Lwiiyo Kuzwa ku Bwami—Kuyiisya Babelesi ba Mwami

CIINDI nomwalanga kucibumbili, mwamweta-mweta akaambo kamakani aali mukukananwa. Mukwesu uukanana makani aayo ucili mwana-mwana uuzwa kumbungano yanu, alimwi upa makani aakwe aakusaanguna amuswaangano. Nomuswiilila kumakani aali mukupegwa, mwakkomana kapati akaambo kalwiiyo ndobapegwa bantu ba Leza. Mpoonya, mwayeeya makani ngaakapa mukwesu ooyu ciindi cakusaanguna—akubona kuyaambele nkwaacita! Wayaambele kapati naakamana kunjila Cikolo Camulimo Weendelezyegwa a Leza alimwi a Cikolo Camulimo Wabupainiya. Caino-ino, walo abakaintu bakwe bakali ku Cikolo ca Banakristo Banabukwetene. Ciindi nomukamba akaambo kamakani aapegwa kabotu, kumane mwalanga akuyeeya lwiiyo ndobapegwa bantu ba Leza.

Bbaibbele lyakaambila limwi ciindi bantu ba Leza ‘nobayakuyiisyigwa a Jehova.’ (Is. 54:13) Lino tupona muciindi eeco. Tulayiisyigwa kutali buyo kwiinda mumabbuku eesu pele alimwi akwiinda mumiswaangano yambungano, yabbazu, yacooko, alimwi akwiinda muzikolo zisiyene-siyene izibambilidwe kutugwasya kulibambila milimo iisiyene-siyene mumbunga ya Jehova. Mucibeela eeci, tulalanga-langa lwiiyo oolu mbolusinizya kuti Bwami bwa Leza bulalela mazuba aano.