CIIYO 8
Zikozyanyo Zigwasya Kubona Kaambo
Matayo 13:34, 35
NCOMWEELEDE KUCITA: Amuyungizye luzyibo lwanu lwakuyiisya kwiinda mukubelesya zikozyanyo zitakatazyi kumvwa zyalo izikonzya kubakkomanisya baswiilizi banu alimwi izisalazya kaambo kayandika kapati.
MBOMUKONZYA KUCITA OOBO:
Amubelesye zikozyanyo zitakatazyi kumvwa. Mbubwenya mbuli Jesu, amubelesye zintu nzyobazyi kabotu bantu ikupandulula twaambo tuyandika kapati. Mutaambi twaambo tunji nkaambo inga twapa kuti cikozyanyo cikatazye kumvwa. Amube masimpe kuti cikozyanyo canu cileendelana ncobeni aciiyo ncomuyanda kuyiisya, kutegwa baswiilizi banu batanyongani akaambo kakuteendelana kwatwaambo tuli mucikozyanyo eeco.
Amubikkile maano kuzintu zikonzya kubagwasya baswiilizi banu. Amusale zikozyanyo nzyobazyi kabotu alimwi azintu nzyobakkomanina baswiilizi banu. Zikozyano nzyomubelesya tazyeelede kubapa kufwa nsoni naa kubanyemya.
Amuyiisye kaambo kayandika kapati. Amubikkile maano kusalazya twaambo tupati-pati, ikutali twaambo tutayi koomoonga. Amusinizye kuti muntu ngomubandika limwi atayeeyi buyo cikozyanyo, pele akaambo nkaayiya kuzwa kucikozyanyo eeco.