Bakamantene Mukucita Kuyanda kwa Jehova

NYIKA yoonse mboizulwa, kuli mbunga zinji ziindene-indene zyabukombi, zyatwaambo twacisi, zyamakwebo alimwi ambunga zigwasya bantu, izijisi makanze aasiyene-siyene alimwi izibelesya busongo amizeezo yabantu yiindene-indene. Pele kuli mbunga yomwe yiindene kapati ambunga zimbi zyoonse. Jwi lya Leza litondezya kuti mbunga eeyi Mbaakamboni ba Jehova.

² Cilakkomanisya kuti mulayanzana ambunga ya Jehova. Mbwaanga nywebo nobeni mwacizyiba ncayanda Leza, lino muli mukucicita. (Int. 143:10; Rom. 12:2) Muli mubelesi musungu uubelekela antoomwe aciinga canyika yoonse cabakwesu basiluyando. (2Kor. 6:4; 1Pet. 2:17; 5:9) Mbubonya mbokusyomezyedwe mu Jwi lya Leza, eeci cimuletela zileleko zinji alimwi akumupa kukkomana kapati. (Tus. 10:22; Mk. 10:30) Kwiinda mukucita kuyanda kwa Jehova cakusyomeka lino, muli mukulibambila bukkale bwakumbele bubotu kapati alimwi ibutakamani.—1Tim. 6:18, 19; 1Joh. 2:17.

³ Mulengi wesu Mupati ulijisi mbunga iilibedelede njayendelezya eeyo iijanika munyika yoonse. Jehova uuyeendelezya mbunga eeyi ngo Silutwe wazintu zyoonse. Tulamusyoma cakumaninina. Ngo Mubetesi wesu, ngo Sikutupa Mulawo alimwi ngo Mwami wesu. (Is. 33:22) Mbwali Leza iweendelezya kabotu zintu, ubikkide bubambe ibutugwasya ‘kubelekela antoomwe anguwe’ mukuzuzikizya makanze aakwe.—2Kor. 6:1, 2.

⁴ Mbwaayaabuswena mamanino aabweende bwazintu oobuno, tulazumanana kuyaambele katusololelwa a Mwami wesu uubikkidwe, Kristo Jesu. (Is. 55:4; Ciy. 6:2; 11:15) Jesu nguwakasinsima kuti basikumutobela bakali kuyoocita milimo mipati kwiinda yeeyo njaakacita walo mumulimo wakwe naakali anyika. (Joh. 14:12) Cakali kuyooba boobo akaambo kakuti kwaciindi cilamfwu, alimwi kabali banji kapati, basikumutobela bakali kuyoobeleka mucilawo cipati kapati. Bakali kuyookambauka makani mabotu aa Bwami kusikila kumasena aakulamfwu kapati aanyika.—Mt. 24:14; 28:19, 20; Mil. 1:8.

⁵ Eeci cacitika kale. Pele mbubonya Jesu mbwaakacisalazya kwaamba, imulimo wakwaambilizya makani mabotu uyoomana aciindi ncabikkide Jehova. Bumboni boonse ibuli mu Jwi lya Leza lyabusinsimi butondezya kuti buzuba bwa Jehova bupati alimwi ibuyoosya bulaafwaafwi kapati.—Joe. 2:31; Zef. 1:14-18; 2:2, 3; 1Pet. 4:7.

⁶ Mbokunga ciindi cisyeede lino ncisyoonto kapati alimwi tulicizyi ncayanda Jehova, tweelede kwiindila buya kubeleka canguzu kucita ncayanda Leza. Kutegwa tucite boobo tuyandika kwiizyiba kabotu mboibeleka mbunga ya Leza alimwi akubelekela antoomwe anjiyo cakumaninina. Imbunga eeyi yeendelezyegwa anjiisyo zyamu Magwalo, kubikkilizya amilazyo, milawo, malailile alimwi ambeta zilembedwe mu Jwi lya Leza ilyakasololelwa amuuya.—Int. 19:7-9.

⁷ Ciindi bantu ba Jehova nobatobela busolozi oobu bwamu Bbaibbele, balakkala alimwi akubelekela antoomwe muluumuno alukamantano. (Int. 133:1; Is. 60:17; Rom. 14:19) Ino ncinzi cibapa kukamantana kapati bakwesu kufwumbwa nkobabede? Nduyando. Luyando ndolutukulwaizya kucita zintu zyoonse alimwi tulilusamide mbuli cisani. (Joh. 13:34, 35; Kol. 3:14) Munzila eeyi njakkomanina Leza, tweendela antoomwe acibeela cakujulu cambunga ya Jehova.

CIBEELA CAKUJULU CAMBUNGA YA JEHOVA

⁸ Basinsimi aaba: Isaya, Daniele a Ezekieli bakabona zilengaano zyacibeela cakujulu cambunga ya Jehova. (Is., caand. 6; Ezk., caand. 1; Dan. 7:9, 10) Mbubonya buyo, awalo mwaapostolo Johane wakabona cilengaano cabubambe oobu bwakujulu alimwi wakatutondezya mbobubede mubbuku lya Ciyubunuzyo. Wakabona Jehova kakkede acuuno cabwami cabulemu kali abangelo ibaambilizya kuti: “Ulasalala, ulasalala, ulasalala Jehova Leza, Singuzuzyoonse, ooyo wakaliko, uuliko alimwi uuboola.” (Ciy. 4:8) Johane alimwi wakabona ‘mwanaambelele wiimvwi akati kacuuno cabwami,’ nkokuti Mwanaambelele wa Leza, Jesu Kristo.—Ciy. 5:6, 13, 14; Joh. 1:29.

⁹ Cilengaano eeci ca Jehova kakkede acuuno cabwami citondezya kuti walo ngo Silutwe wambunga eeyi. Kujatikizya nguwe alimwi acuuno cakwe cisumpukide, lugwalo lwa 1 Makani 29:11, 12 lwaamba kuti: “Yebo O Jehova, bupati, nguzu, bweebesi, lulemeko abulemu nzizyako, nkaambo zintu zyoonse kujulu alimwi aanyika nzizyako. Bwami mbubwako, O Jehova. Yebo ndonduwe oosumpukide mbuli silutwe wazyoonse. Buvwubi abulemu zizwa kulinduwe, nduwe weendelezya zintu zyoonse, alimwi mujanza lyako mozibede nguzu abupati, alimwi janza lyako lilakonzya kusumpula akupa nguzu kuli boonse.”

¹⁰ Mbwali similimonyina a Jehova, Jesu Kristo ulijisi cuuno cisumpukide kujulu, alimwi ulipedwe nguzu zinji kapati. Masimpe, Leza “wakabombya zintu zyoonse kunsi aamaulu aakwe, akumubikka kuti abe mutwe wazintu zyoonse zijatikizya mbungano.” (Ef. 1:22) Ikujatikizya Jesu, mwaapostolo Paulo wakaamba kuti: “Leza wakamusumpula akumupa cuuno caatala azina liinda mazina oonse, kutegwa muzina lya Jesu boonse bafwugame—aabo bali kujulu, anyika alimwi abaabo bali mubulongo—alimwi boonse beelede kuzumina caantangalala kuti Jesu Kristo Mwami kutegwa Leza Taata alemekwe.” (Flp. 2:9-11) Aboobo, tulakonzya kubusyoma cakumaninina busolozi bwa Jesu Kristo ibululeme.

¹¹ Musinsimi Daniele mucilengaano wakabona Sinsiku kakkede acuuno cakwe cabwami kujulu alimwi abangelo ibali “cuulu cazyuulu zyabaabo bakali kukutauka kumbele lyakwe, abali zyuulu zili kkumi iziyungizyidwe ziindi zili zyuulu zili kkumi ibakaimvwi kumbele lyakwe.” (Dan. 7:10) Bbaibbele lyaamba nkamu eeyi yabangelo kuti “myuuya iibeleka mulimo uusalala, ibatumwa kubelekela baabo ibayookona lufwutuko.” (Heb. 1:14) Zilenge zyoonse eezyi zyamuuya zilibikkidwe kabotu-kabotu ‘muzyuuno zyabwami, bulelo, mfwulumende, alimwi abweendelezi.’—Kol. 1:16.

¹² Ikuti twajana ciindi cakukkala ansi kuyeeya zintu eezyi zyacibeela cakujulu cambunga ya Jehova, tulakonzya kumvwisya mbwaakalimvwa Isaya naakatondezyegwa cilengaano oomo mwaakabona “Jehova kakkede acuuno cabwami cilamfwu kapati alimwi cisumpukide,” alimwi “atala lyakwe kwakaimvwi baserafi.” Isaya wakati: “Maawe mebo! Ndanyonyooka, nkaambo ndimuntu uusofweede kumilomo, alimwi ndikkede akati kabantu basofweede kumilomo; nkaambo meso aangu abona Mwami, Jehova wamakamu lwakwe!” Masimpe, Isaya wakakankamana alimwi akulibona kuceya kapati naakamvwisya mboili mpati kapati mbunga ya Jehova. Cakamunjila kapati mumoyo eeci ncaakabona cakunga naakamvwa jwi kuzwa kujulu ilyakali kubuzya kuti nguni uukonzya kucita mulimo uulibedelede wakwaambilizya makani aalubeta aa Jehova, Isaya wakaingula kuti: “Ndime aano! Kondituma!”—Is. 6:1-5, 8.

¹³ Ikuzyiba alimwi akulumba ncoicita mbunga ya Jehova kulabakulwaizya bantu bakwe kucita mbubonya oobo mbwaakacita Isaya. Mboiyaabuya kumbele mbunga, tulasoleka canguzu kweendela antoomwe anjiyo. Tulasoleka kutondezya kuti tulaisyoma mbunga ya Jehova mazuba aano.

MBUNGA YA JEHOVA ILI MUKUYAAMBELE

¹⁴ Mucaandaano 1 cabusinsimi bwa Ezekieli, Jehova utondezyedwe kuti weenzya nkalaki yakujulu mpati kapati. Eeyi nkalaki iimweka alimwi yeebeka kapati yiiminina cibeela citalibonyi cambunga ya Jehova. Walo nguweenzya nkalaki eeyi mukuti ngonguwe uuyeendelezya caluyando alimwi akwiibelesya kweelana amakanze aakwe.—Int. 103:20.

¹⁵ Vwili limwi alimwi lyankalaki eeyi lijisi vwili mukati kandilyo, ilyeelene kukomena andilyo ilili mukati kaliingene. Aboobo mavwili aaya alakonzya kwaambwa kuti “akali kukonzya kugama kumabazu aangawo oonse one.” (Ezk. 1:17) Mavwili aaya alakonzya kugama kumbi mpoonya-mpoonya. Nokuba boobo, nkalaki eeyi tailyeendeli buyo yalikke naa kweenda kakunyina kusololelwa cabusongo. Jehova talekeli mbunga yakwe kweenda akugama kufwumbwa buyo nkoiyanda. Lugwalo lwa Ezekieli 1:20 lwaamba kuti: “Zyakali kuunka ooko muuya nkuwakali kuyanda kuti zyuunke.” Aboobo, Jehova nguupa kuti mbunga yakwe kayeenda akuunka kufwumbwa ooko muuya wakwe nkuwayanda kuti yuunke. Imubuzyo ngotweelede kulibuzya tobeni ngwakuti, ‘Sena ndeendela antoomwe anjiyo?’

¹⁶ Kweendela antoomwe ambunga ya Jehova takujatikizyi buyo kujanika kumiswaangano akutola lubazu mumulimo wamumuunda. Icipati ncakuti kweendela antoomwe anjiyo caamba kuti tweelede kuyaambele alimwi akusima kumuuya. Aboobo ‘tulasinizya zintu ziyandika kapati’ akutacaalila acakulya cakumuuya ncotupegwa kweelana abubambe bubikkidwe bwakutusanina kumuuya. (Flp. 1:10; 4:8, 9; Joh. 17:3) Alimwi tweelede kuyeeya kuti ikutegwa zintu zyeende kabotu, kuyandika bweendelezi buli kabotu alimwi akubelekela antoomwe. Aboobo tweelede kubona mbociyandika kuzibelesya kabotu zintu zyakumuuya azyakumubili, mbuli luzyibo, lusyomo, ciindi, nguzu, alubono, eezyo Jehova nzyatupede kuti katuzibelesya mukuzuzikizya mulimo wakwe. Mbotuyaabweendela antoomwe ankalaki ya Jehova yakujulu, buumi bwesu bulazumanana kweendelana amulumbe ngotwaambilizya.

¹⁷ Kwiinda mukugwasyigwa ambunga ya Jehova, tuyakumbele mukucita kuyanda kwa Leza. Kamuyeeyede kuti Sikweenzya nkalaki eeyi yakujulu ngu Jehova. Aboobo, ikweendela antoomwe ankalaki yakwe yakujulu kutondezya kuti tulamulemeka Jehova alimwi tulaalusyomo mu Ndomba yesu. (Int. 18:31) Bbaibbele lisyomezya kuti: “Jehova uyoobapa nguzu bantu bakwe. Jehova uyoobaleleka bantu bakwe aluumuno.” (Int. 29:11) Mbwaanga lino tuli mumbunga ya Jehova, tulijisi nguzu eezyo nzyapa alimwi tulaaluumuno oolo ndwapa bantu bakwe bakamantene mbalelekede. Inzya, tuli masimpe kuti tuyoozumanana kulelekwa kapati mbotuyaabucita kuyanda kwa Jehova lino alimwi mane kukabe kutamani.