakupilukila.
5. Ino ncinzi ncotweelede kucita kutegwa tuzumanane kugwasya bantu babelesya mwaambo umbi ibatondezya kuti balayanda kwiiya?
5 Bubambe Bwakuzumanana Amuntu Ooyu: Mweelede kusolekesya kuswaya bantu boonse ibatondezya kuti balauyanda mulumbe wa Bwami, kunyina makani amwaambo ngobaambaula. Twabona kuti muntu ooyo ulayanda kwiiya kujatikizya Leza a Jwi lyakwe, Ibbaibbele, tweelede kulemba foomu yakuti Amuzumanane Amuntu Ooyu (S-43) akufwambaana kupa mulembi wambungano kuti akaitume kuofesi yamutabi kutegwa muntu ooyo uujisi luyandisisyo akaswaigwe amuntu waambaula mwaambo ngwabelesya. Mpoonya, bakumutabi bayakutumina foomu eeyi kukabunga kabelesya mwaambo ooyo. Mbobaya kwiitambula buyo foomu eeyi, baya kumuswaya. Mulembi ulakonzya kupanga kkopi yafoomu eeyi akupa mulangizi wamulimo kutegwa kabona mbobamugwasya muntu ooyu bamukabunga kabelesya mwaambo wakwe. Eeyi foomu yeelede buyo kubelesyegwa ikuti muntu watondezya ncobeni kuti ulayanda kwiiya.
6. Ino ncinzi ncotweelede kucita ikuti naa twajana muntu waambaula mwaambo umbi?
6 Kuzwa ciindi foomu ya S-43 noyatuminwa kumutabi kusikila ciindi muntu ooyo naya kuswaigwa amuntu uubelesya mwaambo wakwe, kulakonzya kwiinda ciindi cili mbocibede. Aboobo, kutegwa muntu ooyu azumanane kuyanda kwiiya, sikumwaya iwakatuma foomu weelede kuzumanana kumugwasya kusikila akatalike kugwasyigwa asikumwaya waambaula mwaambo wakwe. Zimwi ziindi, ciiyo ca Bbaibbele cilakonzya kweendelezyegwa kumuntu ooyo. Nokuba boobo, ino mbuti sikumwaya mbwakonzya kujana mabbuku aamumwaambo wamuntu watondezya luyandisisyo nacilindila sikumwaya uuzyi mwaambo ooyo kuti azumanane kumugwasya?
7. Ino mbuti mbotukonzya kujana mabbuku aamumwaambo wabantu mbotujana notukambauka?
7 Mabbuku Aamumyaambo Imbi: Imbungano tazyeelede kuyobola mabbuku manji aamumyaambo imbi. Nokuba boobo, ikuti mulangizi wamulimo wabona kuti kuli bantu babelesya mwaambo umbi ibayanda kwiiya, ulakonzya kuyobola mabbuku aamumwaambo ooyo ngobakonzya kubelesya basikumwaya. Ikuti mbungano kaitajisi mabbuku aaya, alakonzya koodwa. Cilakonzya kutola ciindi cilamfwu kuti mabbuku aaya asike. Aboobo, mulakonzya kupanga makkopi kuzwa a intaneti akkeyala ya www.watchtower.org. Kuli mabbuku aali mumyaambo minji aabikkidwe a Intaneti basikumwaya abaabo bajisi luyandisisyo ngobakonzya kubala. Masimpe, ibubambe oobu bulagwasya kapati notugwasya baabo baambaula mwaambo umbi.
8. Ino mbuti mbungano mboikonzya kugwasya bantu bayanda kwiiya ibaambaula mwaambo umbi?
8 Imbungano Mboikonzya Kugwasya: Zimwi ziindi mucilawo oomo bantu ibaambaula mwaambo wakucisi cimbi mobayaabuvwula, inga kakunyina imbungano iili afwaafwi iibelesya mwaambo ooyo lyamiswaangano. Aboobo, aabo baambaula mwaambo umbi ibajisi luyandisyo lwakwiiya, beelede kutambwa kumiswaangano yambungano yanu. Ikuti mwabatambula kabotu akubabikkila maano, balakonzya kukulwaizyigwa kuti kabajanika lyoonse kumiswaangano. Kumatalikilo, inga mwajana buyumuyumu akaambo kakwiindana mwaambo azilengwa; nokuba boobo, kunyina ceelede kulesya Banakristo kutondezya luyando lwini-lwini lwabunyina bwanyika yoonse iluli akati ka Bakamboni ba Jehova. (Zef. 3:9; Joh. 13:35) Sena kuli mwaambo umbi ngomukonzya kwaambaula kabotu? Ikuti kakuli boobo alimwi ikuti kamulibambilide kuzumanana kugwasya bantu baambaula mwaambo ooyo, inga mwamuzyibya mulembi wambungano yanu kutegwa azyibye bakuofesi yamutabi. Eeci ciya kubagwasya bakumutabi ciindi baakuyanda sikumwaya uukonzya kuzumanana kugwasya muntu waambaula mwaambo ooyo.
9. Ino ndilili nokukonzya kutalisigwa bubambe bwakuti basikumwaya baiye mwaambo umbi, alimwi ino mbuti mbobukonzya kutalisigwa?
9 Kwiiya Mwaambo: Nomugwasya bantu ibaambaula mwaambo umbi, inga cagwasya kubakulwaizya kuti kabaunka kumiswaangano yeendelezyegwa mumwaambo wabo ikuti kacikonzyeka. Pele ikuti kacitakonzyeki kucita boobu, basikumwaya bamwi inga bayanda kwiiya mwaambo ooyo kutegwa bakonzye kugwasya baabo ibajisi luyandisisyo. Ikuti kakunyina mbungano iili afwaafwi, bakuofesi yamutabi balakonzya kubona naa inga kwatalisyigwa bubambe bwakwiiya mwaambo wakucisi cimbi, akaambo kakuti kuli bantu banji babelesya mwaambo ooyo. Ikuti kwaba boobo, bakuofesi yamutabi balakonzya kuzyibya mbungano izili afwaafwi kutegwa baambilizye kujatikizya bubambe oobu. Aabo ibalilembya kuti bayanda kwiiya mwaambo ooyo beelede kuba amakanze aakuunka kuyakugwasyilizya kabunga naa mbungano mpya.
10. Ino ndilili nokukonzya kutalisyigwa kabunga kabelesya mwaambo wakucisi cimbi, alimwi ino inga baalu bazyiba buti kuti kabunga keelede kutalisyigwa?
10 Kutalisya Kabunga: Kutegwa kutalisigwe kabunga mumwaambo umwi, kuli zyeelelo zyone izyeelede kuzuzikizyigwa. (1) Kweelede kuti kakuli bantu babelesya mwaambo ooyo ibajisi luyandisisyo cakunga balalangilwa kuvwula. (2) Kweelede kuba basikumwaya ibauzyi mwaambo ooyo naa ibaiya mwaambo ooyo ibakonzya kugwasilizya kabunga aako. (3) Kweelede kuba mwaalu uusimide naa mukutausi uukonzya kusololela ambweni muswaangano omwe buyo amvwiki mumwaambo ooyo. (4) Kabunga kabaalu keelede kuti kakalyaabide kugwasya kabunga aako. Ikuti zyeelelo eezyi zyazuzikizyigwa, ibaalu beelede kulembela bakuofesi yamutabi kujatikizya kabunga aako akulomba kuti imbungano yabo izyibwe kuti igwasyilizya kabunga kabelesya mwaambo wakucisi cimbi. (Amubone bbuku lyakuti Bakamantene, mapeeji 106-107.) Imwaalu naa mukutausi uulanganya kabunga aaka wiitwa kuti “mulangizi wakabunga” naa “mubelesi wakabunga.”
11. Ino nkaambo nzi ncocili coolwe kukambaukila bantu babelesya mwaambo wakucisi cimbi ibali mucilawo ncotukambaukila?
11 Kukambaukila bantu babelesya mwaambo wakucisi cimbi ibali mucilawo ncotukambaukila ncibeela ciyandika kapati camulimo wakukambauka uucitwa munyika yoonse ngwaakatalisya Jesu Kristo. Atubeleke mulimo wesu cabusungu akubona Jehova mbwazungaanya zisi kuti bantu bayandisi baboole kulinguwe. (Hag. 2:7) Eelyo kaka cilakonzya kutukkomanisya ikuti twatobela malailile ngotupedwe mukucita mulimo ooyu! Tupailila kuti Jehova akulongezye kusoleka kwesu notukambaukila bantu bali mucilawo cesu ibabelesya mwaambo wakucisi cimbi. Nokuba kuti tulakonzya kujana buyumuyumu akaambo kakwiindana mwaambo, tulizyi kuti Leza nguumenya.—1 Kor. 3:6-9.