Atwaabelesye Kabotu Mabbuku Eesu Aamba zya Bbaibbele
1, 2. Ino bantu banji balimvwa buti kujatikizya mabbuku eesu, alimwi ino eeci ciletela mubuzyo nzi?
1 “Ndalikubala mabbuku eenu kuzwa mumwaka wa 1965. Ndilanga-langa mu Bbaibbele ciindi nondibala, alimwi zyoonse zili mumabbuku eenu zileendelana a Bbaibbele. Lyoonse ndalikuyanda kuzyiba kasimpe keni-keni kajatikizya Leza a Jesu, alimwi mubwini ndilakonzya kwaamba kuti ndabujana bwiinguzi buluzi kwiinda mumabbuku eenu amu Bbaibbele.” Oobu mbwaakalembela baku ofesi mpati ya Bakamboni ba Jehova mulombwana umwi. Mulugwalo ndulwena oolo, wakalomba ciiyo ca Bbaibbele.
2 Mbubwena mbuli mulombwana ooyu, tuulunzuma twabantu nyika yoonse balalumba akaambo kamabbuku aagwasya kwiiya Bbaibbele aapegwa a “muzike musyomesi uucenjede.” (Mt. 24:45) Amwaka, imweelwe mupati kapati wamabbuku ulamwaigwa kugwasya babombe myoyo ‘kuboola kuluzibo lwakuziba lusinizyo.’ (1 Tim. 2:4) Mbuti mbotukonzya kwaabelesya kabotu mabbuku eesu aamba zya Bbaibbele?
3. Ino mbuti mbotutakonzyi kunyonyoona mabbuku?
3 Mutanyonyooni pe: Ikuti kwainda ciindi cili mbocibede, tulakonzya kulundika mabbuku manji kwiinda ngotukonzya kubelesya. Ino ncinzi ncotukonzya kucita kutegwa tutanyonyooni mabbuku eesu aagwasya kapati? Bupampu bulayandika ciindi notubweza mabbuku aakuyoobelesya mumulimo. Kwiinda kuti tubweze makkopi manji aabbuku ndyotuyakwaabila, tulakonzya kubweza buyo kkopi lyomwe naa obile akuzoobweza aambi twaakumana kwaabila ngotwakabweza. Eeci ciya kupa kuti mabbuku manji kaatalundani mumaanda eesu. Mbubwenya buyo, ikuti katujisi mamagazini manji aalundene buyo, ncibotu kucesya mweelwe ngotubweza.
4. Ino ncinzi cikonzya kucitwa ikuti mbungano kaijisi mabbuku aalundene buyo?
4 Mabbuku Aalundene Buyo: Ikuti mbungano kaijisi mabbuku amwi aalundene buyo, mweendelezi wa mabbuku inga walomba mbungano zimwi zili mucilawo kutegwa abone naa inga zyaabelesya mabbuku aayo. Basikumwaya balakonzya kwaabila mabbuku aakaindi kubanamukwasyi ibatasyomi, kuli basikwiiya Bbaibbele abamwi buyo. Aabo bakatalika ino-ino kuyanzana ambungano balakonzya kuyanda kuba amabbuku aakaindi aaya kutegwa babe alaibbulali yabo yamabbuku aakumuuya.
5. Mbuti mbotukonzya kutondezya kuti tulalumba kumabbuku eesu?
5 Tuyanda kuti mabbuku eesu azuzikizye makanze ngaabambilwa, nkokuti, ikugwasya bantu babombe myoyo kwiiya zinji kujatikizya makanze mabotu kapati aa Jehova. Mbubonya Jesu mbwaatakasowa cakulya cakasyaala naakamana kusanina makamu aabantu munzila yamaleele, mbaakani yesu yeelede kuba yakwaabelesya kabotu mabbuku aagwasya kapati ngotwaabilwa. (Joh. 6:11-13) Mulumbe uufwutula uuli mumabbuku eesu taukonzyi kubasikila bantu bayandisya bululami ikuti mabbuku kaabikkidwe buyo abusena mpotwaayobweda naa mumabbeeke eesu aakuyumwida mabbuku. Aboobo, tatweelede kuciindilizya notubweza mabbuku aakuyoobelesya mumulimo, pele atwaabelesye kabotu kutegwa agwasye bamwi.—Flp. 4:5.