Maleele ku Lwizi Lusalala

Mbwaakamvwida buyo kuti bana Israyeli bazwa mu Egepita, Farao wakaliyeeya kuti naatakabaleka buyo kuti baunke. Wakalailila basikalumamba bakwe kuti: ‘Amuzibambe nkalaki zyangu zyankondo zyoonse kutegwa tubatandile! Notwatabalekela kuti baunke.’ Aboobo, walo antoomwe abaalumi bakwe bakatalika kutobela bana Israyeli.

Jehova wakali kubasololela bantu bakwe, kwiinda mukubelesya kkumbi ciindi camasyikati mpoonya amulilo ciindi camasiku. Wakabasololela ku Lwizi Lusalala akubaambila kuti basimpe matente.

Mpoonya bana Israyeli bakabona Farao abaalumi bakwe kababatobela musyule. Eeci cakapa kuti basinkilwe akuba akati kalwizi abasikalumamba bana Egepita. Bakalilila Musa akwaamba kuti: ‘Sunu tulafwa! Nootuleka buyo mucisi ca Egepita.’ Pele Musa wakabaambila kuti: ‘Mutayoowi pe. Amulindile mubone Jehova mbwatiitufwutule.’ Musa wakali kumusyoma Jehova, tee kayi?

Jehova wakaambila bana Israyeli kuti banyamuke. Busiku oobo, Jehova wakabikka kkumbi akati kabana Egepita abana Israyeli. Kulubazu lwabana Egepita kwakali mudima. Pele kulubazu lwabana Israyeli kwakali mumuni.

Jehova wakaambila Musa kuti atandabike janza lyakwe alwizi. Mpoonya Jehova wakapa kuti kuunge guwo pati masiku oonse. Lwizi lwakaandaana, mpoonya akati kwakaba nzila. Mpoonya bana Israyeli banji kapati bakeenda anyika njumu, akati kamaanzi aakaimvwi kumabazu oonse kumane bakazabuka kuya mutala.

Basikalumamba ba Farao bakatobela bana Israyeli mulwizi kabeenda anyika njumu. Mpoonya Jehova wakapa kuti basikalumamba aaba banyongane. Mavwili aankalaki zyabo akatalika kusomauka. Basikalumamba bakoongolola kabati: ‘Atupiluke! Jehova nguubalwanina.’

Jehova wakaambila Musa kuti: ‘Tandabika janza lyako alwizi.’ Mpoonya-mpoonya maanzi aakaimvwi mumabali, akabawida basikalumamba bana Egepita. Farao abaalumi bakwe boonse bakafwa. Taakwe naba omwe wakafwutuka.

Kulubazu lumbi lwalwizi, nkamu mpati yabantu yakali kutembaula Leza alwiimbo lwakuti: “Atumwiimbile Jehova, nkaambo wasumpuka kapati. Ibbiza autantide alindilyo wabawaala mulwizi.” Ciindi bantu nobakali kwiimba, bamakaintu bakali kuzyana akulizya nsakalala. Boonse bakalikkomene kapati nkaambo lino bakalaangulukide ncobeni.