Kabbokesi Kamubuzyo

◼ Ncinzi citondezya naa inga twamusiila mabbuku muntu uumwi?

Cintu ciyandika kapati kubona nduyandisisyo ndwajisi muntu. Ikuti watondezya luyandisisyo, inga twamusiila mamagazini obilo, broshuwa, bbuku, naa mabbuku aamwi ngotuyaabumwaya. Eeci ceelede kuba boobu nokuba kuti twabona kuti tajisi mali naa ujisi masyoonto aakusanga kumulimo wanyika yoonse. (Job. 34:19; Ciy. 22:17) Kulubazu lumwi, tatukonzyi kusiya mabbuku eesu aayandika kapati kubantu batajisi luyandisyo.—Mt. 7:6.

Mbuti mwiniŋanda mbwakonzya kutondezya luyandisisyo? Kuzumina kubandika andiswe ncitondezyo cibotu. Kuswiilila notwaambaula, kwiingula mibuzyo, alimwi akwaamba mbwalimvwa kujatikizya kaambo kutondezya kuti ulaaluyandisyo. Kutobelezya notubala Bbaibbele citondezya kuti ulalilemeka Jwi lya Leza. Ziindi zinji, cilagwasya kumubuzya naa ulakonzya kwaabala mabbuku ngotwaabila. Basikumwaya beelede kubelesya bupampu kuzyiba naa muntu ulaaluyandisisyo. Mucikozyanyo, notukambaukila mumigwagwa, inga tiicayandika kuti katwiile kupa cipaape mamagazini, mabroshuwa, naa mabbuku kumuntu uuli woonse wainda. Ikuti catwaalila kuzyiba naa muntu ulaaluyandisisyo naa pe, inga cabota kuti twamupa buyo kapepa kakutamba naa katulakiti.

Ncimwi buyo anotubweza mabbuku kumbungano. Sikumwaya weelede kubweza mabbuku ngakonzya kumwaya mumulimo wakwe wakukambauka ikutali buyo akaambo kakuti ulijisi mali manji aakusanga. Mali ngotusanga taali aakubbadelela mabbuku pele ngakugwasyilizya mumbazu zyoonse zyamulimo wakukambauka wanyika yoonse. Kufwumbwa naa tulivwubide naa pe, kulumba kuyootupa kuti tusange ikutali akaambo kakuti aindilila pele akaambo kakuti ngotujisi alikke, kutegwa tugwasyilizye kutolaambele Bwami. (Mk. 12:41-44; 2 Ko. 9:7) Alimwi ciyootupa kubweza buyo mabbuku ngotuyandika, ikutali kusobanya mali aakabbadelelwa mabbuku aayo.

[Majwi aakwelelezya sikubala aali apeeji 2]

Basikumwaya beelede kubelesya bupampu kuzyiba naa muntu ulaaluyandisisyo