Mbomukonzya Kwaalwana Mapenzi

Ciindi nomwakwatana, mapenzi asiyene-siyene alatalika. Alakonzya kuboola akaambo kakwiindana mbomuyeeya, mbomulimvwa alimwi ambomuzibona zintu. Ambweni mapenzi alakonzya kuzwa buyo kumbi naa kuzintu nzyomwatali kulangila.

Inga mwayanda kubweeleba bukkale mbomwasikilwa, pele Bbaibbele litulailila kuti tweelede kwaalwana mapenzi eesu. (Matayo 5:23, 24) Muyoojana nzila zibotu kapati zyakumana mapenzi aanu kwiinda mukubelesya njiisyo zyamu Bbaibbele.

1 AMULIBANDIKE PENZI

NCOLYAAMBA BBAIBBELE: Kuli “ciindi cakwaamba.” (Mukambausi 3:1, 7) Amubone kuti mwajana ciindi cakulibandika penzi. Camoyo woonse amumwaambile ngomukwetene limwi mbomulimvwa ambomuyeeya kujatikizya makani aayo. Lyoonse ‘amwaambe zyamasimpe’ kuli ngomukwetene limwi. (Baefeso 4:25) Nociba ciindi nomwabijilwa kapati, amuukake muzeezo wakuyanda kulwana. Kwiingula kabotu kulakonzya kupa kuti mubandi ubandikwe buyo kabotu, akumana kakunyina kulwana.—Tusimpi 15:4; 26:20.

Nokuba kuti tiimwazuminana, amukkazike moyo, alimwi mutalubi kutondezya luyando abulemu kumuntu ngomukwetene limwi. (Bakolose 4:6) Amusole kulibandika penzi cakufwambaana alimwi mutaleki kwaambauzyanya.—Baefeso 4:26.

NCOMUKONZYA KUCITA:

• Amusale ciindi cibotu cakulibandika penzi

• Ikuti naa ndinywe muswiilila, mutamunjili mukanwa ngomukwetene limwi. Cilasika ciindi cakuti andinywe mwaambaule

2 AMUSWIILILE AKUMVWISYA

NCOLYAAMBA BBAIBBELE: “Amuyandane kapati. Amube ndinywe nomuli kumbele mukulemekana.” (Baloma 12:10) Mbomuswiilila, nkaambo kapati. Amusole kumvwisya nzyaamba ngomukwetene limwi ‘calweetelelo . . . alimwi acakulicesya.’ (1 Petulo 3:8; Jakobo 1:19) Mutalicengeezyi kuti mulaswiilila. Kuti kacikonzyeka amuleke nzyomwali kucita akubikkila maano kapati nzyaamba ngomukwetene limwi, naa amulombe naa inga mwabandika aciindi cimbi. Ikuti ngomukwetene limwi kamumubona kuba mulongwe wanu kutali sinkondonyoko, ciyoomupa ‘kutafwambaana kukalala ciindi nomwabijilwa.’—Mukambausi 7:9.

NCOMUKONZYA KUCITA:

• Amuzumanane kuswiilila camoyo woonse, nokuba kuti nzyaamba tamuzikkomanini

• Amwaamvwisye makani ngasola kwaamba kutali buyo nzyomwamvwa. Amubikkile maano mbwaambaula ngomukwetene limwi alimwi ambolimvwika jwi lyakwe

3 AMUCITE KWEELANA AMBOMWAMVWANA

NCOLYAAMBA BBBAIBBELE: “Mumilimo yoonse mulajanwa impindu, pele kwaamba buyo kulaleta bucete.” (Tusimpi 14:23) Kumvwana mbomukonzya kukabamba kaambo tacili nceciyandika cilikke pe. Mweelede kucita kweelana ambomwamvwana. Eeci inga caamba kuti mubeleke canguzu alimwi cilakonzya kumugwasya. (Tusimpi 10:4) Kuti mwabelekelaamwi, ‘muyoojana mpindu mbotu’ kumilimo yanu.—Mukambausi 4:9.

NCOMUKONZYA KUCITA:

• Amubandike ncayoocita umwi aumwi kutegwa mumane penzi lyanu

• Ciindi aciindi, amulilingule kutegwa mubone naa mwayaambele