Ikubeleka Cakusyomeka Ambunga ya Jehova
“Kuli yooyo usyomeka, ulasyomeka.”—2 SAMUELE 22:26, NW.
1, 2. Ino nzikozyanyo nzi zyakusyomeka toonse nzyotunga tulabona mumbungano?
AAKATI kamasiku mwaalu ulibambila makani ngayakubandika kumbungano ya Bunakristo. Moyo umwaambila kuti aleke alyookezye; pele uluujisi kubeleka, kayandaula zikozyanyo zyamu Magwalo iziyakukulwaizya butanga. Ibuzuba bwamuswaangano masiku, banabukwetene bobile bazyali ibakatede balombozya kulyookezya kuŋanda aciindi ncoonya eco camasiku; pele mumoyo ukkede basola kugwasya bana kulibambila kuya kumuswaangano wambungano. Nowamana muswaangano, Banakristo balibunga antoomwe kubandika mbwaabede makani ngaabandika mwaalu oyu. Umwi mucizi watiyungwe kwaamba kuti cimwi ciindi wakanyemezegwa amukwesu ngweena oyu; pele mumuuya wabusungu waamba kaambo kamwi kabandikwa mumakani aamwaalu. Sena mwabona cintu comwe icijanika mumbazu zyoonse ezi?
2 Eco cintu nkusyomeka. Mwaalu ulabeleka cakusyomeka kugwasya butanga bwa Leza; bazyali balajanika kumiswaangano yambungano cakusyomeka; mucizi ulagwasilizya baalu cakusyomeka. (Ba-Hebrayo 10:24, 25; 13:17; 1 Petro 5:2) Ee, mumbazu zyoonse zyabukkale, tulababona bantu ba Leza kabasungweede kubelekela antoomwe ambunga ya Jehova cakusyomeka.
3. Nkaambo nzi ncociyandika kapati kuti lyoonse katusyomeka kumbunga ya Jehova yaansi?
3 Ciindi Jehova nalanga nyika eyi iinyongene, ubona bantu basyoonto kapati basyomeka. (Mika 7:2) Ino talikkomanini ciindi nabona kusyomeka kwabantu bakwe! Ee, kusyomeka kwanu kulamukonda. Eeci cilamunyemya Saatani, muzangi wamatalikilo, alimwi cisinizya kuti mubeji. (Tusimpi 27:11; Johane 8:44) Kamuyeeyede kuti Saatani ulasola kumukasya kusyomeka kuli Jehova alimwi akumbunga yakwe yaansi. Atubone nzila Saatani nzyacita boobo. Eci cilatugwasya kubona kabotu mbotunga twazumanana kusyomeka kusikila kumamanino.—2 Ba-Korinto 2:11.
Lyoonse Kulanga Kutalondoka Kupa Kutasyomeka
4. (a) Nkaambo nzi ncocili citete kutongooka baabo bali muzyuuno zyabweendelezi? (b) Mbuti Kora mbwaakatondezya kutasyomeka kumbunga ya Jehova?
4 Kuti mukwesu ujisi cuuno cipati, abwalo bubi bwakwe nobuboneka kapati. Tacilyuubaubili kaka kulanga ‘kapapu kali muliso lyamunyoko pele, kolekede itanda lili muliso lyako’! (Matayo 7:1-5) Pele kulanga bubi bwabantu kulakonzya kuleta kutasyomeka. Mucikozyanyo, amuyeeye kwiindana kwakaliko akati ka Kora a Davida. Kora wakalijisi cuuno cipati alimwi ulangilwa kuti wakali kusyomeka kwamyaka minji, pele wakayandisya lusumpuko. Wakatalika kukazya bulelo bwa Musa a Aroni basazinyina. Nokuba kuti Musa wakali mubombe kwiinda boonse bantu, Kora wakatalika kumujanina mulandu. Ulakonzya wakabona bubi bwa Musa. Pele bubi obo teebwakamupa mulawo Kora wakutasyomeka kumbunga ya Jehova. Wakanyonyoonwa mumbungano.—Myeelwe 12:3; 16:11, 31-33.
5. Nkaambo nzi Davida ncaakali kukonzya kuyeeya kuzangila Saulo?
5 Kuli Davida wakali kubelekela Mwami Saulo. Nokuba kuti wakali mwami mubotu, Saulo wakazikubija. Davida wakali kuyandika lusyomo, kuliyumya alimwi akucenjela kutegwa atanyonyooki ciindi naakali kulwanwa amwami Saulo simunyono. Pele ciindi Davida naakaba acoolwe cakujosya cibi, wakaamba kuti ‘Jehova amulesye’ kubweza ntaamu yakutasyomeka kuli yooyo Jehova ngwaakananika.—1 Samuele 26:11.
6. Nokuba kuti twabona kuti baalu balalubizya, ncinzi ncotuteelede kucita?
6 Ciindi bamwi batusololela nobalibonya kuti balubizya mukukosola twaambo, babelesya majwi aabukali, naa ambweni batondezya kusala, sena tulabatongooka, akuyungizya ambweni muuya wakutongooka mumbungano? Sena tulatakata kuunka kumiswaangano ya Bunakristo kutondezya kuti tulicimidwe? Peepe! Mbubonya mbuli Davida, tatukooleka kusyomeka kuli Jehova akumbungano yakwe akaambo kakulubizya kwabamwi!—Intembauzyo 119:165.
7. Ino milimo nzi iitali kabotu yakatalika kucitwa mu tempele lyaku Jerusalemu, elyo ino Jesu wakalimvwa buti amilimo eyo?
7 Cikozyanyo camuntu walikusyomeka kwiinda boonse ngu Jesu Kristo, uuambwa mubusinsimi kuti “uusyomeka” wa Jehova. (Intembauzyo 16:10, Chitonga Bible 1996) Ikusyomeka cakaba cintu ciyumu naakabona nzila mbyaabi njoyakali kubelesegwa tempele ku Jerusalemu. Jesu wakalizi kuti mulimo wamupaizi mupati alimwi azipaizyo nzyaakali kucita zyakali kwiiminina mulimo ngwakali kuzoocita alimwi alufwu lwacipaizyo ndwaakali kuzoofwa, alimwi wakalizi mbokuyandika kapati kuti bantu baiye kwiinda muzintu ezyo. Aboobo wakakalala munzila yabululami ciindi naakabona kuti tempele yasandulwa, yaba “ikoba lyababbi.” Kwiinda munguzu nzyaakamupa Leza, iziindi zyobile wakabweza ntaamu zyakwiisalazya.a—Matayo 21:12, 13; Johane 2:15-17.
8. (a) Ino Jesu wakatondezya buti kusyomeka kububambe bwatempele? (b) Mbuti mbotunga twatondezya kuti tulakkomana kukomba Jehova mumbunga yakwe iisalala?
8 Nokuba boobo Jesu wakali kugwasilizya kutempele cakusyomeka. Ikuzwa kubwana, wakali kuunka kumapobwe aakali kucitwa nkuko alimwi wakali kuyiisya mutempele. Nouba mutelo watempele wakaubbadela—nokuba kuti tanaakali kuyandika kucita boobo. (Matayo 17:24-27) Jesu wakamulumbaizya mukamufwu wakali mucete akaambo kakuti wakabikka “zyoonse nzyajisi” muciyobwedo catempele. Nokwakainda ciindi cisyoonto buyo kuzwa leelyo, Jehova wakaikakila limwi tempele eyo. Pele Jesu wakali kusyomeka kulinjiyo kusikila ciindi eco. (Marko 12:41-44; Matayo 23:38) Mbunga ya Leza yaansi yamazubaano ilijisi bulemu bupati kapati kwiinda bubambe bwaba Juda atempele lyabo. Pele, tailondokede pe; nkakaambo kaako kanjikanji zintu zilacincwa cimwi ciindi. Nokuba boobo taisofweede pe, alimwi Jehova Leza takaigwisyi akubikka imbi abusena bwayo. Tatweelede kucimwa akutondezya muuya wakutongooka-tongooka akaambo kakutalondoka kwazintu nkotubona mulinjiyo. Pele atusyomeke mbweena mbuli Jesu Kristo.—1 Petro 2:21.
Kutalondoka Kwesu
9, 10. (a) Mbuti bweende bwa Saatani mbobubelesya kutalondoka kwesu kutuyunga kunjila bukkale bwakutasyomeka? (b) Ncinzi muntu wacita cinyonyoono cipati ncayelede kucita?
9 Saatani alimwi usola kukulwaizya kutasyomeka kwiinda mukubelesya kutalondoka kwesu. Bweende bwakwe bwazintu bubelesya kutalondoka kwesu ikutusunka kucita cintu cibi mumeso a Jehova. Mukubula coolwe, mwaka amwaka zyuulu zyabantu zilawa akaambo kabwaamu. Bamwi balaindizya kutondezya ciimo cakutasyomeka kwiinda mukupona buumi bwakuupaupa ameso, balazumanana kucita zibi kumwi kabalicengeezya kuti Mbanakristo basyomeka. Kaamba zibalo zyamu “Young People Ask . . .” izyakatobelene mumagazini ya Awake! izijatikizya kaambo aka, umwi musimbi wakalemba kuti: “Eezyo zibalo zyakali kwaamba buumi mbondakali kupona.” Icakusisikizya, wakali kweenda abakubusi batakali kuyanda Jehova. Ino ncinzi cakacitika? Wakalemba kuti: “Ibuumi bwangu bwakanyongana, alimwi ndakalinjizya mubwaamu, elyo ndakasinswa. Icilongwe cangu a Jehova cakanyongana alimwi bazyali bangu abaalu bakaleka kundisyoma.”b
10 Oyu musimbi wakagwasigwa abaalu, elyo wakatalika alimwi kubelekela Jehova cakusyomeka. Pele, mukubula coolwe, banji balinjizya mupenzi pati kwiinda waawa, alimwi bamwi tabajokeli mumbunga. Kaka cilagwasya kusyomeka akutalizumizya kuwa akaambo kamasunko munyika eyi mbyaabi! Amuteelele kucenjezegwa kwamu mamagazini aa Ngazi Yamulindizi alimwi a Awake! kumakani aakuyanzana aabanyika alimwi akutola lubazu muzilikondelezyo zisofweede. Kutakabi nomulinjizya mubukkale bwakutasyomeka. Ikuti naa mwalijana mubukkale obo, mutataliki kuupaupa ameso. (Intembauzyo 26:4) Pele, amujane lugwasyo. Oyo ngomulimo wabazyali Banakristo alimwi abaalu.—Jakobo 5:14.
11. Nkaambo nzi ncocitali kabotu kulibona kuti tulibabi batakwe abugwasye, alimwi ncikozyanyo nzi camu Bbaibbele icinga catugwasya kululamika kuyeeya kwamusyobo oyo?
11 Ikutalondoka kwesu kulakonzya kwatuletela penzi limbi. Bamwi ibabweza ntaamu yakutasyomeka balekela limwi kusola kukkomanisya Jehova. Mutalubi kuti Davida wakacita zinyonyoono zipati loko. Nokuba boobo kakuli kwainda ciindi cilamfwu kuzwa ciindi naakafwa Davida, Jehova wakamuyeeya kuti wakali mubelesi wakwe uusyomeka. (Ba-Hebrayo 11:32; 12:1) Ino nkaambo nzi? Nkaambo tanaakaleka kusoleka kukkomanisya Jehova. Ilugwalo lwa Tusimpi 24:16 lwaamba kuti: “Nkaambo uululeme, nekuba kuti ulawa ziindi zili musanu azibili, ulabuka.” Aboobo, kuti katuwida muzinyonyoono zisyoonto—ee ciindi aciindi—akaambo kakuti tulimukulwana cisusi cimwi catukatazya, Jehova ambweni ucinootubona kuba balulami kuti twazumanana ‘kubuka’—nkokuti naa tweempwa cini-cini akutalika alimwi kumubelekela cakusyomeka.—Amukozyanisye 2 Ba-Korinto 2:7.
Amucenjelele Nzila Zyakutasyomeka Izitalibonyi!
12. Mbuti kusiminina mulawo mbokwakapa kuti ba Falisi batasyomeki?
12 Ikutasyomeka alimwi kulaboola munzila zitalibonyi. Kulakonzya kulitondezya mbuli kuti nkusyomeka! Mucikozyanyo, bama Farisi bamuciindi ca Jesu ambweni bakali kuliyeeyela kuti mbantu basyomeka kapati.c Pele bakaalilwa kubona kwaandaana akati kamuntu uusyomeka amuntu uusiminina milawo yabantu, nkaambo bakali bantu batongooka kapati. (Amukozyanisye a Mukambausi 7:16.) Munzila eyi teebakali kusyomeka pe—kubantu mbobakali kweelede kuti kabagwasya, kukaambo ncowakabikkilwa Mulawo ngobakali kulyaamba kuti mbaasikuyiisya alimwi akuli Jehova. Pele walo Jesu wakali kusyomeka kukaambo ncowakabikkilwa Mulawo, ikakali kujatikizya luyando. Aboobo wakali kuyumya akukulwaizya bantu mbweena mbuli bwakasinsimwa mubusinsimi bwabu Mesiya.—Isaya 42:3; 50:4; 61:1, 2.
13. (a) Mbuti bazyali Banakristo mbobanga batola nzila yakutasyomeka? (b) Nkaambo nzi bazyali ncobateelede kukalala munzila itayelede, nokuba kutongooka nobalaya bana babo?
13 Banakristo bajisi mukuli wabweendelezi balakonzya kugwasigwa kapati kuti batobela citondezyo ca Jesu. Mucikozyanyo, bazyali basyomeka balizi kuti beelede kulaya bana babo. (Tusimpi 13:24) Nokuba boobo balasola kubona kuti tabanyemyi bana babo baniini kwiinda mukubalaya munzila yabukali nokuba kubatongooka lyoonse. Ibana balimvwa kuti tabakonzyi kukkomanisya bazyali babo naa abo balimvwa kuti kukomba kwabazyali kulibonya anga nkokubapa kuba basikutongooka balakonzya kutyompwa, elyo eci inga cabapa kuti bazanduke bazwe mulusyomo lwakasimpe.—Ba-Kolose 3:21.
14. Mbuti Banakristo beembezi mbobanga batondezya kusyomeka kubutanga mbobabelekela?
14 Mbubonya buyo baalu Banakristo abalangizi beendeenda basola kubona mapenzi antenda zilangilwa kunyonganya butanga. Mbobali beembezi basyomeka, balapa lulayo nokwayandika kucita boobo, kabasinizya saansi makani oonse alimwi tabaambi zyamumutwe wabo, babelesya Bbaibbele kabotu-kabotu amabbuku aa Sosaiti. (Intembauzyo 119:105; Tusimpi 18:13) Alimwi balizi kuti mbelele zisyoma muli mbabo kuti balaziyaka akuzisanina munzila yakumuuya. Aboobo basola kutobela Jesu Kristo Mweembezi Mubotu. Babelekela mbelele cakusyomeka mumiswaangano ya Bunakristo ya nsondo ansondo—kabatazityompyi, pele kabazikulwaizya akuyumya lusyomo lwazyo.—Matayo 20:28; Ba-Efeso 4:11, 12; Ba-Hebrayo 13:20, 21.
15. Mbuti bamwi mumwaanda wakusaanguna mbobakatondezya kuti bakali kusyomeka butayelede?
15 Aimbi nzila yakutasyomeka italibonyi nkusyomeka munzila italuzi. Ikusyomeka kwini-kwini kwaambwa mu Bbaibbele takweendelani akusyomeka kuli koonse kunga kwatulesya kusyomeka kuli Jehova Leza. Bama Juda banji bamumwaanda wakusaanguna bakayuminina kutobela Mulawo wa Musa alimwi abweende bwazintu bwama Juda. Anu kuti ciindi cakasika cakuti Jehova agusye cileleko cakwe kumusyobo oyo muzangi akucitola kumusyobo wa Israyeli wakumuuya. Mbasyoonto bakasyomeka kuli Jehova, ibakacinca kutegwa beendelane abweende bwazintu obu bupya. Nomuba munkamu ya Banakristo beni-beni, kuli bamwi bama Juda bakazumanana kupilukila ‘kunjiisyo zyabuyo eezyo zinyina mulimo’ izya Mulawo wa Musa zyalo zyakazuzikizigwa muli Kristo.—Bagalatiya 4:9; 5:6-12, Ci; Ba-Filipi 3:2, 3.
16. Ino babelesi ba Jehova basyomeka batyani zintu nozyacinca?
16 Pele balo bantu ba Jehova sunu basyomeka nomuba muziindi zintu nozyacinca. Mumuni waluzibo lwakasimpe mbouyabuvwula, izintu zilacincwa. (Tusimpi 4:18) Ino-ino, “muzike musyomesi uucenjede” wakatugwasya kuteelela kabotu majwi aakuti “izyalani” aabelesegwa ku Matayo 24:34 alimwi aciindi calubeteko lwa “imbelele ampongo” ilwaambwa ku Matayo 25:31-46 alimwi ambotweelede kwiilanga milimo imwi Banakristo njobaambilwa kucita kugwasyilizya lyankondo. (Matayo 24:45) Cakutadooneka, basiluleyo bali kunookkomana kuti bunji bwa Bakamboni ba Jehova nobakasiminina nzila njotwakali kuteelela zintu kaindi, katutayi ambele. Taakwe nocacitika boobu pe. Ino nkaambo nzi? Nkaambo bantu ba Jehova balasyomeka.
17. Mbuti kusyomeka kwesu mbokusunkwa abayandwa besu zimwi ziindi?
17 Nokuba boobo ikusyomeka kutaluzi kulakonzya kutujatikizya andiswe. Ciindi mweenzuma ngotumvwana limwi kapati naa musazima wamumukwasyi naasala nzila imwi iiteendelani anjiisyo zya Bbaibbele, tulakonzya twalimvwa kuti twaandaana mukusyomeka kwesu. Masimpe tuleelede kusyomeka kubanamukwasyi. Pele tatweelede kusyomeka kulimbabo kwiinda mbotusyomeka kuli Jehova! (Amukozyanisye a 1 Samuele 23:16-18.) Tatukoogwasya basimucita zibi ikusisa cibi cipati nokuba kugwasyanya ambabo kukazya baalu ibasola ‘kubaboozya amyoyo iibombede.’ (Ba-Galatiya 6:1) Ikucita boobo citondezya kutasyomeka kuli Jehova, kumbunga yakwe alimwi akumuyandwa wesu. Atwaambe kuti, ikusinkila sizibi kululayo ndwayandika kutambula nkukasya luyando lwa Jehova kuti lutamusiki. (Ba-Hebrayo 12:5-7) Alimwi mutalubi kuti “kuyasa kwamuzwalani kulasyomeka.” (Tusimpi 27:6) Ikulaya muluyando cakutainda ambali ikubelesya Jwi lya Leza kulakonzya kumucisa muyandwa wabisya uulisumpula, pele kumbele aamazuba kulakonzya kufwutula buumi bwakwe!
Ikusyomeka Takumani Nociba Ciindi Cakupenzegwa
18, 19. (a) Ncinzi Ahabu ncaakali kuyanda kuli Naboti, alimwi nkaambo nzi Naboti ncaakakakila? (b) Sena icakacitika kulinguwe njempindu yakusyomeka kwakwe njaakeelede kujana? Amupandulule.
18 Cimwi ciindi Satani utugama buya nalwana kusyomeka kwesu. Amuyeeye cikozyanyo ca Naboti. Ciindi Mwami Ahabu naakamusinikizya kusambala muunda wakwe wamasaansa, wakaingula kuti: “Cilatonda kumeso aa-Jehova kukupa lukono lwabamatata.” (1 Bami 21:3) Aawa Naboti tanaakali kusoleka kusyupa buyo pe; ooku kwakali kusyomeka nkwaakatondezya. Mulawo wa Musa wakali kulailila kuti kunyina muna Israyeli naba omwe weelede kusambala lukono lwanyika kwaciindi cilamfwu. (Levitiko 25:23-28) Aino Naboti wakalizi kuti ooyu mwami mukali inga wamujaya nkaambo Ahabu wakajaide kale basinsimi ba Jehova banji kwiinda mumukaintu wakwe Jezebeli! Nokuba boobo Naboti wakayuma.—1 Bami 18:4.
19 Ikusyomeka cimwi ciindi cileta mapenzi. Jezebeli kwiinda mulugwasyo lwabantu “bana ba-Saatani,” wakamupa kaambo Naboti nkaatakacita. Aboobo wakajaigwa abana bakwe basankwa. (1 Bami 21:7-16; 2 Bami 9:26) Sena eci caamba kuti kusyomeka kwa Naboti teekwakaluzi? Peepe! Naboti uli akati kabaalumi abanakazi banji ‘ibacipona’ asunu mumoyo wa Jehova, ibali mukoona cakuliiba muzyuumbwe kusikila mane ciindi cabubuke.—Luka 20:38; Incito 24:15.
20. Mbuti bulangizi mbobunga bwatugwasya kuzumanana kusyomeka?
20 Eco alimwi ncecisyomezyo cabantu ba Jehova basyomeka sunu. Tulizi kuti kusyomeka kwesu kulakonzya kutuletela mapenzi kapati munyika omuno. Jesu Kristo wakajaigwa akaambo kakusyomeka, alimwi wakaambila basikumutobela kuti abalo bayakwiinda mumapenzi ngaakainda. (Johane 15:20) Icakamuyumya mbulangizi bwakwe bwakumbele, elyo andiswe tulakonzya kuyumizigwa kwiinda mubulangizi bwesu. (Ba-Hebrayo 12:2) Eci cilakonzya kutugwasya kuzumanana kusyomeka notupenzegwa munzila ilibuti.
21. Ino Jehova usyomezya nzi kuli baabo basyomeka kulinguwe?
21 Aino, tulakonzya katuli basyoonto mazubaano notulwanwa boobu akaambo kakusyomeka. Pele bantu ba Leza balangilwa kupenzegwa kapati ciindi camamanino nocitana sika. Ino mbuti mbotunga twasinizya kuti tulacaala katusyomeka? Eco inga cakonzeka kuti katusyomeka lino. Jehova watutuma mulimo mupati—kuti tukambauke akuyiisya makani aa Bwami bwakwe. Atuzumanane kucita mulimo oyu cakusyomeka. (1 Ba-Korinto 15:58) Ikuti tatuzumizyi kutalondoka kwesu kwabuntunsi ikunyonganya kusyomeka kwesu kumbunga ya Jehova alimwi akuti naa twacenjelela nzila zyakutasyomeka izilitondezya kwiinda mukusyomeka munzila itayelede, eci cilatupa kuti tulibambile kabotu kuti naa caboola mpotusunkwa kusyomeka kwesu. Pele, lyoonse tweelede katuzi kuti Jehova ulasyomeka lyoonse kubabelesi bakwe basyomeka. (2 Samuele 22:26) Ee, unoobakwabilila bantu bakwe basyomeka!—Intembauzyo 97:10.
Bupanduluzi buyungizidwe
a Jesu wakatondezya busicamba kulwana makwebo aya akali kubajanya mali manji bantu. Kweelana abwakaamba umwi haabupampu wamakani aazyakaindi, mutelo watempele wakeelede kubbadelwa kubelesya kali kamwi kansiku kaba Juda. Aboobo basikuswaya tempele banji bakali kuyandika kucinca mali aabo kutegwa babbadele mutelo. Basikucinca mali bakali kuzumizigwa kubbadelesya mweelwe wamali wakapedwe nobakali kucinca, elyo bakali kujana mali manji.
b Amubone Galamukani! yamu January 8, 1994; a February 8, 1994.
c Iluzubo lwabo lwakazwa kuluzubo lwaba Hasidim, iluzubo lwakatalika myaanda yamyaka yakusaanguna kutegwa lukasye muuya waba Giliki. Izina lyaba Hasidim lyakazwa kubbala lya Cihebrayo lyakuti chasi·dhimʹ, naa “basikusyomeka.” Ambweni bakali kuyeeya kuti magwalo aamba “uusyomeka” wa Jehova akali kwaamba mbabo munzila iilibedelede. (Intembauzyo 50:5, Chitonga Bible 1996) Balo aba Farisi bakatobela, bakali bayumu moyo, bakali bikka kuba bantu bavwuninina caambwaa Mulawo.
Mulaingula Buti?
◻ Mbuti mbotunga twalikasya kutasyomeka akaambo kakutalondoka kwabamwi?
◻ Mbuti kutalondoka kwesu mbokunga kwatunjizya mubukkale bwakutasyomeka?
◻ Mbuti mbotunga twakaka muuya wakusyomeka munzila itayelede?
◻ Ncinzi cinga catugwasya kuzumanana kusyomeka nociba ciindi notwapenzegwa?
[Kabbokesi kali apeeji 21]
Ikubeleka Cakusyomeka mu Beteli
“Zyoonse zintu zileelede kucitwa kabotu alimwi mumulawo.” Oobu mbwaakalemba mwaapostolo Paulo. (1 Bakolinti 14:40, Ci) Paulo wakalizi kuti zintu ziyandika kucitwa “mumulawo” wakuziyanzanisya kutegwa mbungano ibeleke kabotu. Asunu mbubonya, ibaalu balanga makani aajatikizya kusala busena bwamuswaangano waciiyo cabbuku nkwayelede kuunka muntu umwi aumwi wamumbungano, alimwi balanga miswaangano yamulimo wamumuunda alimwi akubona kuti acimwi cilawo cakukambaukila cabelekwa coonse. Milawo eyi cimwi ciindi ilakonzya yasunka kusyomeka kwanu. Malailile ngobapa taamunikilwi amuuya uusalala alimwi taakonzyi kukonda muntu oonse.
Sena cimwi ciindi cilamuyumina kusyomeka kumilawo iibikkwa mumbungano ya Bunakristo? Ikuti naa cilamuyumina, cikozyanyo ca Beteli inga camugwasya. Yoonse mitabi ya Watch Tower Society iili 104 kubikkilizya amaopesi mapati aaku Amelika yuulikidwe zina lya Beteli, ibbala lya Cihebrayo ilyaamba kuti “Ŋanda ya-Leza.”* Basikulisungula kukkala akubelekela mumaandaa Beteli bayanda kuti masena aya kaatondezya bulemu abuyoofwu kuli Jehova. Eeci ciyanda kusyomeka kwaumwi aumwi.
Ibeenzu basika ku Beteli kanjikanji balailumbaizya akaambo kabulondo abweendelezi bwazintu bubotu mbobabona nkuko. Ibabelesi balabeleka cakuyanzana alimwi balakkomana; kwiinda mukwaambaula kwabo ambobalilemeka, alimwi ambobalibamba balitondezya kuba bantu baciimo ca Bunakristo icamanjezeezya aasimide aatobela malailile aa Bbaibbele. Boonse bamukwasyi wa Beteli balatobela zyeelelo zya Jwi lya Leza cakusyomeka.
Kunze lyaboobo, Kabunga Keendelezya kalabapa kabbuku kamalailile ikamutwe wakuti Dwelling Together in Unity ikajisi milawo iiyandika kutegwa mukwasyi woonse oyu mupati ubelekele antoomwe. (Intembauzyo 133:1) Mucikozyanyo kabbuku aka kaamba makani aajatikizya mwakoona, zyakulya, bulondo, kusama, kulibamba alimwi azimbi zintu zili boobu. Bamukwasyi wa Beteli balatobela milawo yoonse eyi cakusyomeka nociba ciindi noiteendelani anzyobayanda kucita. Aaka kabbuku kamalailile tabakalangi mbuli kabbuku kamilawo miyumu pe, bakabona kuti nkabbuku kamalailile aagwasya aakabambilwa kuleta lukamantano aluyanzano. Balangizi bamumo balasyomeka kutobela milawo eyi iizwa mu Bbaibbele alimwi balaibelesya munzila igwasya kukuyaka akukulwaizya mukwasyi wa Beteli kucita mulimo wabo wamu Beteli uusetekene.
*Aaya maanda aajatikizya fakitoli, maopesi alimwi amwakoonena taali njetempele ya Leza mpati yakumuuya naa ŋanda. Itempele ya Leza yakumuuya mbubambe bwakwe bwabukombi busalala. (Mika 4:1) Aboobo tempele eyi taigoleli buyo kumayake aali oonse aansi.
[Kabbokesi kali apeeji 22]
Sikusyomeka a Sikutobela Mulawo
Ikaindi mu 1916, ibbuku litegwa Encyclopædia of Religion and Ethics lyakaamba kuti “kwiindana akati ka sikusyomeka asikutobela mulawo kulajanika muziindi zyoonse alimwi amumasena moonse.” Lyakapandulula kuti: “Kuli sikutobela mulawo uucita ncaambilwa, tatyoli mulawo uli woonse; ulasyoma jwi lilembedwe alimwi likonzya kubalwa. Kuli sikusyomeka awalo uucita mbweena obo, pele . . . uutagoleli buyo awo, uubikka moyo wakwe woonse mumulimo wakwe, weendelezya ciimo cakwe kweelana akaambo ncowakabikkilwa mulawo.” Eeli bbuku ndyoonya lyakazikuyungizya kuti: “Ikusyomeka tacaambi buyo kutobela mulawo pe. . . . Muntu uusyomeka ulaindana amuntu uutobela mulawo mukuti walo uusyomeka ubikka moyo wakwe woonse alimwi amizeezo . . . Taciti mulandu wakusotoka ncaambilwa kucita, nokuba kusotoka ncaataambilwa kucita naa kulizumizya kutyola mulawo akaambo kakutaziba.”