Nkaambo Nzi Ncomweelede Kuzumanana Kwiiya Makani Mabotu?

1. Ino kuzumanana kwiiya Bbaibbele kuyoomugwasya buti?

Cakutadooneka, kulanga-langa njiisyo zyamu Bbaibbele nkomwacita mubufwaafwi, kwayumya luyando ndomujisi kuli Jehova. Mweelede kuzumanana kubeleka kutegwa luyando oolu lutamani. (1 Petro 2:2) Bulangizi bwanu bwakupona kukabe kutamani buyeeme aakuzumanana kwanu kuba acilongwe a Leza kwiinda mukwiiya Jwi lyakwe.​—Amubale Johane 17:3; Juda 21.

Mbomuyaabuzumanana kuyungizya luzyibo lwanu kujatikizya Leza, lusyomo lwanu luyooyuma. Lusyomo luyoomugwasya kutegwa mumukkomanisye Leza. (Bahebrayo 11:1, 6) Luyoomugwasya kuti mweempwe akucinca bukkale bwanu.​—Amubale Milimo 3:19.

2. Ino luzyibo ndomujisi kujatizya Leza inga lwabagwasya buti bantu?

Cakutadooneka, inga mwayanda kwaambila bamwi nzyomwaiya—toonse tulakkomana kwaambila bantu makani mabotu. Nomuzumanana kwiiya Bbaibbele, muyakwiiya mbolibelesyegwa Bbaibbele kupandulula lusyomo ndomujisi muli Jehova alimwi amumakani mabotu.​—Amubale Baroma 10:13-15.

Bantu banji balatalika kukambauka makani mabotu kwiinda mukukambaukila balongwe babo naa bacibbululu. Amubelesye bupampu. Muciindi cakubaambila kuti cikombelo cabo taciluzi, amubaambile zisyomezyo zya Leza. Alimwi mweelede kuzyiba kuti kanji-kanji icikkomanisya bantu nkulilemeka kubotu ikutali zintu nzyomwaamba.​—Amubale 2 Timoteyo 2:24, 25.

3. Ncilongwe cili buti ncomukonzya kuba ancico a Leza?

Kwiiya Jwi lya Leza kuyoomugwasya kuyaambele kumuuya. Mukuya kwaciindi, muyooba acilongwe caalubazu a Jehova. Alimwi buya mulakonzya kuba mumukwasyi wakwe.​—Amubale 2 Bakorinto 6:18.

4. Mbuti mbomukonzya kuzumanana kuyaambele?

Mulakonzya kuyaambele kumuuya kwiinda mukuzumanana kwiiya Jwi lya Leza. (Bahebrayo 5:13, 14) Amulombe kwiiya Bbaibbele kuli Kamboni wa Jehova kubelesya bbuku lyakuti Ino Ncinzi Cini Bbaibbele Ncoliyiisya? Mbomuyaabuzumanana kwiiya Jwi lya Leza, muyoozwidilila mubuumi.​—Amubale Intembauzyo 1:1-3; 73:27, 28.

Makani mabotu azwa kuli Jehova, Leza uukkomene. Mulakonzya kuswena kulinguwe kwiinda mukuyanzana abantu bakwe. (Bahebrayo 10:24, 25) Kwiinda mukuzumanana kukkomanisya Jehova, muyoojana buumi bwini-bwini—buumi butamani. Kuba acilongwe a Leza ncecintu ciinda kubota ncomukonzya kucita.​—Amubale 1 Timoteyo 1:11; 6:19.