Amutembaule Mwami Walyoonse Alyoonse!
“Jehova ngumwami walyoonse alyoonse.”—INTEMBAUZYO 10:16.
1. Mmibuzyo nzi iibuzigwa kujatikizya ciindi calyoonse alyoonse?
LYOONSE alyoonse—ino eeci caamba nzi kulindinywe? Sena mulayeeya kuti ciindi cilakonzya ncobeni kuti kaciide kuya kusikila kutamani? Ncintu citadoonekwi pe kuti ikuya musule, iciindi ciya kusikila kutamani. Aboobo ino inga calekela nzi kuya mbubwena oobo kumbele? Ncobeni Ibbaibbele lya New World Translation Leza limwaamba kutembaulwa “kuzwa kutamami kusikila kutamani.” (Intembauzyo 41:13, NW) Ino majwi aaya aamba nzi? Inga twagwasigwa kuteelela kuti twalanga makani ambi aaswaangene ayaaya—alo aajatikizya mulengalenga.
2, 3. (a) Mibuzyo nzi iijatikizya mulengalenga, alimwi itugwasya kuteelela nzi kujatikizya ciindi calyoonse alyoonse? (b) Nkaambo nzi ncotweelede kuyanda kukomba Mwami walyoonse alyoonse?
2 Ino mulengalenga utaana kuli? Sena ulaa mpuugolela? Kusikila kumyaka iili 400 eyi yainda, inyika yesu eyi yakali kuyeelelwa kuti mpaakati kamulengalenga. Mpoona Galileo wakaanza cibone-bone cazintu zili kule, wakapa kuti kukonzeke kusakana mukubona julu. Lino Galileo wakakonzya kubona nyenyeezi zimbi zinji alimwi wakakonzya kutondezya kuti nyika anyenyezi zimwi zilalizinguluka zuba. Imulalabungu teewakacili kulibonya kuba wabungu pe. Obuya bungu bwakajanika kuba nyenyeezi zinji, izisika ambweni mwaanda wazyuulu zyamamiliyoni. Kunyina notunga twabala nyenyeezi zinji boobo pe, nokuba kuti twasoleka mubuumi bwesu boonse. Kumbele basikwiiya zyamulengalenga bakazoobona azimbi zyuulu zyamilalabungu. Eezi zilaya mumulengalenga, kusikila mane ikugolela zibone-bone ziinda kubona. Kubaanga kunyina nkuugolela mulengalenga. Ncimwi buyo aciindi calyoonse alyoonse—tacigoli pe.
3 Imuzeezo wacintu calyoonse alyoonse ubaanga tauteeleleki abongo bwesu bwabuntu ibugola. Nokuba boobo, nkwali Umwi uuciteelelesya eeci. Ulakonzya kubala, atwaambe mane akwiita mazina aazyuulu zyamamiliyoni aamamiliyoni aanyenyeezi alimwi azyuulu zyamamiliyoni aamilalabungu! Ooyu Ulaamba ategwa: “Amuululale mubone kujulu. Ezi zyoonse nguni wakazilenga? Ulapozya makamu aazyo cakubala mweelwe wazyo. Zyoonse buyo ulaziita mazina. Mubupati bwakwe bugambya, mbwali singuzu, taakwe niiba yomwe iibulika. Sa tona kuziba? Sa tona kumvwa? Leza uuteeli, Jehova, iwakalenga magolelo oonse aanyika, tawizuki, takataali pe. Busongo bwakwe tabumvwiki abuniini pe.” (Isaya 40:26, 28) Ino ngu Leza mubotu kaka ooyo! Ncobeni ngu Leza ngotweelede kuyanda kukomba!
“Mwami Walyoonse Alyoonse”
4. (a) Mbuti Davida mbwaakatondezya kulumba ku Mwami walyoonse alyoonse? (b) Ncinzi ncaakaamba umwi wabahaazibwene basayaansi beni-beni kujatikizya kutalika kwamulengalenga?
4 Kubbuku lya Intembauzyo 10:16, nceeci ncaamba Davida kujatikizya Leza Mulengi: “Jehova ngumwami walyoonse alyoonse.” Alimwi ku Intembauzyo 29:10, ulaindulula ategwa: “Jehova ulikede acuuno cabwami lyoonse.” Ee, Jehova ngo Mwami walyoonse alyoonse! Kunze lyaboobo, Davida ulapa bukamboni bwakuti ooyu Mwami uusumpukide ngo Sikwaanza alimwi ngo Sikupanga zyoonse nzyotubona mujulu, kaamba boobu ku Intembauzyo 19:1: “Kujulu kulaamba bulemu bwa-Jehova, mweenya uukwazeme ulatondezya milimo yamaanza aakwe.” Nokwakainda myaka iili 2,700 ikuzwa lyakaambwa majwi aaya, umwi wasaayansi uuzizilwe Sir Isaac Newton wakacizumina icakaamba Davida naakalemba kuti: “Oobu bweende bwanyenyeezi zipati, azizinguluka zuba, alimwi azilaa micila, ibwabulondo buli boobu bukonzya buyo kuti bwakaletwa amakanze alimwi abweendelezi bwasinguzu umwi haazibwene.”
5. Ino Isaya a Paulo bakalemba nzi kujatikizya Kasensa kabusongo?
5 Ino tweelede kulibombya kaka ikuziba kuti Mwami Mupati Wakoonse Jehova, walo uutakonzi kweela nomuba mujulu “ajulu lyakujulu loko” ulapona lyoonse alyoonse! (1 Bami 8:27) Jehova walo waambwa kuli Isaya 45:18, kuti ngonguwe “iwakalenga ijulu . . . iwakabumba nyika akwiipanga akwiimika,” walo ne Ntalisyo yabusongo bwiinda kuvwula kuli boobo bantu ibakonzya kufwa mbobakonzya kuteelela abongo bwabo. Jehova wakaamba boobu ku 1 Ba-Korinto 1:19: “Nzoonyonyoona busongo bwabasongo, aalo maanu aabasimaanu nzooalobya.” Kuliceeci Paulo wakayungizya kukapango ka 20 ikuti: “Ino uli kuli musongo? Uli kuli mulembi? Uli kuli sikubuzyanya waciindi ecino? Sa Leza takabufubaazizye busongo bwaciindi ecino?” Ee mbuli butondezya majwi aa Paulo aatobela, kucaandaano 3, kapango ka 19, “busongo bwaansi ano mbufubafuba buyo kumeso aa-Leza.”
6. Ino Mukambausi 3:11 itondezya nzi kumakani aa “buumi buteeli”?
6 Izintu zyamujulu zili akati kazilenge Mwami Solomoni nzyaakaamba naakati: “[Leza] wacita kuti zintu zyoonse zibote kuziindi zyazyo zyeelede. Wabika bulangizi bwabuumi buteeli mumyoyo yabo, nekubaboobo muntu takonzyi kumvwisya milimo yoonse Leza njaakacita kuzwa kumatalikilo kusikila kumamanino.” (Mukambausi 3:11) Mmasimpe, ikusola kuziba ncocaamba “bulangizi bwabuumi buteeli” naa kuti lyoonse alyoonse, ncintu cisyangidwe mumoyo wamuntu. Pele sena kuli nanga walujana luzibo luli boobo?
Bulangizi Bubotu Bwabuumi
7, 8. (a) Ino mbulangizi nzi mbobajisi bantu ibwakumbele, alimwi mbuti mbobunga bwajanwa? (b) Nkaambo nzi ncotweelede kukondwa kuti lwiiyo lwa Leza luyoozumanana lyoonse alyoonse?
7 Mumupailo wakwe kuli Jehova, Jesu Kristo wakati: “Mboobu buumi ubutamani, kuti bazibe nduwe, Leza mwini-mwini, ooli olike, ayooyo ngookatuma, nguwenya Jesu Kristo.” (Johane 17:3) Mbuti mbotunga twalujana luzibo luliboobu? Tuyandika kwiiya Jwi lya Leza, Ibbaibbele Lisalala. Mukucita boobu tulakonzya kujana luzibo lwini-lwini ilwamakanze aa Leza mapati, kubikkilizya acipo ncaakapa kwiinda mu Mwanaakwe, icabuumi butamani muparadaiso anyika. Oobo mbobuyooba “buumi bwini-bwini” ibwaambwa ku 1 Timoteo 6:19. Bunooli mbuli boobo bwaambwa ku Ba-Efeso 3:11 ikuti, “bukanze bwamaindi mbwaakakanza [Leza] muli-Kristo Jesu Mwami wesu.”
8 Ee, swebo tobantu basizibi tulakonzya kubujana buumi butamani kwiinda mulwiiyo ndwapa Leza alusyomo mucituuzyo ca Jesu cacinunuzyo. Ino oolu lwiiyo luyoozumanana kwaciindi cilamfwu buti? Luyoozumanana lyoonse alyoonse imuntu mbwayaabuyiisigwa buce-buce ibusongo bwa Mulengi wesu. Ibusongo bwa Jehova tabukwe mpobugolela pe. Kakabwene kaambo aaka Paulo wakakankamuka ategwa: “Ha! muli bulondo buteeli mubusongo bwa-Leza amuluzibo lwakwe! Ncobeni imbeta zyakwe tazilangiki, aziyanza zyakwe tazitobeleki!” (Ba-Roma 11:33) Ncintu ceelela ncobeni kuti, 1 Timoteo 1:17 Jehova imwiita kuti “Mwami mupati uutamani walyoonse”!
Busongo bwa Jehova Kukulenga
9, 10. (a) Milimo nzi Jehova njaakacita mukubamba nyika eyi kuti cibe cipo kubantu? (b) Mbuti busongo bwa Jehova bwiinda mbobutondezegwa muzilenge zyakwe? (Amubone kabbokesi.)
9 Amuyeeye buyo lukono lubotu Imwami walyoonse alyoonse ndwaatupa tobantu. Intembauzyo 115:16 ilatwaambila kuti: “Majulu majulu aa-Jehova, pele nyika wakiiaba kubana ba-Adamu.” Sena tamuyeeyi kuti eeci ncintu cipati ncotupedwe? Mmasimpe aayo! Alimwi ino tatulilumbili Mulengi wesu mbwaakabona zyeelede mukutubambila nyika kuti ukabe munzi wesu!—Intembauzyo 107:8.
10 Kwakacitika zintu zigambya anyika “[mu]mazuba” aali cisambomwi aakulenga aa ambwa ku Matalikilo caandaano ca 1, bumwi abumwi buzuba kabumana zyuulu zyamyaka. Ooku kulenga kwa Leza muciindi kwakali kuzoovwumba nyika imunseme wabwizu, izisaka zitaliboteli, alimwi amaluba-luba aamabala-mabala. Yakali kunoozoozwide banyama bamulwizi, ibutanga bwabayuni bauluka beebeka, amatanga-matanga aabanyama baamunzi abamusyokwe, cimwi acimwi kacizyala “mbuli musyobo waco.” Bumane bupanduluzi bwakulengwa kwamwaalumi amwanakazi, lugwalo lwa Matalikilo 1:31 lulaluula ategwa: “Leza naakabona zintu zyoonse nzyaakacita, wakabona kuti zyoonse zyabota loko.” Cabota cilawo icakazingulukide bantu aaba bakusaanguna! Sena tatuboni muzilenge zyoonse zyaanyika ibusongo, ibupampu, alimwi akutulanganya kwa Mulengi wesu siluyando?—Isaya 45:11, 12, 18.
11. Mbuti Solomoni mbwaakatondezya kuvwula kwabusongo bwa Jehova mukulenga?
11 Umwi iwakakankamana kubona busongo bwa Mwami uutamani walyoonse ngu Solomoni. Ulaindulula kwaamba zyabusongo bwa Mulengi. (Tusimpi 1:1, 2; 2:1, 6; 3:13-18) Solomoni ulatusyomezya kuti “inyika inookede lyoonse.” Zyakamukonda zintu zinji eezyo zyakalengwa izigambya kubikkilizya amulimo ngwaajisi makumbi aamvwula mukusyuusya nyika yesu. Aboobo wakalemba kuti: “Milonga yoonse ilatola kulwizi lupati, nekubaboobo lwizi taluzuli: milonga ilapiluka nkukonya oko nkuyakatalikila.” (Mukambausi 1:4, 7) Eelyo kujanika kuti imvwula amilonga yamana kusyuusya nyika imaanzi aazyo alainduluzigwa kuzwa mulwizi kuya mumakumbi. Ino nyika niyali buti, alimwi swebo nitwali kuli, nokwanyina bubambe oobu bwakusalazya akwiinduluzya maanzi?
12, 13. Mbuti mbotunga twatondezya kuti tulalumba izilenge zya Leza?
12 Ikulumba kwesu kukuzulila kwazintu zilengedwe kweelede kweendelaamwi amicito, mbuli Mwami Solomoni mbwaakaamba mumajwi aamamanino mubbuku lya Mukambausi ngaakati: “Ngaaya mamanino aamakani. Oonse amvwigwa. Lemeka Leza akubamba milazyo yakwe, nkaambo kucita boobo nceelelo coonse camuntu. Nkaambo Leza uyoobeteka milimo yoonse, amakani oonse aasisidwe, naaba mabotu naaba mabi.” (Mukambausi 12:13, 14) Tweelede kuyoowa ikucita kufwumbwa cintu cimucima Leza. Muciindi caboobo tweelede kusoleka kumumvwida cakulemeka akuyoowa.
13 Ede tweelede katuyanda kutembaula Mwami uutamani walyoonse akaambo kamilimo yakwe yakulenga iitaliboteli! Intembauzyo 104:24 yaambilizya kuti: “O Jehova, milimo yako yavula! Zyoonse wakazicita mubusongo bwako! Nyika ilizwide zilenge zyako.” Atucibelesye cakukondwa icaambwa mukapango kamamanino kantembauzyo eeyi kwiinda mukulyaambila tobeni akwaambila bambi kuti: “Lumba Jehova O [moyo] wangu! Amutembaule Jehova!”
Zilenge Zyaanyika Iziibotya
14. Muunzila nzi Leza mwaakalenga bantu kwiinda banyama?
14 Izilenge zya Jehova zyoonse mmilimo yahaazibwene. Pesi iciinda kubota akati kazilenge izili anyika ndiswe tobantu. Kumane Adamu, awalo Eva, wakalengwa a Jehova kumamanino aabuzuba bwacisambomwi bwakulenga—nzizyakali zilenge zipati kwiinda nswi, bayuni, alimwi abanyama! Nokuba kuti bunji bwazeezi zilicenjede loko, muntu ulipedwe nguzu zyakuyeeya, imanjezeezya alo aakonzya kwiimpanya akati kacibi acibotu, ikukonzya kukanza zyakumbele, alimwi akuyanda kwamuntu nkwazyedwe ankuko ikwakukomba. Ino eezi zyoonse zyakaboola-boola buti? Imuntu takwe naakasanduka buya kuzwa kubunyama, wakalengwa buya mucikozyanyo ca Leza. Aboobo, muntu alikke nguukonzya kutondezya bube bwa Mulengi wesu, ooyo iwakaliyubununa kuti ngu “Jehova! Jehova! Leza siluzyalo asibuuya uutafwambi kukalala, uuzwide luse alusyomo.”—Kulonga 34:6.
15. Nkaambo nzi ncotweelede kulumbaizya Jehova cakulibombya?
15 Atumutembaule akumulumba Jehova akaambo kabwaanze bubotu bwamibili yesu. Ibulowa bwesu, bwalo butasyaali pe mukubaa buumi, bulazinguluka kweenda mumibili yesu miniti aminiti. Mbuli Deuteronomo 12:23 mboyaamba, “bulowa mbobuumi”—ncintu ciyandisi kuli Leza. Imafwuwa mayumu, milambi miteteete, alimwi ansinga zyesu zibeleka kabotu zyoonse zibelekelaamwi abongo bwalo bwiinda loko abongo bwabanyama alimwi bulakonzya kucita zintu zyalo zitakonzi kweelana azicita kkompyuta impati mbuli ŋanda yamujulu. Sena eeci tacimupi kulibombya na? Cileelede. (Tusimpi 22:4) Amuziyeeye azyalo eezi: Imapunga esu, igoyooyo, mulaka, imenyo alimwi amilomo yesu zibelekela antoomwe ikugwasya kwaambaula kwabantu muzyuulu zyazisyobo. Davida wakaimbila Jehova nyimbo zyeelela, kati: “Njookulumba nkaambo kakugambya kwakulengwa kwangu. Milimo yako ilagambya; moyo wangu ulizi loko.” (Intembauzyo 139:14) Atusangane a Davida mukutembaula Jehova cakumulumba Sikwaanza wesu alimwi Leza wesu!
16. Ndwiimbo nzi lwakutembaula Jehova, ndwaakaanza mwiimbi uuzizilwe, alimwi nkutambwa nzi nkotunga twazumina?
16 Ibbuku lyakweema ilyakalembwa a Joseph Haydn mumwaanda wamyaka wa 18 lyaamba boobu mukutembaula Jehova: “Amumulumbe nywebo nozilenge zyakwe izibotu boobu! Amumwiimbile abulemu, mumulemeke mukwiimba, amulilongezye akulisumpula Izina Lyakwe! Kutembaulwa kwa Jehova kulakkalilila kusikila walyoonse alyoonse, Ameni, Ameni!” Alimwi kuli atwaambo tumbi twiinda awaawa kubota mu Intembauzyo, mbuli kutambwa kubotu ncobeni kwalo kwaambwa ziindi zyone mu Intembauzyo ya 107 ikuti: “Balumbe Jehova nkaambo kaluzyalo lwakwe, amilimo yakwe iigambya njacitila bana ba-Adamu!” Sena mulaa lubazu mukutembaula ooko? Muleelede kayi zyoonse zintu izibotu ncobeni zizwa kuli Jehova, Imwami utamani.
Milimo Imbi Yiinda Kunguzu
17. Mbuti “lwiimbo lwa-Musa muzike wa-Leza alwiimbo lwa-Mwanambelele” mbolumulumbaizya Jehova?
17 Muzyuulu zyamyaka zyainda izili cisambomwi, Imwami utamani walyoonse watalisya milimo yanguzu yiinda mane awaawa. Mubbuku lya Bbaibbele lyamamanino, ku Ciyubunuzyo 15:3, 4, tulabala kujatikizya baabo bali kujulu ibazundide basinkondoma badaimona ikuti: “balaimba lwiimbo lwa-Musa muzike wa-Leza alwiimbo lwa-Mwanambelele, bati, Milimo yako mipati, ilagambya, Mwami Leza Singuzuzyoonse. Ziyanza zyako nzyalusinizyo, zililuleme. Nduwe Mwami waciindi coonse. Nguni uutakuyoowi, Mwami, akulemeka izina lyako? Nkaambo nduwe olike uusalala. Ncobeni bantu bazisi zyoonse balaboola kukukomba kunembo lyako, nkaambo imbeta zyako zyaboneka.” Nkaambo nzi oolu ncolutegwa ‘lwiimbo lwa-Musa alwa-Mwanambelele’? Nkooko atubone.
18. Nincito nzi yanguzu iyiibalukwa munyimbo ku Kulonga 15?
18 Imyaka iisika ku 3,500 eeyi yainda, iciindi basikalumamba ba Farao basinguzu nobakaloba mu Lwizi Lusalala, ibana Israyeli bakamutembaula Jehova munyimbo. Nceeci ncotubala ku Kulonga 15:1, 18: “Lino Musa abana ba-Israyeli bakaimbila Jehova olu lwiimbo lwakuti, Ndaimbila Jehova, nkaambo ulisumpukide loko; Imbizi asikwiitanta wabawaala boonse mulwizi. Jehova ngunooendelezya lyoonse alyoonse.” Imilawo ya Mwami ooyu walyoonse alyoonse iiluleme yakalibonya mulubeta amukujaya basinkondonyina ibakanyansya bwami bwakwe.
19, 20. (a) Nkaambo nzi Jehova ncaakabamba ciinga ca Israyeli? (b) Mbuti Mwanaambelele alimwi abambi mbobakwiingula kutaminina kwa Saatani?
19 Ino nkaambo nzi ncokwakayandika kucita cintu cili boobu? Mwakali mumuunda wa Edeni mwalo Muzoka mumpelenge mwaakasololela bazyali besu bakusaanguna mucibi. Eeci cakapa kuti kutalondoka ikuleta cibi kusiilwe bantu boonse. Pesi kweendelana amakanze aakwe aakusaanguna, Imwami walyoonse alyoonse mpoona-mpoona wakatola ntaamu, zyalo zyakali kuzoopa kuti basinkondonyina baatuke anyika akuti ibubambe bwaparadaiso bupilusigwe. Imwami walyoonse alyoonse wakabamba ciinga ca Israyeli akupa Mulawo wakwe kuti wiiminine mbuli mbwayoozicita zintu eezi.—Ba-Galatiya 3:24.
20 Nokuba boobo, muciindi Israyeli yakaleka kusyomeka, alimwi ciimo eeci cuusisya cakasika mpocigolela ciindi basololi bayo nobakaaba Mwanaa Leza simuzyalwa alikke kuba Roma kuti apenzegwe cibyaabi akujaigwa. (Incito 10:39; Ba-Filipi 2:8) Nokuba boobo, kusyomeka kwa Jesu kusikila mane kulufwu, ndwaakaba “Mwanaambelele wa-Leza” iwacipaizyo, lwakakazya kutaminina kwa Sinkondonyina a Leza wansiku, Saatani—ikuti kwiina muntu anyika uukonzya kusyomeka lyoonse kuli Leza nomuba mumasunko mapati. (Johane 1:29, 36; Jobu 1:9-12; 27:5) Nokuba kuti bakayambukilwa kutalondoka akaambo kacibi ca Adamu, imamiliyoni aabantu bayoowa Leza bautobela mukondo wa Jesu kwiinda mukusyomeka nobalwanwa a saatani.—1 Petro 1:18, 19; 2:19, 21.
21. Kweelana acaamba Incito 17:29-31, ninzi ciyoobandikwa mucibalo citobela?
21 Lino bwasika buzuba bwakuti Jehova abalumbule aabo basyomeka akuti abeteke basinkondonyina ibalwana kasimpe abululami. (Incito 17:29-31) Ino eci ciyoocitika buti? Cibalo cesu citobela ciyootwaambila.
Kabbokesi Kakwiindulula
◻ Nkaambo nzi ncokuluzi kwiita Jehova kuti “Mwami walyoonse alyoonse”?
◻ Mbuti busongo bwa Jehova mbobutondezegwa muzilenge zyakwe?
◻ Muunzila nzi kulenga kwamuntu mokutegwa mmulimo wahaazibwene?
◻ Mmilimo nzi iipa kuti kakuba “lwiimbo lwa-Musa muzike wa-Leza alwiimbo lwa-Mwanambelele”?
[Kabbokesi kali apeeji 12]
Busongo Bwa Jehova Ibwiindilila
Ibusongo bwa Mwami walyoonse alyoonse bulatondezegwa munzila zinji-zinji muzilenge zyakwe anyika. Amumvwe majwi ngaamba Aguri aakuti: “Majwi oonse aa-Leza alasyomeka; nintobo kuliboonse bacijila kulinguwe.” (Tusimpi 30:5) Mpoona Aguri ulaamba zilenge zya Leza zipona zinji, izipati azisyoonto. Mucikozyanyo, mutupango twa 24 kusikila ku 28, ulapandulula “zintu zyone ansi, nziniini, pele zilicenjede loko.” Eezi ndumoma, cibila, cisozi, antombela.
“Zilicenjede”—ee, izinyama mbozipangidwe obo. Taziyeeyi pe bucita bantu pele ziyeeme abusongo bwakuzyalwa ambubo. Sena kuli nokamulamya kaambo aaka? Nzeezi zilenge zilondwedwe cini-cini! Mucikozyanyo, lumoma lukkala muzisi buya izibikkilizya amwami muzyazi, babelesi, abaalumi. Imwi misyobo yalumoma mane ilabinga tuuka tumbi kutola mumpulazi zicingilidwe lubaya ndoluyaka. Lulatusyuunta tuuka otu ooku kumwi basikalumamba kabatanda basinkondonyina basola kubalwana. Ku Tusimpi 6:6 kuli kukulwaizya kwakuti: “Koya kulumoma, O mutolo; bona inzila zyalo, uliiye busongo.” Sena zikozyanyo ezi tazyeelede kutukulwaizya kuti ‘tubikke myoyo yesu lyoonse kumilimo ya Mwami’?—1 Bakolinti 15:58, Ci.
Muntu wabamba ndeke zipati loko. Pele twalo tuyuni tulainda kukuuluka, kubikkilizya ankiinga syaamaluba [kansyome], kalo kasika buyo a 30gm kulema! Namangoma wandeke 747 weelede kuyumuna malita aamungwimba aali 180,000, kweenzegwa ababelesi bayiide, alimwi akubelesya bupangaliko bwakuziba kubedwe akuyigwa kutegwa ndeke eyo ikonzye kuzubuka lwizi. Kakuli kalo kayuni nkaanga syaamaluba kayandika buyo 1 gm yamungwimba wamafwuta aamubili kukaulusya kuzwa ku North America, kwiizabuka Gulf of Mexico, kuyoosika ku South America. Kunyina mukuli mupati wamungwimba, kwiina lwiiyo lwambokuulukwa, kunyina maccaati aakatazya amakkompyuta! Sena kukonzya oku koonse kwakalicitikila buyo mukusanduluka? Peepe! Aaka kayuni kasyoonto kalicenjede, kakateyelwa limwi a Mulengi wankako, Jehova Leza.
[Cifwanikiso icili apeeji 10]
Izilenge zya “Mwami walyoonse alyoonse” izyaandene-andeene zilabulumbaizya bulemu bwakwe
[Cifwanikiso icili apeeji 14]
Mbuli Musa a Israyeli yoonse mbubakasekelela kuzunda kwa Jehova ku Lwizi Lusalala, kunooli kukkomana kupati yaakumana Amagedoni