Ikweendaa Leza—Amakanze Aakuzumanana Kukabe Kutamani
“Tuleenda muzina lya-Jehova Leza wesu lyoonse mane kukabe kutamani.”—MIKA 4:5.
1. Nkaambo nzi Jehova ncanga waitwa kuti “Mwami waciindi coonse”?
JEHOVA LEZA taakwe naakajisi matalikilo. Uleelelwa kwiitwa kuti “sinsiku” nkaambo wakaliko kuzwa nsiku. (Daniele 7:9, 13) Jehova alimwi unooliko kukabe kutamani. Ngonguwe alikke “Mwami waciindi coonse.” (Ciyubunuzyo 10:6; 15:3) Mumeso aakwe, imyaka iili cuulu ili mbuli “buzuba bwajilo bwakainda, ambuli kaindi kamasiku kakulindila.”—Intembauzyo 90:4.
2. (a) Ino Leza ujisi makanze nzi kujatikizya bantu bamumvwa? (b) Ino bulangizi bwesu amakanze tweelede kuzigamika kuli?
2 Mbwaanga oyu Sikupa buumi ulapona kukabe kutamani, wakali kukonzya kusyomezya banabukwetene bakusaanguna ba Adamu a Eva bulangizi bwakupona buumi butamani mu Paradaiso. Pele akaambo kakutamvwa kwakwe, Adamu wakasowa ceelelo cakupona buumi butamani, wabasiila cibi alufwu bazukulu bakwe. (Ba-Roma 5:12) Nokuba boobo ikuzanga kwa Adamu teekwakanyonyoonena limwi makanze aa Leza aakumatalikilo. Jehova uyanda kuti bantu bamumvwa bakapone kukabe kutamani, elyo uyoozuzikizya makanze aakwe ziyume zibe buti. (Isaya 55:11) Aboobo cileelela kuti kulangila kwesu alimwi akukanza kwesu kakuli kwakubelekela Jehova kukabe kutamani. Nokuba kuti tweelede kubulangila “buzuba bwakusika kwa-Leza,” cintu cipati ncotuteelede kuluba ncakuti makanzeesu ngakweendaa Leza kukabe kutamani.—2 Petro 3:12.
Jehova Ulabweza Ntaamu Aciindi Ncabikkide
3. Ino tuzi buti kuti Jehova ulijisi “ciindi” cakuzuzikizya makanze aakwe?
3 Mbotuli bantu beendaa Leza, atuyandisisye kucita kuyanda kwakwe. Tulizi kuti Jehova Mubambi Waciindi Mupati, elyo tulasyoma kuti taalilwi kuzuzikizya makanze aakwe aciindi ncabikkide. Mucikozyanyo, “nicakasika ciindi ceelede, Leza wakatuma Mwanaakwe.” (Ba-Galatiya 4:4) Mwaapostolo Johane wakaambilwa kuti kwakali “ciindi” cakuzuzikizigwa kwazintu zyabusinsimi nzyaakabona muzitondezyo. (Ciyubunuzyo 1:1-3) Kuli “ciindi cakubetekwa kwabafu.” (Ciyubunuzyo 11:18) Kwamyaka iinda ku 1,900 yainda, mwaapostolo Paulo wakamunikilwa kuti aambe kuti Leza “wabika buzuba mbwati kabeteke nyika mubululami.”—Incito 17:31.
4. Ino tuzi buti kuti Jehova ulayanda kulobya bweende obu bwazintu bubyaabi?
4 Jehova uyoobulobya bweende obu bwazintu bubi nkaambo zina lyakwe lilimukubisigwa munyika yasunu. Ibabi bavwula. (Intembauzyo 92:7) Balamutukila Leza kwiinda mumajwi aabo amicito, alimwi cilamucisa kubona babelesi bakwe kabasampaulwa akupenzegwa. (Zekariya 2:8) Anu Jehova ncaakanzila kuti mbunga ya Saatani yoonse mbwiibede izikugwisigwe ino-ino! Leza wabikkila limwi ciindi cini-cini eci nociyoocitika alimwi kuzuzikizigwa kwabusinsimi bwa Bbaibbele kulatondezya caantangalala kuti lino tukkede “kumamanino aaciindi.” (Daniele 12:4) Ino-ino uyoobweza ntaamu yakulongezya boonse bamuyanda.
5. Ino Habakuku a Loti bakali kubulanga buti bukkale bwakabazingulukide?
5 Babelesi ba Jehova bakaindi bakali kuyandisisya kubona mamanino aabubi. Loti mululami “wakali kukataazigwa akweenda kwabasizibi muzisusi zyabo zibi.” (2 Petro 2:7) Kauside akaambo kabukkale bwabantu bakamuzingulukide, musinsimi Habakuku wakatongooka ulaamba: “O Jehova, njooleka lili kukukwiilila notamvwi? Ndakulilila nkaambo kakupyopyongana kwabantu, pele toswiilili. Ino nkaambonzi wandibonya zibi akundilanzya bupilingene? Kusaala akuvupuula, zyoonse nkuzili kumeso aangu. Kwabuka inkondo akukazyanya.”—Habakuku 1:2, 3.
6. Ino ncinzi Jehova ncaakaamba kwiingula mupailo wa Habakuku, alimwi ncinzi ncotwiiya kuliceeci?
6 Jehova wakamwiingula Habakuku mumajwi aakuti: “Cilengano cilijisi ciindi caco cibikidwe. Cileza bukunkulika, nkabela kumamanino tacikooyoobeja pe. Na camuka, kocilindila, nkaambo ncobeni cilaza, tacikooyoocedelelwa pe.” (Habakuku 2:3) Munzila eyi, Leza wakazibya kuti uyoobweza ntaamu ‘aciindi cibikkidwe.’ Nokuba kuti inga kwabonekaanga camuka, Jehova uyoozuzikizya makanze aakwe—ciyume cibe buti!—2 Petro 3:9.
Ikubeleka Cakutatolwaala
7. Nokuba kuti Jesu taakazi ciindi cini-cini nobwakali kuzoosika buzuba bwa Jehova, ino wakaucita buti mulimo wakwe?
7 Sena kuziba ciindi cini-cini ca Jehova kulayandika kutegwa tweende a Leza cabusungu? Peepe, takuyandiki pe. Amubone zikozyanyo. Jesu wakali kuyandisisya kuziba ciindi luyando lwa Leza noluyoocitika aansi ano mbweena mbuli kujulu. Elyo, Kristo wakayiisya basikumutobela bakwe kupaila kuti: “Taateesu ooli kujulu, alilemekwe izina lyako, abuze Bwami bwako, alucitwe luyando lwako, ansi ano mbubonya mbuli kujulu.” (Matayo 6:9, 10) Nokuba kuti Jesu wakalizi kuti ooku kulomba kwakali kuyoozuzikizigwa, tanaakazi ciindi cini-cini eci nocakali kunoocitika. Mubusinsimi bwakwe bupati bujatikizya mamanino aabweende obu bwazintu, wakati: “Taakwe muntu naba umwi uuzi buzuba obo nanka ciindi, nibaba baangelo bakujulu naba Mwana, pele Taata luzutu nguuzi.” (Matayo 24:36) Mbwaanga Jesu Kristo ngomusemu mukuzuzikizigwa kwamakanze aa Leza, uyakutola lubazu mukunyonyoona basinkondonyinaa Wisi wakujulu. Pele Jesu naakali aansi, awalo tanaakazi ciindi Leza naakali kuzoobweza ntaamu. Sena eco cakamupa kuti atolwaale mumulimo wa Jehova? Peepe! Nobakamubona Jesu kasalazya tempele cabusungu, “basikwiiya bakwe bakayeeya eco icakalembwa cakuti, Busungu bwakuŋanda yako bwandilya kundimaninina.” (Johane 2:17; Intembauzyo 69:9) Jesu wakazumanana kucita mulimo ngwaakatumwa kucita alimwi wakaucita cakutatolwaala. Alimwi wakamubelekela Leza amakanze aakuzumanana kukabe kutamani.
8, 9. Ino ncinzi ncobakaambilwa alimwi mbuti mbobakalimvwa basikwiiya ciindi nobakabuzya kujatikizya kubweedezegwa kwa Bwami?
8 Abalo basikwiiya ba Kristo mbubonya. Jesu wakaswaangana ambabo katanaya kujulu. Cibalo caamba kuti: “Nobakabungene bakamubuzya kuti, Omwami, sena ulabweedezya bwami ku-Israyeli kuliceecino ciindi?” Bakali kuyandisisya kuti Bwami buboole mbubonya mbuli Simalelaabo. Nokuba boobo, Jesu wakaingula kuti: “Takuli kwanu kuziba ziindi, naaba mazuba ngaabika Taata kubwami bwakwe mwini. Kwalo muyootambula nguzu, wasika alindinywe Muuya Uusalala, muyooba bakamboni bangu muno mu-Jerusalemu, amu-Judaya moonse, amu-Samariya, mane kusikila kumamanino aanyika.”—Incito 1:6-8.
9 Kunyina citondezyo cakuti basikwiiya bakatyompwa akwiingula oku. Pele bakasungwaala kukutauka mumulimo wakukambauka. Munsondo zisyoonto buyo, bakazuzya Jerusalemu anjiisyo yabo. (Incito 5:28) Alimwi mumyaka iili 30, bakaukomezya mulimo wabo wakukambauka cakuti Paulo wakali kukonzya kwaamba kuti makani mabotu akakambaukilwa “bantu boonse baansi ano.” (Ba-Kolose 1:23) Nokuba kuti Bwami ‘teebwakabweedezegwa kuli Israyeli’ mbweena mbuli mbobakali kulangila basikwiiya alimwi teebwakakkazikwa kujulu muciindi cabuumi bwabo, bakazumanana kubelekela Jehova amakanze aakuzumanana kukabe kutamani.
Ikulanga Moyo Wesu
10. Ikutaziba ciindi Leza nazoonyonyoona bweende bwazintu bwa Saatani citupa kuti tusinizye nzi?
10 Ibabelesi ba Jehova basunu abalo balayandisisya kubona mamanino aabweende obu bwazintu. Icintu cipati kulindiswe, taluli lufwutuko lwesu munyika ya Leza mpya njaakasyomezya. Tuyanda kuti izina lya Jehova lisalazigwe abulelo bwakwe busumpulwe. Akaambo kaceeci, inga twakkomana kuti Leza tanaatwaambila ‘buzuba nociba ciindi’ ncabikkide cakunyonyoona bweende bwa Saatani. Eci citupa kuti tusinizye kuti tulisungweede kweendaa Leza kukabe kutamani nkaambo tulamuyanda alimwi tatuciti boobo nkaambo kakulangila mpindu zitayi koomoonga.
11, 12. Ino kusyomeka kwa Jobu kwakadoonekwa buti, alimwi eci citujatikizya buti?
11 Ikuzumanana kusyomeka kuli Leza alimwi citugwasya kusinizya kuti Diabolosi wakalubizya ciindi naakaamba kuti Jobu mululami—alimwi abantu bali mbuli nguwe—babelekela Leza akaambo kampindu nzyobajana. Jehova naakaamba kuti mubelesi wakwe Jobu takwe kampenda nkajisi, mmululami alimwi muntu uuyoowa Leza, Saatani amoyo mubi wakataminina kuti: “Taakwe kaambo sena Jobu nkalemekela Leza? Teewakamuyakilide kabotu, walo abaŋanda bakwe azyoonse nzyajisi? Wakamukupusya mumulimo wakwe, alimwi matanga aakwe avula munyika. Pele, kuti kotambika janza lyako akuguma ncajisi uzookusinga kubusyu bwako!” (Jobu 1:8-11) Jobu wakasinizya kuti eeci cakali cakubeja kwiinda mukuzumanana kusyomeka neciba ciindi naakali kusukusigwa.
12 Kwiinda mukuzumanana kusyomeka, andiswe tulakonzya kusinizya kuti kaambo ka Saatani nkakubeja kakuti tubelekela Leza akaambo buyo kakuti kuli ncotulangila kujana. Ikutaziba ciindi cini-cini Leza nayoonyonyoona babi citupa coolwe cakusinizya kuti tulamuyanda ncobeni Jehova alimwi tuyanda kweenda munzila zyakwe kukabe kutamani. Citondezya kuti tulasyomeka kuli Leza alimwi tusyoma mulinguwe kuti ulazyeenzya kabotu zintu. Kunze lyaboobo, ikutaziba buzuba aciindi citugwasya kuti katupakamene alimwi katulangila munzila yakumuuya nkaambo tulizi kuti mamanino alakonzya kusika kufwumbwa ciindi, mbuli mubbi masiku. (Matayo 24:42-44) Twanooyendaa Jehova abuzuba, tukkomanisya moyo wakwe akupa kuti aingule Diabolosi, uumusampaula.—Tusimpi 27:11.
Amukanze Kuzumanana Kukabe Kutamani!
13. Ino Bbaibbele litondezya nzi kujatikizya kulibambila zyakumbele?
13 Aabo beendaa Leza balizi kuti ncamaanu kulibambila zyakumbele. Akaambo kakuziba mapenzi alimwi abuyumuyumu buboola muntu naacembaala, bantu banji balasola kucitila limwi zintu ziyandika nobacili bakubusi alimwi nobacijisi nguzu kutegwa baakucembaala kabanoojisi mali aakuligwasya. Ino mbuti bwalo buumi bwakumbele bujatikizya nzila yakumuuya ibuyandika kapati? Ibbuku lya Tusimpi 21:5 lyaamba kuti: “Makanze aabasungu alaleta zilyo zinji, pele uufwanzya makani ulajana bucete buyo.” Ikuyeeya zyakuzumanana kukabe kutamani kulagwasya masimpe. Mbwaanga tatuzi cini-cini naayakuboola mamanino aabweende obu, tweelede kuyeeya mbotunga twaligwasya kumbele. Pele atuzyeeleke kabotu zintu tubikke zintu zya Leza mubusena bwakusaanguna mubukkale. Ibantu batajisi lusyomo inga bayeeya kuti kusungwaalila kucita luyando lwa Leza nkubula maanu. Pele sena eco ncamasimpe?
14, 15. (a) Ino Jesu wakapa cikozyanyo nzi kujatikizya kuyeeya zyakumbele? (b) Nkaambo nzi muntu muvwubi mucikozyanyo ca Jesu ncaatakajisi maanu?
14 Jesu wakaamba cikozyanyo icigwasya mumakani aya. Wakati “Umwi muvubi wakajana maila manjimanji mumyuunda yakwe. Mpoonya mpoonya wakayeeya mucamba cakwe wati, Ino ndicite buti? Nkaambo nsijisi busena bwakubikila maila aangu. Wakati, Mbobuya mbwenjoocita. Ndilaamwaya matala aangu, ndiyake ambi mapati, ndikayobwede mumo maila aangu oonse, alubono lwangu. Nenti ambile muuya wangu kuti, Omuuya, ulivubide lubono lunjilunji uluyobwedwe myaaka minjiminji, liibe, lya, nywa, kosobana. Anukuti Leza wakamwaambila kuti, Yebo omufubafuba, ngoonya masiku aya muuya wako ulayandaulwa kulinduwe. Ino ezi zintu nzooyobwede zilaba zyani? Mbwabede uuliyobweda lubono, anu tajisi buvubi kuli-Leza.”—Luka 12:16-21.
15 Sena Jesu wakali kwaamba kuti oyu muntu muvwubi taakeelede kubeleka kutegwa kanoojisi lubono lwakuligwasya kumbele? Peepe, nkaambo Magwalo akulwaizya kubeleka canguzu. (2 Ba-Tesalonika 3:10) Icintu ncaakalubizya muntu oyu muvwubi ncakuti taakacita cintu ciyandika kutegwa kajisi “buvubi kuli-Leza.” Nokuba kuti wakali kukonzya kukkomana alubono lwakwe kwamyaka minji, wakali kunoofwa kumbele aamazuba. Taakajisi maanu, taakali kuyeeya zyakumbele.
16. Nkaambo nzi ncotunga twasyoma muli Jehova kuti uyootugwasya kumbele?
16 Ikweendaa Jehova abulangizi bwakumubelekela kukabe kutamani ncintu cigwasya alimwi camaanu. Njenzila ilikke mbotu yakulibambila buumi bwakumbele. Nokuba kuti cilagwasya kulibambila kujatikizya cikolo, kujana mulimo alimwi amikuli yamukwasyi, lyoonse katuyeeya kuti Jehova tafwutatili babelesi bakwe basyomeka. Mwami Davida wakaimba kuti: “Ndakali mulombe, sunu ndakomena, pele nsina bona uululeme uusiidwe, nanka lunyungu lwakwe lukumbila insima.” (Intembauzyo 37:25) Awalo Jesu wakasyomezya kuti Leza uyoobagwasya boonse ibayandaula Bwami kusaanguna alimwi ibeenda munzila zya Jehova ziluleme.—Matayo 6:33.
17. Ino tuzi buti kuti mamanino alaafwaafwi?
17 Nokuba kuti tubelekela Leza amuzeezo wakuzumanana kukabe kutamani, tucilangila buzuba bwa Jehova. Ikuzuzikizigwa kwabusinsimi bwa Bbaibbele kwatondezya caantangalala kuti buzuba obo bwaswena afwaafwi. Ooyu mwaanda wamyaka wali wankondo, malwazi, mizuzumo yanyika alimwi anzala kubikkilizya akupenzegwa kwa Banakristo bakasimpe alimwi akukambauka makani mabotu aa Bwami nyika yoonse mbwiizulwa. Zyoonse ezi nzitondezyo zyamamanino aabweende obu bwazintu. (Matayo 24:7-14; Luka 21:11) Inyika izwide bantu “basikuliyanda, basimuyanda mali, basimantumbwaambwa, basikakomokomo, basikasankusanku, batamvwi bamawisi, batalumbi, batakombi, basikancimwa, basimfundiilili, abasiluvuya lwakutaminizya, batalyeendeleli, basitunyetunyetu, batayandi bubotu, basimusuzyanya, basikainya, basikulisumpula, bayandisya misalo yaansi kwiinda Leza.” (2 Timoteo 3:1-5) Mumazubaaya aakatazya aamamanino, buumi bulakatazya kulindiswe tobabelesi ba Jehova. Ikaka tulombozya buzuba Bwami bwa Jehova nobuyoolobya bubi boonse! Icaino, atuzumanane kweendaa Leza amuzeezo wakucita boobo kukabe kutamani.
Kubeleka Abulangizi Bwabuumi Butamani
18, 19. Ncinzi citondezya kuti bantu basyomeka bansiku bakali kubelekela Leza amakanze aakuzumanana kukabe kutamani?
18 Twanooyendaa Jehova, katuyeeya lusyomo lwa Abelo, Enoki, Nowa, Abrahamu alimwi a Sara. Naakamana kubabandauka, Paulo wakalemba kuti: “Boonse aba bakafwida mulusyomo. Tabakalina kutambula zeezyo izyakasyomezegwa, nekubaboobo bakalizibwene kule, bakali kuzitangalila, eno bakali kulyaamba kuti, Tuli bazwamasi, tuli beenzu buyo ansi ano.” (Ba-Hebrayo 11:13) Aaba bantu basyomeka “bakalisukamine kuya kucisi cibotu ciinda, nkokuti kucisi cakujulu.” (Ba-Hebrayo 11:16) Mulusyomo, bakali kulangila busena bubotu kwiinda mubulelo bwa Bwami bwa Leza bwabu Mesiya. Inga twasyoma kuti Leza uyoobalongezya abuumi butamani mubusena obu bubotu—ibwa Paradaiso aanyika mubulelo bwa Bwami.—Ba-Hebrayo 11:39, 40.
19 Musinsimi Mika wakaamba makanze aabantu ba Jehova aakumubelekela Leza kukabe kutamani. Wakalemba kuti: “Misyobo yoonse ileenda muzina lyamizimu yayo, aswebo tuleenda muzina lya-Jehova Leza wesu lyoonse mane kukabe kutamani.” (Mika 4:5) Mika wakazumanana kubelekela Jehova kusikila kulufwu lwakwe. Aakubusigwa munyika mpya, ooyu musinsimi masimpe uyoozumanana kweendaa Leza kukabe kutamani. Ino eci kaka ncikozyanyo cibotu kulindiswe notupona kwini-kwini kumamanino aaciindi!
20. Ino makanzeesu ayelede kuba buti?
20 Jehova ulakkomana aluyando ndotutondezya kuzina lyakwe. (Ba-Hebrayo 6:10) Ulizi kuti nciyumu kulindiswe kunoosyomeka kulinguwe lyoonse munyika eyi iilelwaa Diabolosi. Nokuba kuti “nyika ilamana, azisusi zyayo, pele oyo uucita makanze aa-Taata ulakalilila kukabe kutamani.” (1 Johane 2:17; 5:19) Aboobo mulugwasyo lwa Jehova, atukanze kuyuma notusukusigwa buzuba abuzuba. Atugamike mizeezo yesu abukkale kuzileleko zibotu izyakasyomezegwaa Taateesu wakujulu siluyando. Eezi inga twazijana kufwumbwa kuti twazumanana kweendaa Leza amuzeezo wakucita obo kukabe kutamani.—Juda 20, 21.
Mulaingula Buti?
◻ Ino Leza ujisi makanze nzi kujatikizya bantu bamumvwa?
◻ Nkaambo nzi Jehova ncatana bweza ntaamu kulobya nyika eyi yabantu batali banaleza?
◻ Nkaambo nzi kutaziba buzuba bwini-bwini Leza nayoobweza ntaamu ncokuteelede kututolwaazya?
◻ Ino nimpindu nzi zijanwa mukweendaa Leza amuzeezo wakuzumanana kukabe kutamani?
[Cifwanikiso icili apeeji 17]
Ikweendaa Leza ciyanda kuti tumubelekele cabusungu