Ikwaabikkila Maanu Mabbuku
1 “Kulemba mabuku manji takumani.” (Muk. 12:12) Mabbuku manji taali mabotu kweelanaa mapepa abelesyegwa. Nokuba boobo, tabusyi mbozibede oobo kujatikizya mabbuku amwaigwa aba Watchtower Society. Mmabbuku aayandika kapati akaambo kakuti alijisi cakulya cakumuuya calo cipa buumi. Alabagwasya aabo ibalaaluyandisisyo lwakuziba Jehova alimwi alayumya lusyomo lwabaabo ibali kale mbabelesi ba Jehova balyaabide.
2 Tuyanda kwaabila bamwi mabbukweesu nkaambo tulizi kuti ayoobagwasya. Nokuba kuti alamwaigwa kakunyina kubbadelesya, kuyandika mali kutegwa mabbuku aaya abambwe alimwi akuti amwayigwe. Aboobo tatuyandi kwiile kwaapa cipaape kumuntu uli woonse pe. Ikuti katutazi kabotu naa mwiniŋanda ulaaluyandisisyo naa pe, tulakonzya kumusiila buyo katulakiti. Tweelede kupilukila kumuntu uli woonse wakabweza bbuku, alimwi ikuti naa watondezya luyando aciindi eco, tulakonzya kumusiila alimbi bbuku.
3 Ibamwi balawayawaya ikwaambila mwiniŋanda kuti mulimo wesu ulagwasilizigwaa zyakusanga zyakuliyandila, pele bunji bwaziindi ncibotu kubaambila zyabubambe oobu. Twacita oobo, beniŋanda balasalalilwa kwaamba kuti mulimo wesu tuuli wakucita makwebo pe. Tutondezya kuti luyando lwesu ndwakukambauka makani mabotu aa Bwami alimwi akugwasya bamwi kuba basikwiiya. Cilatugwasya ikubona luyandisisyo lwini-lwini. Kanjikanji bantu balaula zintu zitayandiki alimwi amabbuku aakunyika. Ikuti kabajisi luyandisisyo lwini-lwini kumakani ngomwabaambila, bayookateelela kaambo ncobeelede kusanga mukugwasilizya Bunakristo bwakasimpe. Kwiinda mukupandulula mbougwasilizigwa mulimo, tutondezya kuti tulaabikkila maanu mabbuku. Tutondezya kuti tulizyi kuti kuyandika mali kutegwa abambwe.
4 Eelyo makani aakusanga naapandululwa kabotu, basiŋanda banji balakulwaizigwa kugwasilizya mulimo wesu uuyandika kapati. Kuli ziindi nomukonzya kubona kuti taciyandiki pe ikwaamba bubambe bwakusanga, pele kanjikanji ncibotu ikubwaamba nomwaswaya ciindi cakusaanguna eelyo mwiniŋanda najisi luyandisisyo lwakubala bbuku eeyo ndyotuli mukumwaya.