Atwaabelesye Kabotu Mabbuku Eesu
1 Bubambe bwesu bwakubelesya mabbuku bwakatalika notwakamwaya mamagazini aasika ku 6,000 aa Ngazi Yamulindizi ya July 1, 1879. Kuzwa ciindi eco kuli mabbuku manji kapati asimbwa akumwaigwa mubunji kapati.
2 Bubambe Bwakusanga: Mumwezi wa November 1999, kwakaambwa kuti mamagazini alimwi amabbuku anoopegwa kuli basikumwaya alimwi akubanamaleya baayanda kwiinda mukusanga. Nkokuti bantu tabanoolombwi kusanga mweelwe wamali uubikkilidwe limwi kutegwa batambule bbuku naa magazini. Notumwaya mabbuku, tunootambula mali kuzwa kubantu ngobaliyandila kusanga kugwasilizya mumulimo wanyika yoonse wakumwaya makani mabotu. Tulasyoma kuti Jehova uyoobulongezya bubambe oobu.—Amweezyanisye Matayo 6:33.
3 Mbokucitwa Mumuunda: Tulazumanana kubelesya Makani Aakutalisya Mibandi kukulwaizya bantu kuti bateelele makani eesu. Kuli yooyo uutakwe luyandisisyo takuyandiki akumupa bbuku. Tatuyandi kunyonyoona mabbuku eesu kwiinda mukupa bantu batayandi pe. Kulubazu lumwi, ikuti mwiniŋanda watondezya luyandisisyo, akuzumina kuti uyoolibala bbuku mulakonzya kumusiila. Tuyanda kwaabelesya kabotu mabbuku eesu.
4 Mulakonzya kubelesya majwi aaya atobela mwamana kumutondezya bbuku muntu: “Ikuti kamuyanda kulibala bbuku eli, inga ndamusiila.” Ambweni mwiniŋanda ulabuzya kuti: “Ino lyuulwa mali nzi?” Inga mwavwiila kuti: “Tatuli mukucita makwebo pe. Tatuulisyi mabbuku aaya. Mulimo ngotucita sunu mumunzi uno ulimukucitwa cakuliyandila mumasi aali 233 munyika yoonse mbwiizulwa kugwasya bantu kwiiya nzila iisololela kubuumi butamani. Ikuti kamuyanda kusanga mali kumulimo ooyu, inga ndalumba.”
5 Nomumwaya mamagazini mulakonzya kubuzya mubuzyo uujatikizya cibalo cimwi akwaamba kuti: “Ndiyanda kuti mulibonene ncocaamba cibalo eci. Ikuti kamuyanda kwaabala mamagazini aaya obilo, inga ndamusiila.” Ikuti naa waazumina, mulakonzya kuyungizya kuti: “Ndilikkomene kumuletela makani aaya. Ndisyoma kuti muyooyiya zinji mumakani aaya. Inga ndayanda kumuswaya alimwi nsondo iboola kutegwa ndizoomvwe mbomuyeeya. Mulabona kwaamba kuti Ngazi Yamulindizi ilasimbwa mumyaambo iili 132 alimwi kumwaigwa mamagazini aali 22,328,000 munyika yoonse mbwiizulwa. Mulimo woonse oyu ulacitwa kwiinda mukusanga kwakuliyandila. Ikuti andinywe kamuyanda kusanga mali masyoonto kumulimo wakuyiisya ooyu, inga twalumba.”
6 Zimwi ziindi tacikonzyeki kupandulula makani aakusanga kumulimo wesu wanyika yoonse. Mucikozyanyo, mwiniŋanda uulaa luyandisisyo ulakonzya kubuzya kuti: “Sena mupa buyo?” Tulakonzya kuvwiila kuti: “Ikuti kamuyanda kulibala bbuku eeli, akuti licaale andinywe, inzya inga ndamupa. Ndiyooinda nsondo iboola kuzikubandika makani ngotwajisi akumupandulwida zyamulimo wesu wanyika yoonse.” Mulweendo lwakupilukila mulakonzya kumuzibya mwiniŋanda zyambuli mbotujana mali aakugwasilizya mulimo wesu.
7 Zimwi ziindi mwiniŋanda ulakonzya kulitambula ndilyona bbuku akwaamba kuti, “Ndalumba.” Mulakonzya kumwaambila kuti: “Ndalumba andime. Ndilizi kuti muyookondwa kulibala. Ibanji balayanda kuziba nkotujana mali aakucita kuti mulimo wesu uzumanane mbwaanga tulaucita nyika yoonse mbwiizulwa. Ibanji ibabweza mabbuku eesu batondezya kulumba kuzintu nzyobatiiye, elyo bayanda kuti basange mali masyoonto kutegwa tukonzye kumwaya mabbuku ambi. Ikuti bantu bacita oobo, tulaatambula amaanza obilo.”
8 Sena Kuli Luyandisisyo Lwini-Lwini?: Tatuyandi kuti katwiile kusiya cisiyesiye mabbuku. Tuyanda kuti mabbuku abeleke mulimo wawo wakugwasya bantu balaa luyandisisyo lwini-lwini lwakwiiya makani ambi kujatikizya makanze aa Jehova aataliboteli. Nkunyonyoona kusiya mabbuku kubantu batabikkili maanu kuzintu zyakumuuya. (Heb. 12:16) Ikutegwa kumwaya nkotumwaya mabbuku kugwasye, cili kulindinywe kubona naa kuli luyandisisyo lwini-lwini. Ino luyandisisyo oolu inga lwatondezyegwa buti? Ciimo cakuyanda kubandika andinywe ncitondezyo cibotu. Naa kateelelesya ciindi nomubandika, akuvwiila mibuzyo njomubuzya, akwaamba mbwalimvwa muntu, citondezya kuti muntu oyo ulatola lubazu mumubandi. Ikuti kaambaula andinywe cabulemu, muciimo cabulongwe caamba kuti uliyandide kubandika. Ikuti katobelezya nomubala Bbaibbele citondezya kuti muntu ulaa bulemu ku Jwi lya Leza. Kanjikanji cilagwasya kubabuzya bantu naa bayoolibala bbuku ndyomuyanda kubasiila. Alimwi mulakonzya kulomba kuti mukapilukile alimwi kucita kuti mukazumanane amubandi ngomwajisi. Ikuti naa wazumina ncitondezyo cimbi cakuti ulaa luyandisisyo. Mwabona zisinizyo ezi zyaluyandisisyo lwini-lwini, kulalangilwa kuti muntu ooyo uyoolibelesya kabotu bbuku ndyomwamupa.
9 Ooku kucinca kwanzila nzyotubelesya kutondezya kuti “tatuli mbuli banji baulisya Majwi aa Leza.” (2 Bako. 2:17, Ci) Alimwi citondezya kuti tuliindene abanyika.—Joh. 17:14.
10 Kunyonyoonwa kwa Babuloni Mupati mbokuyaabuswena afwaafwi, bukombi boonse buyaabunjila mumapenzi. Ncotuyanda nkuti mulimo oyu uuyandika kapati wakukambauka makani aa Bwami nyika yoonse uzumanane kuyaambele kakutakwe zisinkilizyo kucita kuti ibanji bakafwutuke.—Mt. 24:14; Rom. 10:13, 14.