Ikumwaya Mabbuku Mucilawo Mukananwa Myaambo Iisiyene-Siyene
1. Ino nkaambo nzi mbungano zinji ncoziyandika mabbuku mumwaambo wakucisi cimbi?
1 Mumasena manji, muunda ubikkilizya bantu bazwa kumasi aambi. Ibunji bwabaaba balaiya kasimpe cakufwambaana alimwi akukamvwisya nobayiisigwa mumwaambo wabo. Ino mbubambe nzi bubikkidwe bwakugwasya bantu bajisi luyandisisyo kumabbuku aabandika Bbaibbele mumwaambo ngobamvwisya kabotu?
2. Ino nkubelekela antoomwe kuli buti kuyandika ciindi mbungano zyobile naa ziinda waawo zikanana myaambo iisiyene-siyene nozibelekela mucilawo comwe?
2 Nomweelede Kwaabila Mabbuku: Ciindi mbungano zyobile naa zinji izikanana myaambo iindene nozibeleka mucilawo comwe, tubunga twabaalu ibajatikizyidwe bayoobelekela antoomwe kwiinda mubalangizi bamulimo mukucita bubambe bweelede kumbungano aimwi, ikutegwa bantu babelesya mwaambo umwi aumwi bakambaukilwe cakulomya. Nobakambauka kuŋanda aŋanda, kanjikanji basikumwaya tabeelede kumwaya mabbuku mumwaambo uubelesyegwa ambungano zimbi. Nokuba boobo, basikumwaya nobali mubukambausi bwamukwiizya naa mumasena aabuleya, balakonzya kwaabila mabbuku mumyaambo iibelesyegwa mucilawo.—Amubone Kabbokesi Kamubuzyo mu Mulimo Wesu Wabwami wamu October 1990.
3. Ino ndiilili mbungano noikonzya kujana mabbuku aamumwaambo wakucisi cimbi?
3 Nomweelede Kuba Amabbuku Mumbungano: Ino ncinzi cikonzya kucitwa ikuti kakuli mweelwe wabantu uuli mbuubede bakanana mwaambo wakucisi cimbi mubusena bumwi, pele kunyina mbungano iibelesya mwaambo ooyo? Mubukkale buli boobo, mbungano zilakonzya kujana mabbuku aayandika aali mbwaabede aaliko mumwaambo ooyo. Alakonzya kubikkilizya matulakiti, ibroshuwa ya Ncayanda Leza, Mulongwe wa Leza alimwi abbuku lya Luzibo. Basikumwaya balakonzya kumwaya mabbuku aaya kufwumbwa ciindi nobaswaanganya bantu bakonzya kubala mwaambo ooyo.
4. Ino mbuti mabbuku aamumwaambo ngoitajisi mbungano mbwaakonzya kujanwa?
4 Mbwaakonzya Koodwa Mabbuku: Ikuti mbungano kaitajisi mabbuku mumwaambo muntu umwi uujisi luyandisisyo ngayanda kubala, ino mbuti mabbuku mumwaambo ooyo mbwaakonzya kujanwa? Sikumwaya weelede kubuzya kumubelesi uulanganya mabbuku kuti amwaambile mabbuku aajanika mumwaambo ooyo, ikutegwa mabbuku aayandika akonzye koodwa kwiinda mumbungano muoda iitobela.
5. Ino nimbaakani nzi njotujisi notumwaya mabbuku aa Bunakristo?
5 Atwaabelesye kabotu mabbuku aa Bunakristo ikugwasya “bantu boonse,” tacikwe makani amwaambo wabo, pele kuti babe ‘aluzibo lwakuziba lusinizyo.’—1 Tim. 2:3, 4.