Kabbokesi Kamubuzyo

◼ Sena tuleelede kumwaambila mwiniŋanda kuti tulilisungwide kutambula kufwumbwa cakusanga ncajisi kumulimo wa Sosaiti wanyika yoonse kufwumbwa ciindi notumuswaya?

Peepe. Icibalo cakuti “Atwaabelesye Kabotu Mabbuku Eesu” mu Mulimo Wesu Wabwami wamu January 2000 cakaamba kuti: “Zimwi ziindi tacikonzyeki kupandulula makani aakusanga kumulimo wesu wanyika yoonse.” Ibupampu bweelede kubelesyegwa mukaambo aaka. Tuyanda kuti bantu bazibe kabotu-kabotu kuti mulimo wesu masimpe ngwakuyiisya Bbaibbele kutali wamakwebo pe. Tatulombeleli zyakusanga pe.

Ikanjikanji cili kabotu kupandulula cakusalazya mbuli mulimo wesu mbougwasyilizigwa azyakusanga zyakuliyandila notusiya mabbukeesu ciindi cakusaanguna kubantu bajisi luyandisisyo. Ikuti katubikkila maanu mukusiya mabbukeesu kubantu buyo aabo batondezya luyandisisyo naa batondezya kubaa nyota yakubala, aaka kaambo kayoolanganizigwa kabotu.

Ibunji bwabantu bali boobo ibajisi luyandisisyo balaliyeeyela kupa zyakusanga cakuliyandila twabaswaya lweendo lutobela. Ibamwi balakonzya kubuzya muulo wabbuku. Tulakonzya kwaamba mubufwaafwi kuti mabbukeesu taali aamakwebo pe, akupandulula kuti tulaabila mabbukeesu kubantu bajisi luyandisisyo kakunyina muulo uubikkidwe pe. Alimwi balakonzya kuzibisyigwa kuti kufwumbwa uuyanda kugwasyilizya mulimo ooyu wanyika yoonse ulakonzya kupa cakusanga cakuliyandila kufwumbwa ncajisi. Ciindi aciindi, kuti kaceelede tulakonzya kwaamba makani aajatikizya kugwasyilizya mulimo wanyika yoonse wa Sosaiti ikuti muntu ngotucitila nyendo zyakupilukila kataciti oobo.

Tweelede kuti katuyeeyede ikuti, nokuba kuti tulaabila mabbukeesu kubantu bajisi luyandisisyo kakunyina muulo uubikkidwe, kusimba kwamabbukeesu alimwi akumwaya kuyanda mali. Tulijisi lusyomo lwakuti muuya wa Leza uyookulwaizya babelesi bakwe alimwi abaabo bajisi luyandisisyo mumuunda kupa zyakusanga zyakuliyandila mukugwasilizya zintu zyoonse ziyandika mumulimo wanyika yoonse.