Leza, Ibulelo, Alimwi Andinywe
“Cikombelo a Bulelo Zyaimpana Mukuvwootela Kulekana mu Ireland”
OOYU mutwe wamakani mupepa lya The New York Times ulatondezya mbuli bantu mbobanga bayandika kusala sunu akati kaciyanda Bulelo aciyiisya cikombelo cabo.
Cibalo eco caamba kuti: “Mbokwasyaala buyo mazuba aatazulizyi amwezi kakutana vwootwa kuti naa mulawo uukasya kulekana ugwisyigwe naa pe, mucisi ca Ireland mwalo mobavwulide ba Katolika kuli mazwanga mapati akati kabeendelezi Bamfwulumende alimwi abacikombelo.” Ibulelo bwakapa muzeezo wakuti ugwisigwe mulawo uukasya kulekana, kakuli Cikombelo ca Katolika cilifwundumene kukasya kulekana akukwata naa kukwatwa kumbi. Ba Katolika bana Ireland bakayandika kuti basale akati ka Cikombelo a Bulelo. Kwakaba kwiindana kusyoonto buyo pele Bulelo mbubwakazunda.
Munzila yiindaawa kukomena, ikwamyaka minji bana Northern Ireland balijatikizidwe mumazwanga aajatikizya kulilela kwacisi. Banji bajaigwa. Ba Katolika aba Protestanti bakali kwiimpana amakani aakuti
Mbulelo buli mbobeelede kulelwa: naa Britain izumanane kubalela mu Northern Ireland antela kube mfwulumende yaakati iyacisi coonse ca Ireland.
Ncimwi buyo amwakali mu Yugoslavia, beendelezi balela balikuyanda kuti bantu bazikombelo ziindene, kubikkilizya aba Katolika aba Orthodox, balwane munkondo yabulelo. Ino balo bantu buyo, nguni ngobakeelede kubikka ambele? Sena bakeelede kutobela baabo bakali kulitaminina kwiiminina Bulelo, naa bakeelede kumvwa Leza, iwaamba kuti: “Utajayi, . . . Yanda mweenzinyoko mbubonya mboliyanda omwini”?—Ba-Roma 13:9.
Mulakonzya kuyeeya kuti ciimo cili boobu kwiina nocinga camujatikizya. Pele cilakonzya. Mane twaambe kuti neliba lino ndiza kuli cimujatikizide. Mubbuku lyakwe litegwa The State in the New Testament [Ibulelo mu Cizuminano Cipya], sikwiiya zya Leza Oscar Cullmann wakaamba “zimwi zintu zijatikizya kupona naa kufwa Ibanakristo nzyobeelede naa nzyobanga bayandika kusala kuti basinikizigwa amfwulumende iidyaaminina.” Pele alimwi ulaamba “amukuli wini-wini ngwajisi Imunakristo woonse—kubikkilizya a Munakristo uuli mubukkale butegwa ‘ibusitiikide,’ ‘ibwabuzubaa buzuba’—iwakuswaana akwiingula mibuzyo iizwa mubuyumuyumu bupati mbwajana akaambo buyo kakuti Mmunakristo.”
Aboobo sena Banakristo sunu baleelede kubikkila maanu kubona mbuli bukombi a Bulelo mbozyeendelezyanya? Masimpe baleelede. Kuzwa lili elyo, Banakristo bali kusoleka kulanga bweendelezi bwacisi munzila iiluzi. Musololi wabo, Jesu Kristo, wakabetekwa, wapegwa mulandu, akujaigwa a Bulelo bwa Roma. Basiciiya bakwe bakayandika kuti beeleke nzyobeelede kucitila Bunakristo alimwi azyobeelede kucitila Bulelo bwa Roma. Aboobo ikulanga-langa mbubakali kweendelezyanya abulelo, kulapa busolozi ku Banakristo sunu.
[Nkotwakajana cifwanikiso icili apeeji 3]
Tom Haley/Sipa Press