Bwaanda bwa Jerusalemu

Atupiluke musyule myaka misyoonto buyo. Nehemiya mubelesi wa Mwami Aritasasita, wakali muna Israyeli iwakali kukkala mumunzi wa Susani mubulelo bwa Persia. Mwanookwabo a Nehemiya wakaboola kuzwa ku Juda amulumbe wamause wakuti: ‘Bantu ibakapiluka ku Jerusalemu bali muntenda. Bwaanda alimwi amilyango yamunzi njobakanyonyoona bana Babuloni tainayakululwa pe.’ Nehemiya wakanyongana kapati. Wakali kuyanda kuunka ku Jerusalemu kutegwa akabagwasye, aboobo wakapaila kuti mwami amuzumizye kuunka.

Nokwakainda ciindi, mwami wakabona kuti Nehemiya wakaluuside. Wakaamba kuti: ‘Tandinakubwene kuusa boobu. Ino kayi?’ Nehemiya wakaingula kuti: ‘Ino ndilalekela nzi kuusa kakuli munzi wangu wa Jerusalemu uli mumatongo?’ Mwami wakamubuzya kuti: ‘Ncinzi ncoyanda kuti ndikucitile?’ Mpoonya-mpoonya, Nehemiya wakapaila mumoyo. Kumane wakaamba kuti: ‘Ndalomba undizumizye kuunka ku Jerusalemu kuyooyakulula bwaanda.’ Mwami Aritasasita wakaambila Nehemiya kuti inga waunka, alimwi mwami wakaba masimpe kuti unookwabilidwe mulweendo lwakwe lulamfwu. Alimwi wakabikka Nehemiya kuba mweendelezi wa Juda akumupa mapulanga aamilyango yamunzi.

Ciindi Nehemiya naakasika ku Jerusalemu, wakabulanga-langa bwaanda bwamunzi. Mpoonya wakabunganya bapaizi alimwi abeendelezi akubaambila kuti: ‘Tuli muntenda! Tweelede kufwambaana kutalika kubeleka.’ Bantu bakazumina, mpoonya bakatalika kuyakulula bwaanda.

Pele basinkondonyina abana Israyeli bamwi bakatalika kubafwubaazya akwaamba kuti: ‘Naba mwaaba ulakonzya kubumwaya bwaanda mbomuyaka.’ Pele balo tiibakabikkila maano kukufwubaazya ooko, muciindi caboobo bakazumanana buyo kuyaka. Bwaanda bwakalampa alimwi bwakali buyumu kapati.

Cakutayeeyela, basinkondonyina bakaboola kuzwa mumasena aaindene-indene akulwana Jerusalemu. Ciindi ba Juda nobakaamvwa makanze aabo, bakayoowa kapati. Pele Nehemiya wakati: ‘Mutayoowi pe. Jehova ulaandiswe.’ Kumane Nehemiya wakabikka balindizi kuti bakwabilile babelesi, aboobo basinkondonyina tiibakakonzya kubalwana.

Mumazuba buyo aali 52, bwaanda alimwi amilyango zyakamana kuyakwa. Nehemiya wakaita ba Levi boonse ku Jerusalemu kuti bazikusekelele. Wakababikka munkamu zyobilo zyabasikwiimba. Bakatanta atala aabwaanda kubelesya matantilo aali Kumulyango wa Kasensa mpoonya bakeenda kuzinguluka munzi. Bakalizya myeembo, zibulo zipapalete alimwi atuntimbwa mpoonya bakamwiimbila Jehova. Ezara wakeenda ankamu yomwe awalo Nehemiya ankamu iimbi, mane kusikila baakuswaangana kutempele. Bantu boonse—baalumi, bamakaintu alimwi abana—bakapa zipaizyo zyabo kuli Jehova akusekelela. Majwi aabo aalukkomano akamvwugwa kubantu bakali kule.