Kubukonzya Buyumuyumu Bwakusyomeka
‘Amulisamike buntu bupya bulengulwidwe mucinkozya ca-Leza cabululami acabusalali bwinibwini.’—BA-EFESO 4:24.
1. Nkaambo nzi ncotweelede kusyomeka kuli Jehova Leza?
IKUKONZYA buyumuyumu bwakusyomeka kulaa mbazu zinji. Icipati kwiinda nkukonzya buyumuyumu bwakusyomeka kuli Jehova Leza. Ncobeni akaambo kaciimo ncabede Jehova alimwi anzyaatucitila, alimwi akulyaaba kwesu kulinguwe, tuleelede kusyomeka kulinguwe. Ino tukutondezya buti kusyomeka kwesu kuli Jehova Leza? Inzila yakusaanguna njakusyomeka kunjiisyo zya Jehova ziluleme.
2, 3. Ino kusyomeka abululami zyeendelana buti?
2 Kutegwa tucikonzye eeco cintu ciyumu, tweelede kumvwa majwi aajanika kuli 1 Petro 1:15, 16 aakuti: “Mbuli mbwasalala oyo uwakamwiita, anywebo nobeni amusalale mukweenda kwanu koonse, nkaambo kakuti kulilembedwe kuti, Amusalale, nkaambo ndasalala mebo.” Kusyomeka kuli Jehova Leza kuyootupa kumumvwa kuziindi zyoonse, ikweendelanya mizeezo, majwi, alimwi amicito yesu akuyanda kwakwe kusalala. Eci caamba kubambilila manjezeezya mabotu, mbuli mbotulailidwe kuli 1 Timoteo 1:3-5 kuti: “Anu calo cintu ciyandwa [takuli kuyiisya ciyiisyo cimbi naa kuswiilila zyaano zyakubeja] nduyandano luzwa mumoyo uusalala amukweezeezya kubotu amulusyomo lwinilwini.” Ncobeni, kwiina umwi wesu uulondokede, pesi tweelede kusolekesya mpotugolela, embo na?
3 Kusyomeka kuli Jehova kuyootukasya kulekelezya njiisyo ziluleme. Ncobeni kusyomeka kuyootukasya kwiimpana mbotubede mukati ambotubede anze. Kusyomeka nkonkuko nkwaakali kuyeeya sintembauzyo ciindi naakaimba kuti: “Njiiyisya inzila yako, O Jehova, kuti njeende mulusinizyo lwako; mbe simoyo omwe kukulemeka izina lyako.” (Intembauzyo 86:11) Kusyomeka kuyandika ceeco icipandululwa zimwi ziindi kuti “nkumvwida zitakonzi kusinikizigwa.”
4, 5. Kusyomeka kuyootupa kucenjela, kutegwa tutatyani?
4 Alimwi kusyomeka kuli Jehova Leza kuyootukasya kucita kufwumbwa cintu cinga caliletela masampu izina lyakwe a Bwami bwakwe. Mucikozyanyo, Banakristo bamwi bobile bakaimpana kapati cakuti nobatakelede mane baakusisyanya kunkuta yanyika. Walo mubetesi nkubuzya ategwa, ‘Sena nyoonse nyobile muli Bakamboni ba Jehova?’ Kulalibonya kuti taakakonzya kuteelela ncibakali kucita munkuta bantu aba. Ma! Akomena masampu aaya. Kusyomeka kuli Jehova Leza kwakali kunoopa bakwesu abo kuti bamvwe lulayo lwamwaapostolo Paulo lwakuti: “Anukuti ncobeni ncintu cibi kulindinywe kusesana umwi mweenzinyina naaba kaniini. Sa taciindi kubota kuti mubisizigwe buyo? Sa taciindi kubota kuti muondongwe buyo?” (1 Ba-Korinto 6:7) Ncobeni inzila yakusyomeka kuli Jehova Leza njakupenga buyo muntu lwakwe kwiinda kuletela Jehova ambungano yakwe masampu.
5 Alimwi kusyomeka kuli Jehova Leza kujatikizya kutalilekelela kuyoowa muntu. “Kuyoowa muntu kulateya kakole, pele uusyoma Jehova ulakala kabotu.” (Tusimpi 29:25) Aboobo tatujokoloki pe ciindi notupenzegwa, pele tutobela cikozyanyo ca Bakamboni ba Jehova ibazwa mwakali kutegwa mu Soviet Union, mu Malawi, mu Ethiopia, alimwi amumanyika ambi manji-manji.
6. Kusyomeka kuyootukasya kusangana abani?
6 Kuti katusyomeka kuli Jehova Leza tuyoobatantamuka basinkondonyina alimwi tatukatangani cilongwe ambabo. Ncencico siciiya Jakobo ncaakalembela kuti: “Nywebo nobasimamambe, sa tamuzi kuti kutangana buzwalani anyika, nkokulwana a-Leza? Eno kufumbwa muntu uulisalila kuba muzwalani wanyika walicita sinkondonyina a-Leza.” (Jakobo 4:4) Tuyanda kusyomeka munzila Mwami Davida njaakatondezya ciindi naakati: “Sa nsisulide abo bakusula, O Jehova? Sa nsisesemwi kulibaabo bakubusizya inkondo? Ndibasulide alusulo luyoosya. Ndabaamba kuti mbasinkondoma.” (Intembauzyo 139:21, 22) Tatuyandi kutangana cilongwe ababisya acaali, nkaambo taakwe mpotweendelana ambabo. Sena kusyomeka kuli Leza takukootukasya kwiizya abasinkondonyina Jehova bali boobu, kube cakaanzambwene, naa kwiinda mukubeebela mutelevizyini?
Kuvwuninina Jehova
7. Kusyomeka kuyootugwasya kumucitila nzi Jehova, alimwi mbuti Elihu mbwaakacicita eci?
7 Kusyomeka kuyootupa kuti tumuvuninine Jehova Leza. Ino tujisi citondezyo cibotu cakucita boobu muli Elihu! Jobu 32:2, 3 ilatwaambila kuti: “Lino Elihu . . . wakamukalalila Jobu nkaambo wakalicita mubotu kwiinda Leza. Alimwi wakapya moyo kubazwalani bakwe botatwe nkaambo teebakamuvuwa kabotu nekuba kumubeteka Jobu mbuli uutaluleme.” Muli Jobu caandaano ca 32 kusika ku 37, Elihu ulamuvwuninina Jehova. Mucikozyanyo wakati: “Kolindila buniini, njookutondezya mbokuli ndeelede kwaambilila Leza. Ndilalumba Mulengi wangu, . . . Ulalumbula baluleme.”—Jobu 36:2-7.
8. Nkaambo nzi ncotuyandika kumuvwuninina Jehova?
8 Nkaambo nzi ncokuyandika kumuvwuninina Jehova? Sunu Leza wesu Jehova ulatukilwa munzila zinji-zinji. Kulaambwa kuti tawo pe, ikuti ncibeela cimwi mu Butatu, ikuti ibantu ubapenzyabulanga mumulilo utamani wahelo, akuti ulibeja kusandula banyika, tabalanganyi bantunsi, alimwi azimwi-zimwi. Tulatondezya kuti tulasyomeka kulinguwe kwiinda mukumuvwuninina akusinizya kuti walo Jehova nkwali; akuti ngu Leza musongo, mululami, ngusinguzu zyoonse alimwi ngusiluyando; akuti ubikkide ciindi cazintu zyoonse; alimwi akuti caakusika ciindi, uyoomanya bubi boonse akucita kuti nyika yoonse ikabe paradaiso. (Mukambausi 3:1) Eeci ciyanda kuti tubelesye ciindi coonse cijanika ikupa bukamboni kuzina lya Jehova aku Bwami bwakwe.
Kusyomeka Kumbunga ya Jehova
9. Muutwaambo nzi bamwi mobalitondezya kutasyomeka?
9 Lino twaboola kumakani aakusyomeka kumbunga ya Jehova iilibonya. Mmasimpe, tuleelede kusyomeka kulinjiyo, kubikkilizya “[a]muzike musyomesi uucenjede,” walo uli nenzila, imbungano Yabanakristo mwiisanininwa munzila yakumuuya. (Matayo 24:45-47) Ino kuti cimwi cintu cazwa mumalembe aa Watch Tower ncotutateelede naa ncotutazuminide aciindaawo. Inga tulatyani? Sena nkunyema akusiya mbunga? Mbombubo bamwi mbobakacita cimwi ciindi Ngazi Yamulindizi myaka minji yainda niyakabelesya cizuminano cipya kupandulula Cuulu Camyaka. Bamwi bakanyema kubona nciyakaamba Ngazi Yamulindizi kumakani aakutabaa lubazu. Aabo ibakalebwa kutwaambo otu nobakasyomeka kumbunga akubanyina, nobakalindilila Jehova kuti atusalazye twaambo oto, mbuli mbwaakazoocita kuciindi cakwe mwini. Aboobo kusyomeka kulabikkilizya kulindilila cakukkazika moyo kusikila limwi kuteelela kumbi kwamwaigwa amuzike musyomesi uucenjede.
10. Kusyomeka kuyootukasya kulombozya kuziba nzi?
10 Kusyomeka kumbunga ya Jehova alimwi caamba kutasangana abasiluleyo munzila iili yoonse. Banakristo basyomeka tabakalombozyi kuziba makani ngobajisi bantu bali boobu. Mmasimpe, aabo ibabelesegwa a Jehova Leza kweendelezya mulimo wakwe anyika tabalondokede pe. Ino Jwi lya Leza lyalo litwaambila kutyani? Sena nkusiya mbunga ya Leza? Peepe. Luyando lwabunyina lweelede kutupa kuzumanana kusyomeka kulinjiyo, alimwi tweelede kuzumanana ‘kuyandana camyoyo acanguzu.’—1 Petro 1:22.
Kusyomeka Kubaalu Basyomeka
11. Kusyomeka kuyootugwasya kulikasya kuyeeya mizeezo nzi iitagwasyi?
11 Ciindi nokwaambwa naa nokucitwa cimwi cintu mumbungano icatuyumina kuteelela, ikusyomeka kuyootukasya kuzumbauzya ncocaambilwa naa ncocacitilwa, alimwi kuyootugwasya kubaa muzeezo wakuti ndiza mbobacibona obo. Sena inga tacikooinda loko kugwasya kuyeeyesya mbazu zyabo zibotu ibaalu babikkidwe alimwi abambi basyomima kwiinda nzyobalezya? Ee, tuyanda kulikasya kuyeeya koonse kubi kuli boobu, nkaambo kuliswaangene akutasyomeka! Kusyomeka alimwi kuyootugwasya kuti tumvwe kulailila kwa Paulo ‘ikwakutasampaula muntu pe.’—Tito 3:1, 2.
12, 13. Mbuyumuyumu nzi ikapati baalu mbobajana?
12 Kusyomeka kuletela baalu buyumuyumu bumwi bupati. Bumwi obu buyumuyumu bujatikizya kubamba maseseke. Umwi simbungano ulakonzya kwaambila mwaalu kaambo kakwe kamaseseke. Kusyomeka kuli yooyo inga kwamugwasya mwaalu kutalekelezya njiisyo yakubamba maseseke. Uyoomvwa lulayo luli ku Tusimpi 25:9 ilwakuti: “Utayubununi makani aasisidwe aamuntu umbi.” Eco caamba kuti nokuba kumukaintu wakwe!
13 Baalu abalo balajana masunko ambi aakusyomeka. Sena bayooba basikukkomanisya bantu, naa bayoobagwasya cabusicamba acabubombe aabo ibayandika kululamika, nokuba kuti mbasazinyina naa mbalongwe babo? Kusyomeka kumbunga ya Jehova kuyoopa kuti ibaalu akati kesu kabasola kugwasya kufwumbwa bayandika lugwasyo munzila yakumuuya. (Ba-Galatiya 6:1, 2) Nokuba kuti tuyooambaula caluse, ikusyomeka kuyootupa kwaamba cakaanzambwene kubaaluma, mbuli Paulo mbwaakaambila mwaapostolo Petro cakaanzambwene. (Ba-Galatiya 2:11-14) Kulubazu lumbi balangizi bayanda kucenjela kuti ndiza mumicito itali yabusongo naa mukulitondezya kusala naa munzila imwi babubelesya bubi bweendelezi bwabo, inga baciyumya kubantu bali mumaanza abo ikusyomeka kumbunga ya Leza.—Ba-Filipi 4:5.
14, 15. Nzintu nzi zinga zyasunka kusyomeka kwabasimbungano?
14 Nkozili azimbi mbazu zyakaambo aaka izyakukonzya buyumuyumu bwakusyomeka kumbungano alimwi abaalu bayo. Kuti kakuli penzi limwi mumbungano, eci citupa ciindi cakuti tulitondezye kusyomeka kuli Jehova akulibaabo ibamwiiminina. (Amubone The Watchtower, June 15, 1987, mapeeji 15-17.) Ciindi nokugwisigwa umwi mumbungano, kusyomeka kuyanda kuti tubagwasilizye baalu, kutali kusola kuzumbauzya naa ncobeni kwakali kaambo kazulide kakucita boobo.
15 Alimwi kusyomeka kumbungano kuyanda kuti tugwasilizye miswangano yoonse yosanwe mbuli mubukkale mbotukkede alimwi ambotukonzya. Kusyomeka kuyanda kuti tutaide kunoojanika buyo lyoonse kulinjiyo pele katulibambilide alimwi katwiingula cakuyakilila notwapegwa ciindi.—Ba-Hebrayo 10:24, 25.
Kusyomeka Mulukwatano
16, 17. Mbuyumuyumu nzi bwakusyomeka mbobajana Banakristo bakwetene?
16 Nkuuli ni kumbi nkotweelede kusyomeka? Kuti katukwete naa katukwetwe, akaambo kakukonkezya kwalukwatano, tweelede kubukonzya buyumuyumu bwakusyomeka kuli yooyo ngotukwetene limwi. Kusyomeka kulingotukwetene limwi kuyootukasya kulubizya kwiinda mukulibosya-bosya kuli bamakaintu bambi naa bamaalumi bambi kwiinda kumukaintu wesu naa mulumi wesu. Kusyomeka kuli ngomukwetene limwi alimwi kuyanda kuti twatayubununa tumpenda naa kulezya kwakwe kubantu baanze. Ncintu cuubauba ikutongaukila bambi kwiinda kubeleka canguzu kuti kubandika kakujukide lyoonse angotukwetene limwi, calo ncotweelede kucita ikweendelana a Mulawo Mubotu. (Matayo 7:12) Ikwaamba ncobeni, kuba mulukwatano kuletela buyumuyumu bwini kukusyomeka kwesu kwa Bunakristo.
17 Kutegwa tubukonzye buyumuyumu bwakusyomeka, tatweelede kwiide kutantamuka kutalilemeka kwini-kwini, pele njiyona mizeezo amyoyo yesu tweelede kwiikwabilila. (Intembauzyo 19:14) Mucikozyanyo, kuti myoyo yesu yalucengo kiili milyato kukulikondelezya, akukulikkomanisya, ncintu cuuba-uba ikuzwa mukweebelela buyo kuya mukulombozya. Kakulwaizya kusyomeka kwamulukwatano, Mwami Solomoni ulabalaya bamalumi mumaambila mbali kuti “konywa maanzi kumukalo wako omwini.” (Tusimpi 5:15) Alimwi Jesu wakaaamba kuti: “Umwi aumwi uulangilila mwanakazi cakumusukama ulimucitide kale bumambi mumoyo wakwe.” (Matayo 5:28) Bamalumi aabo balipenda kweebelela zifwanikiso zyacisapi bali muntenda yakoongelezegwa bumambi, ikucenga bamakaintu babo akutasyomeka kulimbabo. Munzila njiyonya, mukaintu uulipenda kubaa muuya wamuzipekupeku zyabukkale izitondezya mamambe ulakonzya kuyungwa kutasyomeka kumulumaakwe. Pesi kwiinda mukusyomeka ncobeni kuliyooyo ngotukwetene limwi, tulaluyumya lukwatano, alimwi tulagwasyanya mukusola kubotezya Jehova Leza.
Lugwasyo Lwakuzumanana Kusyomeka
18. Nkuziba nzi ikunga kwatugwasya kusyomeka?
18 Ncinzi ciyootugwasya kukonzya buyumuyumu bwakusyomeka mumbazu zyone ezi: kusyomeka kuli Jehova, kumbunga yakwe, akumbungano, akuli ngotukwetene limwi? Cimwi cinga cagwasya nkuziba kuti kubukonzya buyumuyumu bwakusyomeka kuliswaangene akusinizya bulelo bwa Jehova. Ee, kwiinda mukuzumanana kusyomeka tulatondezya kuti Jehova ngotubona kuba Muleli Wazyoonse. Oobu tulakonzya alimwi kulisyoma akulangila buumi butamani munyika mpya ya Jehova. Tulakonzya kuligwasya kusyomeka lyoonse kwiinda mukulangisya zikozyanyo zyakusyomeka, kuli Jehova mane kusikila kulibaabo ibabandaukwa mu Bbaibbele alimwi amumabbuku esu aa Watch Tower, kubikkilizya aziluulwa mu Yearbook.
19. Ino lusyomo lulaa lubazu nzi mukusyomeka kwesu?
19 Lusyomo luyumu muli Jehova Leza alimwi akuyoowa kumubisizya kuyootugwasya kubukonzya buyumuyumu bwakusyomeka. Tulaluyumya lusyomo lwesu muli Jehova alimwi akumuyoowa kwesu kwiinda mukusungwaala kwiiya Jwi lya Leza alimwi kwiinda mukutola lubazu mumulimo wa Bunakristo. Eeci ciyootugwasya kucita ceendelana alulayo lwa Paulo ilulembedwe ku Ba-Efeso 4:23, 24 ilwakuti: “Muleelede kubukuluka mumuuya wakuyeeya kwanu, akulisamika buntu bupya bulengulwidwe mucinkozya ca-Leza cabululami acabusalali bwinibwini.”
20. Mbube nzi bupati kwiinda ibuyootugwasya kusyomeka kuli Jehova alimwi akuli bambi boonse beelede?
20 Kuziba bube bwa Jehova kulatugwasya kusyomeka. Icipati kwiinda ncakuti iluyando lwesu kuli Taata wesu wakujulu ilwakutaliyanda, alimwi akulumba zyoonse zyatucitilide, ikumuyanda amoyo wesu woonse, abuumi bwesu boonse, amizeezo yesu anguzu zyesu kuyootugwasya kusyomeka kulinguwe. Kunze lyaboobo, ikubaa luyando olo Jesu ndwaakaamba kuti ndulwakali kuzoozibya basikumutobela, kuyootugwasya kusyomeka ku Banakristo boonse mumbungano amumukwasyi wesu. Munzila imbi inga caambwa kuti kaambo aaka kajatikizya kuliyanda naa kutaliyanda. Kutasyomeka caamba kuliyanda. Kusyomeka caamba kutaliyanda.—Marko 12:30, 31; Johane 13:34, 35.
21. Ino kaambo kakukonzya buyumuyumu bwakusyomeka inga kafwiinsigwa buti?
21 Ikufwiinsya kaambo: Kusyomeka mbobube bwini-bwini butondezegwa a Jehova Leza, a Jesu Kristo, alimwi ababelesi ba Jehova beni-beni boonse. Kutegwa tuyanzane kabotu a Jehova Leza, tuleelede kubukonzya buyumuyumu bwakusyomeka kulinguwe kwiinda mukutobela ziluleme nzyayanda, kwiinda mukutasangana abasinkondonyina munzila iili yoonse, akuvwuninina Jehova mukupa bumboni mumulimo amukwiizya. Alimwi tweelede kubukonzya buyumuyumu bwakusyomeka kumbunga ya Jehova iilibonya. Tweelede kusyomeka kumbungano zyesu akusyomeka kuli mbotukwetene limwi. Kwiinda mukubukonzya buyumuyumu bwakusyomeka, tunootola lubazu mukusinizya bulelo bwa Jehova, alimwi tunooima kulubazu lwakwe mukaambo aka. Munzila eyi tuyoojana luyando lwakwe akutambula bulumbu bwabuumi butamami. Ncaakaamba mwaapostolo Paulo kujatikizya kukomba cilakonzya alimwi kwaambwa kumani aakubukonzya buyumuyumu bwakusyomeka. Kulagwasya mubuumi obu bwaino alimwi amubuumi obo buciboola.—Intembauzyo 18:25; 1 Timoteo 4:8.
Inga Mwaingula Buti?
◻ Muunzila nzi motunga twabukonzya buyumuyumu bwakusyomeka kuli Leza?
◻ Ino kusyomeka kumbunga ya Jehova kuyanda nzi kulubazu lwesu?
◻ Mbuti baalu mbobanga babukonzya buyumuyumu bwakusyomeka?
◻ Mbuyumuyumu nzi bwakusyomeka Banakristo bakwetene mbobajana?
◻ Mbube nzi ibuyootugwasya kubukonzya buyumuyumu bwakusyomeka?
[Cifwanikiso icili apeeji 28]
Kusyomeka kuli basimbungano kuyookasya baalu kuyubununa twaambo twamaseseke
[Zifwanikiso izili apeeji 29]
Kusyomeka kumukaako kulaluyumya lukwatano