Ibubambe Bwesu Buuba-uba Bwakumwaya Mabbuku
1 Kwainda mwaka omwe lino kuzwa ciindi notwakatalika kubelesya bubambe buuba-uba bwakumwaya mabbuku kakunyinaa kubbadelesya. Sena bubambe oobu bwazwidilila na? Malipooti amumulimo wamumuunda atondezya kuti kuli kuyaambele kuli zyeezyo zimwaigwa kubantu mumbazu zyoonse. Masimpe, tuulunzuma twabantu tuli mukupegwa coolwe ‘cakuboola ikuti bazoonywe cabuyo maanzi aabuumi.’—Ciy. 22:17.
2 Nokuba boobo, tuuli mukuli wesu antela taali makanzeesu aakuti katwiile kupa cipaape mabbuku kumuntu uuli woonse uyooliyanda. Mbubwenya buyo mbotubelesya zintu zyesu nzyotujisi munzila yamaanu, sikumwaya umwi aumwi uleelede kubona kuti waabelesya munzila yeelede mabbuku ngatambula kakunyina kubbadelesyegwa kuzwa ku Sosaiti kwiinda mumbungano mwabede. Iba Sosaiti nobaabila basikumwaya mabbuku aabo kakunyina kubbadelesya tacaambi kuti taakwe mali aabelesyegwa mukubamba alimwi akumwaya mabbuku pe. Boonse beelede kuteelela mbwaayandika kapati mabbuku eesu mukugwasya bantu babombe myoyo akusola kwabo mukuyandaula luzibo lwini-lwini kujatikizya Jehova Leza alimwi a Mwanaakwe Jesu Kristo.—Joh. 17:3.
3 Ino iba Sosaiti bacikonzya buti kwaabila bantu boonse imabbuku aabo kakunyina kubbadelesya? Imali aayandika kubbadelelwa mukubamba alimwi akumwaya mabbuku alabbadelwa kwiinda mukusanga. Ibabelesi ba Jehova balyaabide mbabagwasilizya kapati mumulimo ooyu. Bakamboni ba Jehova takwe nobalangila banamaleya kuti bagwasilizye mulimo ooyu wakukambauka Bwami uuyandika kucitwa cakufwambaana. Taakwe notwakalombede alimwi tatulibambide kulombelela mali kuzwa kuli banamaleya. Nokuba boobo, ikusanga kusyoonto kucitwaa bantu mbotujana mumuunda bajisi luyandisisyo tulakutambula cakulumba.
4 Kusanga Kwesu Ncokubeleka: Aboobo, cilayandika kapati kuti katulibambilide ikupandulula kabotu-kabotu mubufwaafwi mulimo wesu waanyika yoonse wakuyiisya Bbaibbele mbougwasilizigwa azyakusanga zyakuliyandila. Mali oonse ngotutambula alabelesyegwa mukubbadela zintu ziyandika mukuzuzikizya mulimo wakukambauka wa Bwami uucitwa mazubaano. Kunze lyakubamba mabbuku aamwaigwa nyika yoonse mbwiizulwa, iba Sosaiti balalanganya amaofesi aamitabi, maandaa Beteli, zikolo zyabakutausi alimwi azyabamisyinali, bamisyinali, balangizi beendeenda, masena mwaabilwa mabbuku alimwi amilimo iimbi minji iiyandika mukumanizya mulimo Jesu ngwaakapa basikwiiya bakwe.—Mt. 24:14; 28:19, 20.
5 Ikuyaambele kupati kucitika akati kabantu ba Jehova kwapa kuti banji babe aluyando lwakuyanda kugwasilizya kufwumbwa mumbazu muyandika lugwasyo. Ibanji tabacikonzyi pe ikugwasilizya munzila yacigaminina mumayake aamitabi mipya alimwi a Maandaa Bwami naa kuya kuzisi zyakule kuyoogwasilizya mumulimo wakukambauka. Pele kutegwa abalo batole lubazu mbuli mbobakonzya mukuyaambele kukondelezya kuli mukucitwa, basikumwaya banji amikwasyi yabo bacibikka kuba cilengwa cabo kubikka ambali cimwi cintu lyoonse kutegwa bagwasilizye mumulimo ooyu uucitwa nyika yoonse mbwiizulwa. (Amweezyanisye 1 Ba-Korinto 16:1, 2.) Munzila eeyi, milimo yoonse ya Sosaiti ilagwasilizigwa kabotu kubikkilizyaa kumwaigwa kwamabbuku. Kutabi muntu naba omwe weelede kubona kusanga ooku kwakuliyandila kuba mbuli kuti nkwakubbadelela mabbuku.
6 Ciindi notuswaya mwiniŋanda naa ibambi buyo amuzeezo wakubapa bukamboni, tweelede kubandika ambabo makani aajisi mutwe wamu Bbaibbele. Kuli nzila zinji zyambokutalikwa mibandi iikondelezya alimwi amitwe yamakani aamu Bbaibbele yeelede iipedwe mubbuku lya Kukambitsirana za’Malemba. Cili kuli ooyo muntu mbwautambula mulumbe wa Bwami, sikumwaya weelede kusala mbwayelede kwaayendelezya makani aakumwaya mabbuku. Ikuti kakuboneka kuti muntu ooyo takwe luyando lunga lwapa kuti mumusiile bbuku, mulakonzya kuukosokezya mubandi munzila mbotu mpoonya akuzumanana kuya kumuntu uumbi. Ambweni inga mwayanda kuti mumusiile buyo katulakiti ikuti muntu ooyo wasyomezya kuti ulaubala mulumbe uulimumo. Amubone kwaamba kuti mwamulemba zina muntu ooyo watondezya luyandisisyo kutegwa mukamuswaye alimwi. Mulakonzya kucita mbubwenya aleelyo notutakwe ciindi cinji cakutalisya mubandi ulaampindu amuntu ngotwaswaya akaambo kakuti ujisi bubi naa kuti twamuswaya aciindi citali kabotu.
7 Bubambe buuba-uba mukumwaya mabbuku bulagwasya muntu uuli woonse kubona kwaamba kuti mulimo wesu wakuyiisya Bbaibbele tuuli wakucita makwebo pe. Alimwi butugwasya kubikka ambele imbaakani yakukambauka makani mabotu aa Bwami alimwi akugwasya bamwi kuba basikwiiya ba Jesu Kristo. Kwiindanaa mbunga zimwi zijatikizidwe “mukulombelela mali kubanamaleya,” Bakamboni ba Jehova balabona kwaamba kuti bantu boonse balaatambula mabbuku kakunyina kubbadela. Tatulombeleli mali aakugwasilizya mulimo waanyika yoonse kuzwa kubantu ibatatondezyi luyando lwini-lwini kumulumbe wesu. (Amubone Ngazi Yamulindizi yamu Chichewa yamu December 1 1990, amapeeji 22 alimwi a 23.) Bunji bwamali oonse aasangwa alabelesyegwa mukugwasilizya mulimo waanyika yoonse ooyu wakuyiisya Bbaibbele, mbwaanga boonse babelesi mbaasikulisungula alimwi tabavwoli mali antela kubbadela muntu uuli woonse mumbunga. Makani aakusanga ikugwasilizya mulimo waanyika yoonse apanduludwa buyo baabo ibayanda kuziba naa aabo ibajisi luyandisisyo mumulimo wesu.
8 Mbotuyaabuyungizya mulimo wesu cabunkutwe, akwaabelesya kabotu mabbuku mabotu aa Sosaiti, Jehova uyoozumanana kutuyungizizya. Bantu balaamyoyo mibotu kufwumbwa nkobakonzya kujanika balamvwa bupanduluzi bwesu kujatikizya mulimo wesu alimwi balilibambilide kugwasilizya kwiinda mukusanga kwabo kwakuliyandila.